Arnap videoliarineqarnera isiginnaarneqangaatsiarpoq,
taannalu nunarsuarmi sorsuuteqartut sapiinnersaattut taaneqarpoq.
22-nik ukiulik Hana Rawhiti-Maipi-Clarke New Zealandimi
inatsisartuni ilaasortani inuusunnersaavoq, aammali maoriuvoq tulluusimaartoq.
inatsisissatullu siunnersuut „The Principles of the Treaty of
Waitangi“-mik — nunap inoqqaavisa
pisinnaatitaaffiinik allannguisussaq — novembarip 14-ianni inatsisartuni
siullermeerneqarmat, taanna inatsisissatut siunnersuutaat alillugu akillunilu
killitsisimanartumik haka-mik qitippoq. Videoliarineqarnera maanna 700
millioneriarluni takuneqarsimavoq.
Arnap videoliarineqarnera isiginnaarneqangaatsiarpoq,
taannalu nunarsuarmi sorsuuteqartut sapiinnersaattut taaneqarpoq.
22-nik ukiulik Hana Rawhiti-Maipi-Clarke New Zealandimi
inatsisartuni ilaasortani inuusunnersaavoq, aammali maoriuvoq tulluusimaartoq.
inatsisissatullu siunnersuut „The Principles of the Treaty of
Waitangi“-mik — nunap inoqqaavisa
pisinnaatitaaffiinik allannguisussaq — novembarip 14-ianni inatsisartuni
siullermeerneqarmat, taanna inatsisissatut siunnersuutaat alillugu akillunilu
killitsisimanartumik haka-mik qitippoq. Videoliarineqarnera maanna 700
millioneriarluni takuneqarsimavoq.
Inatsit novembarip 14-ianni inatsisartuni siullermeerneqarmalli nunami akerliussutsimik takutitsisoqarpoq.
Assi: Vuk Valcic
Taamanimiilli New Zealandimi akerliussutsimik
takutitsisoqarlunilu oqallittoqarpoq, tassami inatsisissatut siunnersuutip
inatsisartuni itigartinneqarnissaa ilimanaraluartoq nunami inuppassuit,
ingammik talerperliuniat, nunap inoqqaavi innuttaasunit amerlanerusunik
pisinnaatitaaffeqartut isumaqarput.
Waitangimi isumaqatigiissut
Isumaqatigiissut partiip Actip inatsisissatut siunnersuuteqarnikkut
allanngortikkusutaa tassaavoq 1840-mi isumaqatigiissut Waitangimeersoq, New
Zealandimi inatsisit amerlanersaannut tunngaviusoq. Isumaqatigiissut Waitangi, imaluunniit Te Tiriti o Waitangi, tassaavoq Tuluit
Nunaata "Kunngiata" naggueqatigiillu Maorit 500-t akornanni
isumaqatigiissut, tassanilu maorit Tuluit Nunaata naalagaaffiata qutsinnerunera
akuerissagaat nunallu Tuluit Nunaannut taamaallaat tunisassagaat allassimavoq.
Taarsiullugu kunngip maorit pigisaat ataqqillugillu illersussavai,
naggueqatigiillu Tuluit Nunaanni innuttaassuseqartillugit. Isumaqatigiissut tuluttoorlunilu maorisoortoq, nassuiaruminaatsinneqarpoq,
pingaartumik „naalakkersuisinnaatitaanermik“ imaluunniit
„naalakkersuisinnaatitaanermik tunniussinermik“ oqaasertaasa isumaat. Maorillu
ukiut ingerlanerini nunap ilarujussua siornatigut pigisimasartik annaasimavaat,
amerlanertigut naapertuilluanngitsumik isumaqatigiissuteqartoqarnera
imaluunniit arsaarinnissuteqartoqarnerata kingunerisaanik.
New Zealandimi inatsisartut eqqartuussivik Waitangimik
taaneqartoq, isumaqatigiissummik nassuiaasussaq najoqqutassiallu
unioqqutinneqarnerannut, ilaatigut taarsiissuteqarnermut il.il. tunngasunik misissuisartussaq, pilersinneqassasoq
aatsaat 1975-imi akuersissutigaat. Inatsisinik ilisimasallit arlallit aviisimut "The New Zealand
Herald"-imut inatsisissatut siunnersuut ernumagingaatsiarlugu oqaatigaat,
isumaqaramik isumaqatigiissut allanngortinniarneqartoq, taamaammallu
naalakkersuisut inatsisartunilu ilaasortat „akisussaassuseqarlutik
iliuuseqaqqullugit inatsisissamullu siunnersuut itigartinniarlugu“
kajumissaarpaat.
