LGBTQIA+it immikkoortitaannginnissaannut uumissorneqannginnissaannullu illersuisut amigaataapput

Qanorippa nunatsinni LGBTQIA+iuneq?

- Ikinngutit klassimilu atuaqatit illoqarfimmeeqatigereerlugit angerlarlunga, angut aqqusinermi takkuppoq- allanik inoqanngilaq unnuaallunilu.

- Inuk taanna ilisarisimanngilluinnarpara, nakuuserfigilerpaangali “homorsuarmillu” taagorlunga, Qillaq Ilannguaq Olsen nalunaarusiami nutaami oqaluttuarpoq.

Nunatsinni LGBTQIA+ -it ukkanniarlugit, Sipineq+ suleqatigalugu Inuit Pisinnaatitaaffii pillugit Siunnersuisoqatigiit (IPS) nalunaarusiamik saqqummiussipput. Qulequtserlugu: Kalaallit Nunaanni LGBTQIA+-iuneq.

Nalunaarusiami sammineqarput inuit pisinnaatitaaffiisa eqqortinneqarnissaannut annertuumik unamminartoqartoq, peqqissutsimut, paasissutissanut aamma inuiaqatigiinni ilisimasaqarnerup annertussusianut, minnerunngitsumik maani nunami innuttaasunut LGBTQIA+-tut inuusaaseqartunut kinaassusersiortarnermut tunngatillugu.

Kalaallit Nunaat alloriarpoq

Assigiinngisitsisarneq pillugu inatsit siullerpaaq Inatsisartuni maajip ulluisa 13-anni oqaluuserineqassaaq. Inatsisartullu ataatsimiinnginneranni nalunaarusiaq IPS-ip saqqummersippaa. Tassani siunertaavoq assigiinngisitsinermik akiuiniarnissaq aammalu kikkut tamarmik assigiimmik pisinnaatitaaffeqarnissaat aamma periarfissaqarnissaat qulakkeerniarlugu.

Inuit Pisinnaatitaaffii pillugit Siunnersuisoqatigiinni (IPS) siulittaasup tullia Tukumminnguaq Olsen Lyberth inatsisissatut siunnersuutip akuersissutigineqarnissaanut neriuuteqarluarpoq:

- Immikkoortitsinnginnissaq pillugu nunatsinni inatsiseqalerneq nunatsinnut alloriarnerujussuuvoq. Immikkoortitsineq pinaveersaartissallugu pisussaaffeqarpugut akisussaaffeqarlutalu. 

- Naak nunatsinni Inuit pisinnaatitaaffiinik atuutsitsineq Nunani tamalaani pituttorfigisimasatsinni atuukkaluartut, uagut nunatsinni tamanna nammineq qulakkiigassaraarput atuutsissallugu, inatsisillu taassuma piulernerani taamaasiorsinnaalerpugut.

Kinaassusersiorneq pillugu maalaaruteqarnissamut periarfissaq

Kinaassusersiorfigineqarluni misigigaanni qanoq iliortoqassava?

Inatsisissatut siunnersuut akuerineqarpat kingunerissavaa Naligiissitaaneq pillugu aalajangiisartunik pilersitsisoqarnissaq. Tassannga kinaassusersiorneq pillugu inerteqquteqarnermik unioqqutitsinerit pillugu maalaarutit suliarisassavai. Naligiissitaaneq pillugu aalajangiisartut, kinaassusersiorneq pillugu inerteqquteqarnermik unioqqutitsisoqartillugu, taarsissuseqarnermik akiliisitsinissamik aalajangiisinnaapput.

- Ukiuni arlalinni inatsisit tassunga tunngasut kinguussaaqqasimaqaat. Naligiissitaaneq assigiinngisitsinnginnissarlu pillugit inatsisip atuutilerneratigut nunatsinni innuttaasunut tamanut qulakkeerneqassaaq immikkoortinneqannginnissaq, kikkut tamat naligiimmik pisinnaatitaaffeqalertillugit, inuunermilu naligiissumik inuulersinnaanngortillugit, Tukumminnguaq Olsen Lyberth naggasiivoq.