Løkkep USA-mi tikeraarnermini Maga-mut tapersersuisut ataatsimeeqatigissavai

Nunanut allanut tunngasunut ministeri Lars Løkke Rasmussen (M) Washington D.C.-mut maanna tikeraaqqavoq, tassanilu ilaatigut Maga-mik tapersersuisunik (Make America Great Again-imi, aaqq.) ataatsimeeqateqarnissaminik pilersaaruteqarpoq.

TV 2-mit sapaatiummat ualikkut apersorneqarluni oqarpoq.

Maga-t tassaapput USA-p præsidentianik Donald Trumpimik tapersersuinerpaasut.

Lars Løkke Rasmussen naapertorlugu ataatsimiinnermi taakku suut suliniutigalugit anguniarneraat paasisaqarfigerusunneqarpoq aamma isummat qanoq pinngortarnersut.

- Uku Maga-mik suliniuteqartut aalajangiinernut pisortatigoortuunngitsumik peqataasarnerat paasisariaqarparput. Pisortatigoortuunngitsumik aalajangiisartunik (Trump, aaqq.) avatangiiseqarpoq, tamannalu paasisaqarfigisariaqarparput, TV 2-mut oqarpoq.

Ministeri tikeraarnermini Amerikamiut qanoq isumaqarnersut paasilluarnerusinnaallugu TV 2-mut oqarpoq.

Kalaallit Nunaat oqaluuserisanut ilaassanngitsoq oqarpoq.

Lars Løkke Rasmussen illersornissamut ministeri Troels Lund Poulsenilu (V) USA-mut arfininngormat aallarput. Sisamanngornerup tungaanut tikeraaqqassapput.

Danmarkip ministeriisa marluk tikeraarnerminni ilaatigut Amerikamiut aalajangiisartut, isummersortartut illersornissamullu tunngasunik suliaqartut ataatsimeeqatigissavaat.

Ministerit taakkua USA-mi ministerinik ataatsimeeqateqassanngillat.

USA-mi kongressimi ilaasortat 42-t nereqatigisussaagaluarpaat, pilersaarulli taamaatiinnarneqarpoq.

Lars Løkke Rasmussenip Troels Lund Poulsenillu kongressimi ilaasortat internetikkut ataatsimeeqatigiinnarpaat.

USA-p sakkussiassanik sukkanerusumik pilersuinissaa tikeraarnermi oqaluuserineqassaaq.

Ukrainemik tapersersuineq aamma attatiinnarneqassaaq.

USA-p Ukrainemut sakkussianik pilersuinera annikillisinneqassasoq USA-p præsidentiata illuaniit sapaatit akunnerani siusinnerusukkut nalunaarutigineqaqqaaraluarpoq.

USA-p tapersersuinini attatiinnassagaa Danskit naalakkersuisuisa kissaatigaat, ingammik rakettinik sakkussiassanik aaqqissuussaq patriot pillugu.

Atlantikoq akimorlugu suleqatigiinneq, EU-mi danskit siulittaasuuffigisaanni pingaarnersiuineq Kangianilu Qiterlermi pissutsit aamma danskit ministeriisa tikeraarneranni oqaluuserineqassapput.

/ritzau/