KL

DK

NUNANIT ALLANIT

Mærskip umiarsuartaava methanolimik orsertagaq 350 meterinik takissusilik nunarsuup imartani takussaalissaaq

Mærsk-ip umiarsuartaava methanolimik orsertagaq "Antonia Mærsk"-imik atserneqarmat Aarhusip umiarsualiviani tallimanngornermi nalliuttorsiutigineqarpoq.

"Antonia Mærsk" containerinik 16.500-nik inissaqarpoq. Umiarsuaq tallimanngornermi Aarhus Havn-imi atserneqarpoq.
ritzau
Saqqummersinneqarpoq

Mærskip umiarsuaatai methanol-imik ingerlasinnaasut tallimanngornermi ilaneqarput, umiarsuaq nutaaq Aarhus-imi atserneqarmat.

Tamanna pivoq Aarhusip umiarsualiviani tallimanngornermi nalliuttorsiornermi. Arfininngornermi umiarsuaq takornariartitsinermut ammassaaq inuit 2000-t pulaarsinnaatinneqarlutik.

umiarsuaq 350 meterinik takissusilik, 16.500-nik containerinik assartuisinnaasoq, atserneqarpoq "Antonia Mærsk"-imik.

Umiarsuaq umiarsuit taamaattut akornanni nunarsuarmi anginersaavoq.

Umiarsuit containerersortut amerlanerpaat, uuliamik ikummatissaqarlutik taamaallaat ingerlasut, "Antonia Mærsk" methanolimik aamma ingerlanneqarsinnaavoq.

Taanna biogassimit imaluunniit biomassimit pilersinneqarsinnaavoq aamma pingaarutilimmik inissisimavoq umiarsuaatileqatigiiffiup CO2-mik aniatitsinerup apparsarnissaanut anguniagaani.

Mærsk-ip qullersaq Vincent Clerc oqalugiarpoq atserneqarnissaq sioqqullugu.

"Antonia Mærsk"-ip kingorna tungaaniilluni ingerlatseqatigiiffiup mingutsitsinnginnerunissamik anguniagai pillugit saqqummiivoq.

- Methanoli ikummatissaavoq mingutsitsinikitsoq, annertuumik pilersinneqarsinnaasoq. Taamaattorli ikummatissanik umiarsuit atuisarneranik taarsersuinissaq suliassarujussuuvoq. Siunissami takorloorparput ikummatissat assigiinngitsut mingutsitsinnginnerusullu atornerulissallutigit, qullersaq ilaatigut taamatut oqarpoq.

Periarfissaq iluatsillugu pisortap erseqqissaatigeqqippaa Mærsksip kissaatigisarigaa politikkikkut iliuuseqartoqarnissaa.

- Uagut kisitta iliuuseqarsinnaanngilagut, tamanna naammanngilaq. Pisariaqarpoq akigititanik aaqqissuussineq, ikummatissat mingutsitsinikitsut atorlugit angalasut aammalu ikummatissat mingutsitseqisut atorlugit angalasartut akornanni akitigut putoq matuneqartariaqarpoq.

Ullumikkut ikummatissat mingutsitsinikinnerusut akisunerupput ikummatissanit mingutsitsinerusunit, taamaattumillu Mærsk akigititamik qaffasinnerusumik atuisuminut akiisitsisarpoq, atuisut mingutsitsinnginnerunissamik kissaateqartarnerat malillugu minguitsumik aaqqiissuteqarneq akisunerummat.

Taamaattumik Mærskimut unammillernarpoq minguitsumik methanolimik naammanngitsumik pissarsiniarneq.

Taamaattumik umiarsuaq nutaaq methanolip saniatigut uuliamik aamma orserneqartarallassaaq.

"Antonia Mærsk" tassaavoq umiarsuarsuaq Danmarkimi atserneqarsimasoq siullerpaaq methanolimik ingerlatilik.

Mærskip umiarsuaataanut allanut methanolimik ingerlatilinnut umiarsuaqatigiinnut umiarsuaq taanna maanna tassa ilanngunneqarpoq, umiarsuit pissuseqatai tassaapput "Ane Mærsk" aamma "Astrid Mærsk" kiisalu mikinerusoq "Laura Mærsk".

Kingulleq Mærskimit tunniunneqarpoq 2023-mi. Umiaq tassaavoq siullerpaamik metanoli atorlugu ingerlasoq.

Mingutsitsinikitsumik methanolimik atuinikkut umiarsuup ataatsip mingutsitsinermik aniatitsinera Mærsk naapertorlugu minnerpaamik 65 procentimik annikillisaataavoq.

mærsk methanol inuiaqatigiit containerskibe co2 søfragt udland samfund

ATORFIIT Se alle jobs

Powered by Labrador CMS