KL

DK

Mælkebøttecentret nutarterneqarlunilu sullissinermik nutaamik peqalerpoq

Meeqqanut paaqqinnittarfik Mælkebøttecentret ilaatigut meeqqanut pingasut inorlugit ukiulinnut sullissisalilissaaq.

Mælkebøttecentret annertuumik iluarsaanneqarpoq.
Thomas Munk Veirum
Journalisti
Saqqummersinneqarpoq

Ulloq unnuarlu paaqqinnittarfik Mælkebøttecentret namminersortoq nutaanik suliniuteqalerpoq.

Periusissiamut nutaamut atatillugu sullissinerit suliniutinik nutaanik ilaneqassasut, aamma Mælkebøtten Nuutoqqamiittoq iluarsaanneqangaarlunilu allanngortinneqassasoq, Mælkebøttecentret tusagassiuutinut nalunaarummi ilisimatitsivoq.

Meeqqat sapinngisamik amerlanerpaat toqqissisimasumik pitsaasumillu peroriartornissaannut suliniutit iluaqutaassapput.

Mælkebøttecentrep iliuuserineqartussat ima eqikkarpai:

  • Meeqqat inuusuttullu ulloq unnuarlu angerlarsimaffianni Mælkebøttenimiittut

    ineqarnerat atugaallu pitsanngorsarpavut.

  • Meeqqanut pingasut inorlugit ukiulinnut nutaarluinnarmik, “Aili”-mik

    atserneqartumik, angerlarsimaffeqalissaagut.

  • Soorunami Mælkebøttecenterimi ornittagaq (Værested) ingerlatiinnassavarput,

    taamaalillutik meeqqat Mælkebøttenimeersut, Ailimeersut minnerunngitsumillu

    illoqarfimmeersut siunissami ornittakkatsinnik nuannaarutiginnissinnaaniassammata.

  • 2024-mi ammartussami Najortigeeqatigiiffimmik pilersitsissaagut.

Sumiginnaanermik pinaveersaartitsissasoq

Meeqqanut pingasut inorlugit ukiulinnut sullissinerup nutaap „Aili“-p „siusinaartumik iliuuseqarneq“ sammissavaa, tamannalu sumiginnaaqqinnginnissamut pingaaruteqarpoq.

- Angajoqqaat meeqqallu attaveqatigiinnerat nukittorsarneqassaaq, angajoqqaallu piginnaaneri sungiusarneqassallutik. Najugaqarfik Aili meeqqap angajoqqaajusullu inissimaffiat pisariaqartitaallu pillugit sulineq isiginninnerlu isumagineqassaaq, kommunilu suleqatigalugu ataatsimut iliuuseqartoqarnissaa qulakkeerneqassaaq, Mælkebøttecentret allappoq.

Ukiuni arlalinni Nuummi meeraaqqanut immikkoortortamik pilersitsinissaq kissaatigineqarsimasoq Mælkebøttecentremi pisortaq oqarpoq, meeqqammi arlallit inissinneqarnissaannik qinnuteqaatit itigartinneqartariaqartarsimaneri misigisimagamikku.

Tapersersorneqarneq qujamasuutigigaa

- Pissutsit arlallit misissorneqarsimapput, ilaatigut nutaamik sanaartornissaq illulluunniit pioreersut pisiarinissaat. Suliaq sivisusimavoq, pissutsillu taaneqartut arlaannaalluunniit iluatsinngitsoorsimapput, ilaatigut aningaasaqarnikkut pissutsit pissutigalugit, aammali siunertamut sanaartorfissanik naleqquttunik nassaarniarluni ajornakusoortarsimammat.

- Najukkami oqartussanit, suleqatitsinnit minnerunngitsumillu sulisutsinnit pitsaasunit tapersersorneqarnerput pillugu qujamasungaarpugut. Ataatsimoorluta takorluugaq maanna piviusunngortinneqartoq pilersissimavarput, Nuka Fleischer oqarpoq, meeqqallu avatangiisinut nutaanut tikilluaqqunissaat taassuma qilanaaraa.

Nuka Fleischer Mælkebøttecenterimi pisortatut 2023-p naanerani atorfinitsinneqarpoq, ukiorpassuarni pisortaasimasoq Kirsten Ørgaard taarserlugu.

samfund inuiaqatigiit

ATORFIIT Se alle jobs

Powered by Labrador CMS