Løkke Vance-p nunatsinnut tikeraarnissaa sioqqullugu: Paasisimasaqarnerup pisariaqartinneqarnera qaffappoq
Kalaallit Nunaat pillugu USA-mi oqaluttuarineqartut eqqunngitsut arlallit ingerlaarput, vicepræsidentip tikeraarnissaa sioqqullugu Lars Løkke oqarpoq.
Illersornissamut Ministeri Troels Lund Poulsen (V) aamma Nunanut Allanut Ministeri Lars Løkke Rasmussen (M) tusagassiortunik naapitsipput sisamanngornermi, Nunanut Allanut Sillimaniarnermullu Ataatsimiititaliap ataatsimeeqatiginerata kingorna.
Assi: Liselotte Sabroe/Ritzau Scanpix
USA-p vicepræsidentia, J.D. Vance, tallimanngornermi Pituffimmi Sakkutooqarfimmi Space Base-mut tikeraarnermini, ilisimasassanik pitsaasumik tuniorarneqarumaartoq, nunanut allanut ministeri Lars Løkke Rasmussen (M) neriuuteqarnerarpoq.
- Tassami aamma pisariaqartinneqarpoq, ilisimasaqarneq qaffassasoq uani suliami, Lars Løkke sisamanngornermi ualikkut Nunanut Allanut Sillimaniarnermullu Ataatsimiititaliami ataatsimiinnermi kingorna oqarpoq.
USA-mi Kalaallit Nunaat pillugu oqaluttuarineqartutut eqqunngitsutut isigisaminik taanna assersuuteqarpoq.
- Oqaluttuarineqaqattaartoq ilisarisinnaanngilarput, taamaattorli maluginiarnarpoq USA-mi politikkikkut suliaqartut akornanni isumaliortoqartoq Kalaallit Nunaanni Kinamiunik aningaasaliisartunik ulikkaartoq. Uanga ilisimasakka naapertorlugit ataasinnguamilluunniit taamaattoqanngilaq.
- Taamaammat pitsaasuuvoq, inuit angalallutik, pissutsit piviusut pillugit ilisimasassaminnik tuniorarneqassappata, Lars Løkke oqarpoq.
Taassuma aamma oqaatigaa, pilersaarutigineqaraluartoq, USA-p inuiaqatigiinnut kalaallinut "iluareqqusaarluni" taamaatiinnarneqarnera paarlattuanillu USA-p sakkutooqarfianut tikeraarnissamut allanngortinneqarnera pissutsinik ersarinnerulersitsissasoq.
- Tamanna nalilersorneqartariaqarpoq, aammalu paasineqartariaqarpoq USA-mi arlaata paasisimagaa, oqaluttuarineqartoq, kalaallit inuiaat ammasumik tikilluaqqusinerarlugit, tamaviaarlutillu amerikamiunngorusunnerarlugit eqqortuunngitsoq, Løkke oqarpoq.
J.D. Vance nulialu, Usha Vance, Pituffik Space Base-mut tikeraassapput, siornatigut Thulebasenimik taaneqartartumut.
Sakkutooqarfimmut tassunga qaqugorpiaq tikissanersut aammalu qanoq sivisutigisumik tassaniissanersut ilisimaneqanngilaq.
Taamaattorli ilisimaneqarpoq, danskit imaluunniit kalaallit politikerit tikinnissaanni najuullutik tikilluaqqusinavianngitsut.
Tamannalu pissusissamisoorpoq, Lars Løkke oqarpoq.
- Tassami amerikamiut vicepræsidentiata, namminneq sakkutooqarfitsik Kalaallit Nunaanniittoq tikeraassavaa. Tamanna uagutsinnut attuumassuteqanngilaq, nunanut allanut ministeri oqarpoq.
Amerikamiut præsidentiata, Donald Trump, pingasunngornermi aammaarluni uteqqippaa nammineq kissaatigigini, Kalaallit Nunaat USA-mut ilanngutissasoq.
