Maliina Ittuk kiisami naammassineqarluni tikiunneqartoq

Disko Linep umiarsuaa nutaaq Maliina Ittuk arlaleriarluni misilittarneqareerluni ajutooqattaareerlunilu kiisami Kalaallit Nunaannut tikiunneqarpoq.

Umiarsuaq nutaaq Islandimiit ulluni marlunni affarmilu ingerlaareerluni Qaqortumut ataasinngormat ualikkut pingasunut tulappoq.

- Angalanerup immikkoortuata kingulliup ingerlanerani ajornartorsiuteqarata Grindavikimiit Kalaallit Nunaannut, Prins Christian Sund aqqusaarlugu Qaqortumut toqqaannartumik ingerlavugut, Disko Linemi pisortaq Michael Højgaard oqarpoq.

- Umiarsuarmi nutaami teknikkikkut unammilligassaqarsimanerput naluneqanngilaq. Frederikshavnimili sivisuumik amutsivimmeereerluni generatorillu aappaata taarserneqarnerata kingorna Atlantikoq ikaarlugu angalaneq ajornartorsiuteqanngitsumik ingerlavoq.

Marlunngorpamiit atulissasoq

Maliina Ittuk sivisuumik angallanneqareerluni maanna piareersarneqassaaq. Umiarsuaq marlunngorpat tulliani – oktobarip 28-anni – Narsarsuarmut siullermeerluni aallassaaq, aqqut taanna Qaqortumi mittarfissap nutaap aappaagu upernaakkut ammarnissaata tungaanut angallassiffiusassaaq. Tamatuma kingorna Maliina Ittuup Qeqertarsuup eqqaani angallassissutaasalernissaa pilersaarutaavoq.

Maliina Ittuk Qaqortumut tikimmat Michael Højgaard najuutinngilaq. Disko Linemik piginnittut Topasimi aqutsisut Korsikami isumasioqatigiinneranni maanna peqataavoq.

- Tikinnerata nittartakkatigut toqqaannartumik aallakaatinnissaa aqqissuunnikuuarput, taamaattumik maani Korsikamiit malinnaaqataavugut – tikimmat talittarfimmi nuannanneq killeqanngilaq. Maliina Ittuk tulluusimaarutigeqaarput.

- Qaqortumi umiarsualivimmut inuppassuit takkussimanerat nuannaarutigaarput – minnerunngitsumillu umiarsuaq tikilluaqquniarlugu biilerpassuarnit nilliatitsinerat. Qaqortormiut amerlasuut piffissami aggersumi Maliina Ittummik angalaneq iluarissagaat qularnanngilaq, angallammi inissaqarluarlunilu ilorrisimaarnarami.

Umiarsuaq ilaasartaat ukiuni kingullerni annerpaaq

Umiarsuaq Disko Linep umiarsuaataani, Najaaraq Ittuup 1999-imi umiarsuaateqarfimmit pigineqalerneraniilli, maannamut annerpaavoq, taannalu Kalaallit Nunaanni umiarsuit ilaasartaatit savimerngit annersaralugu.

Najaaraq Ittuk 60-inik ilaasoqarsinnaavoq Maliina Ittukkullu marloriaatingajaanik – 113-inik ilaasoqarsinnaalluni. Angallatip initai marluk timmisartumi issiaviit assiganik issiavillit isersimaarfigineqarsinnaapput, imaluunniit umiarsuup qaavani pinngortitaq isiginnaarujoorneqarsinnaalluni.

Umiarsuaq nutaaq hybridiuvoq, tassa motooria batteriinik innaallagiamik imaluunniit ikummatissamik dieselimik nalinginnaasumik ingerlasinnaalluni.

Umiarsualiorneq 2019-imi aallaartimmalli ajutoorfiusarsimavoq. Siullertut corona tuniluutilerpoq – tamatumalu kingorna hybridikkut teknikkit ajornartorsiuteqalerluni. Taamaattoqarnera Assens Stålskibsværftimiit Faaborg Værftimut sanaartorneqarnera siorna nuunneqarneranik kinguneqarpoq.