Maniitsumi Efterskoli oquppoq

Atuarfik Kilaaseeraq skolehjemmilu kisimik oqummik eqqugaanngillat. Maniitsumi Efterskole aamma oquppoq.

-  Nalunaarusiami, 2024-p aallartinnerani Maniitsumi Efterskolimit suliakkiissutigineqartumi, arlalinnik erngup innarligai uppernarsineqarput, taakkulu efterskolimi illuutit oqukkiartornerat tippakkiartornerallu kinguneraat. Kingornatigullu Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup suliaq pillugu ikiorserneqarnissamik Iluarsartuussinermut Aqutsisoqarfimmut qinnutigaa,  Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik allappoq.

Oqummik ajornartorsiuteqarneq ima annertutigaaq, allaat ilinniartitsisut atuartullu efterskolimi isersimanissaat imminut illersorneqarsinnaanani:

-  Atuartut inaat silaannalunnerpaat piffissami sivisuumi inigineqarsimanngimmata ilisimatitsissutigineqassaaq.

Iluarsartuunneqarnissaa pisariaqartoq

Peqqinnartumik illersorneqarsinnaasumillu illuutit iluini peqqinnartumik isumannaatsumillu silaannaqarnissaq qulakkeerniarlugu ilinniartut ineqarfiini illuutinik annertuumik iluarsartuussisoqartariaqartoq,  Iluarsartuussinermut Aqutsisoqarfik inerniliivoq. Aamma illuutit piaarnerpaamik inuerutsinneqartariaqartut Iluarsartuussinermut Aqutsisoqarfik inerniliivoq.

-  Atuartut sulisullu peqqissuunissaat eqqarsaatigalugu 2. maj 2024-mi Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik siulersuisunut siulittaasumut Maniitsumi Efterskolimi forstanderimullu piumasaqarpoq ilinniartut ineqarfiat aamma atuarfiimmi init ataasiakkaat piaarnerpaamik inuerutsinneqassasut.

Atuartut naammassinissaat sulissutigineqartoq

Nalunaarutigineqarportaaq efterskolimi illuutit inuerunnerisaanerup kingunerissagaa Maniitsumi Efterskolimi nalinginnaasumik ingerlatsisoqarsinnaajunnaarneq. Inuerutsitsinerup ukiumi matumani ukiunilu aggersuni efterskolimi sammisassanik pilersaarusiornermi annertuumik taamaasilluni allanngortitsineq kingunerissavaa.

-  Maniitsumi Efterskolip siulersuisuinut siulittaasoq aamma forstanderi kiisalu Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik aamma Ilinniartitaanermut Aqutsisoqarfik efterskolip illutai pillugit Iluarsartuussinermut Aqutsisoqarfiup inerniliussaanik tigusaqarnermik kingornatigut pisoq pillugu oqaloqatigiilluartarput. 

- Efterskolip maannakkut atuartuisa atuartitaanerat illersorneqarsinnaasumik pitsaanerpaamillu qanoq naammassineqarsinnaassanersoq siullermik oqaloqatigiinnermi suleqatigiinnermilu pingaarnertut sammineqarpoq.

Inissiigallarneq

Naalakkersuisoqarfiup nalunaarutigaa  sapaatip akunnerani 19-mi ataasinngornermi aamma marlunngornermi efterskolimut siulersuisut, sulisut, atuartut aamma atuartut angajoqqaavi efterskolimi pisut pillugit ilisimatinneqartut. Atuartut kingusinnerpaamik maajip ulluisa 13-anni Majoriami ilinniartunut ineqarfiini inissinneqassapput

-  Atuartut atuarfimmilu sulisut Majoriami ilinniartut ineqarfiinut inissinneqarnissaat suleqatigiissutigissavaat. Mannitsumi Efterskolip soorunami kissaatigaa atuartut amerlanerit ukioq atuarfiusoq naammassissagaat, aamma sapinngisamik atuartut tamarmik ukioq atuarfiusoq naammassilluarnissaat kissaatigineqarpoq.

-  Efterskolip illutaasa inuerutsinneqarnerisa kingunerisaanik atuartut atuarunnaarniarpata tamanna periarfissaasussaavoq. Periarfissamik sorlermik toqqaasimanerat apeqqutaatinnagu ukiumik atuarfiusumik ilivitsumik atuarsimasutut atuartut uppernarsaammik tunineqassapput.

Atualersussanut siunissaq nalorninartoq

Efterskolimi sulisut kattuffiinik ilisimatitsisimammat siunissaq pillugu oqaloqatigiinnissaq oqaluuserineqassasoq naalakkersuisoqarfik ilisimatitsivoq. Atuartut aallartittussat Maniitsumi Efterskolimi ukioq atuarfiusumi 2024/2025, atuarfimmiit attavigineqarumaartut ilanngullugu paasissutissiissutigaat.

-  Iluarsartuussinermut Aqutsisoqarfiup nalilerpaa illuutit iluarsartuunneqarnissaat siunniunneqassappat ukiup aappaa avillugu, immaqalu sivisunerusumik, Maniitsumi Efterskolip illutaasa atoqqaarteqqinneqarnissaannut atulerseqqinneqarnissaannullu minnerpaamik piffissaliisoqartariaqartoq. Maniitsumi Efterskolip siunissami ingerlanissaa unitsikkallarpoq politikkikkut aalajangertoqarnissaanut, illuutit pitsaassusiisa nalilersorneqarnermikkut inernerisassai apeqqutaatillugit.