Lidegaardip qinersinissaq sioqqullugu ministeriunissatut piukkussartik nalunaarutigissamaarpaa
Venstremeersoq imaluunniit Socialdemokraatineersoq qinigassanngortittoq arlaat Radikale Venstrep tapersersorsinnaavaa.
Politikkikkut siuttuusoq Martin Lidegaard (R) aamma Samira Nawa (R) Københavnip Hovedbanegårdiani tusagassiortunik katersortitsinermi ilaanni nipilersuutinit, angalasunut nalunaarutinik tunioraasunit, unammillernartorsiortinneqarput.
Assiliisoq: Liselotte Sabroe/Ritzau Scanpix
Radikalikkormiut kissaatiginngilaat maanna ministeriunissatut piukkussartik nalunaarutigeriissallugu, tassa partiip folketingimut qinersinissami tulliuttumi tapersersorsinnaasaanik, qinersinermi kingusinnerpaamik qaammatit 15-it qaangiuppata pisussami.
Taama oqarpoq politikkikkut siuttuusoq Martin Lidegaard (R) pingasunngornermi Københavnip Hovedbanegård-iani tusagassiortunik katersortitsinermi, partiip aasaanerani ataatsimiinnissaa sioqqullugu.
- Partiit taakku marluk tamaasa ajunngitsumik suleqatigilluarsinnaavagut, tassa Socialdemokratiet aamma Venstre.
- Avatangiisinik mingutsitsinnginnissaq pillugu allannguinissaq sukkatsisinneqarsinnaappat, tamatumalu saniatigut Arne aamma amaqqut kisimik salliunneqassanngippata, kisianni aamma meeqqat, inuusuttut ilinniartitaanerallu salliunneqassappata ammavugut, Martin Lidegaard oqarpoq.
"Arne"-mik oqarnermini Martin Lidegaardip innersuussutigaa Arne-pensionimut isumaqatigiissut, tassaalluni siusinaartumik soraarnerussutisiaqalersinnaanissamut pisinnaatitaaffimmik tunngasoq. Amaqqut pillugit innersuussinermini pivaa amaqqut pillugit oqallinneq, qaammatini kingullerni ingerlanneqarluarsimasoq, amaqqut Danmarkimi nujuartatut angalaartut pillugit qanoq iliortoqassanersoq oqallinnermut tunngasoq.
Folketingimut qinersinissaq sioqqullugu partiip nalunaarutigissavaa, partiip kina tunuliaqutaaffigiumanerlugu.
- Soorunami nalunaarutigissavarput kina kaammattorusunnerlutigu, kinalu tapersersorusunnginnerlutigu folketingimut qinersinissaq sioqqullugu, Martin Lidegaard oqarpoq.
Folketingimut qinersineq tulleq pisussaavoq kingusinnerpaamik 31. oktober 2026, kisianni ilisimaneqartutut ministeriuneq - tassa Mette Frederiksen (S) maannakkut taamatut atuuttuusoq - aalajangiisuuvoq, qinersinissamut toortakkap qaqugu toorneqarnissaa.
- Tapersersorumaagarput, uagut pingaartitatsinnik sulissutigerusutatsinnillu annerpaamik tapersersuijumasoq tapersersugassatut toqqarumaarparput. Tassa meeqqat, inuusuttuaqqat pinngortitarlu pillugit sulissutiginnikkumaneq tunuliaqutserumaarparput.
- Tassa pingaartitagut taakku tikkuussiumaarput, kikkut naalakkersuisoqatigiinniissinnaanersut kikkut naalakkersuisunngortinneqarnissaannut tunuliaqutaajumanitsinnut, Martin Lidegaard oqarpoq.
Manna tikillugu ministeriunissatut sassartoq tassaavoq ullumikkut ministeriunerusoq Mette Frederiksen (S). Troels Lund Poulsen (V) allalluunniit suli nalunaaruteqanngillat ministeriunertut sassarusunnerlutik.
Taamaattorli partiit talerperliit arlallit Troels Lund Poulsen ministeriunissatut qinigassanngortissinnaasutut tapersersugassamittullu taavaat. Kingullermik Liberal Alliancemit ammasumik oqaatigineqarpoq, partiip massakkut illersornissamut ministeriusoq tunuliaqutaaffigiumallugu. Siusinnerusukkut De Konservative Dansk Folkepartilu erseqqinnerusumik oqaatigisimavaat Troels Lund Poulsen tunuliaqutaaffigerusukkitsik.
- Maluginiarpara, massakkut pissutsit allanngoriartorfiusut, taavalu partiit talerperliit arlallit Troels Lund Poulsen-mut tunuliaqutaajumasut. Taamaammat takoriartigu qaammatit tulliuttut qanoq ingerlasinnaanersut, Martin Lidegaard oqarpoq, taassumali maannangaaq isummersorfigerusunngilaa talerperliit eqqarsaatersuuteqarnerat.
Martin Lidegaardili naliliivoq, talerperliit ministeriunerusinnaasumik qinigassanngortitsisinnaanerat iluaqutaasinnaasoq.
