Marita Jessen: Tusilartut avinngarusimasuniittut kiserliortuupput
Inatsisartuni sinniisutut ilaasortap § 37 atorlugu tusilartut siussarluttut ussersorlutik oqalutseqarnermikkut qanoq periarfissaqarnersut apeqquteqaateqarfigaa: - Tusilartut ilaat ima atugarliortigaat allaat inuiaqatigiinnut akulerusimajunnaarsimallutik. Tamanna akuerineqarsinnaanngilaq, Marita Jessen oqarpoq.
Inatsisartuni sinniisoq, Marita Jessen (IA), tusilartut siussarluttullu ussersorluni nutserisoqarsinnaanerat pillugu paragraf 37 naapertorlugu apeqquteqarpoq, aamma ilinniarniaraangamik atorfissaqartitsisarnerat tikkuarpaa.
Leiff Josefsen
Inuit innarluutillit
tapersersorneqarnissaat pillugu Inatsisartut inatsisaat
tunngavigalugu inuit innarluutillit tamarmik ineriartornissamut
periarfissaqarlutillu piginnaasaminnik atuisinnaaneq
pisinnaatitaaffigaat.
Aamma ilinniartitaanikkut suliffeqarnikkullu,
taamaasilluni Martha Jessenip (IA) paaserusuppaa tusilartut
tusaaniarnermikkullu ilungersunartorsiortut ussersorluni
nutserisoqarnissamik periarfissaqarnersut, aamma nutserisunik sunik
peqartoqarnersoq.
-
Tiliumi innuttaasunut siunnersuisartutut, tusilartunik tutsarluttunillu ilungersuuteqartunik oqaloqateqartarninnik
misilittakkakka naapertorlugit Kalaallit Nunaanni tusilartut atugaat
ajorluinnarput, periarfissaallu killeqangaarmata akuerineqarsinnaanngillat.
Tusilartut innarluuteqartuupput ikinnerussuteqartut,
takuneqarsinnaallunilu taakku ikiorniarlugit iliuuseqartoqanngitsoq,
Marita Jessen oqarpoq.
Kalaallit
Nunaanni tusilartut tutsarluttullu kisitsisaatigineqanngillat. Sisimiuni tusilartunut siornatigut atuarfik angerlarsimaffillu piugaluarput, maannali sumiiffinni
assigiinngitsuni, avinngarusimasumi kiserliorlutik najugaqarput, ussersorlunilu nutserisoqarsinnaanermik periarfissaat
aamma tamani assigiimmik ajortigaaq, Marita Jessen isumaqarpoq.
-
Sinerissami siammartersimapput. Ilarpassui kiserliorput, ilaat
Danmarkimut nuukkusupput. Suliffeqalernissamut ilinniagaqarnissamullu
periarfissaat killeqarput, ikiuutaallu killeqarput imaluunniit
ussersorluni nutserisussaqarnissaat ajornakusoorluni. Nalunngilara
ussersorluni kalaallisut nutserisoqartoq, taannalu piumaneqarluarpoq,
Marita Jessen oqarpoq.
Tusilartut
ilinniartitaanissamut nutserisumillu atuinissamut pisinnaatitaaffiat
Tusilartut siussarluttullu ilinniarnissamik sunik
periarfissaqarnersut, kiap ikiorsinnaanerai kinalu
iliuuseqarniarnersoq Marita Jessenip apeqquteqaatigaa.
-
Tusaasaqaruit isigisinnaaguillu ajornartorsiutitaqanngitsumik
nakorsiarsinnaavutit, pisiniarsinnaavutit, suliffeqarsinnaavutit
ilinniarsinnaallutillu. Tusilartulli ulluinnarni ussersorluni
nutserisumik pisariaqartitsipput, ilaat inuiaqatigiit sinnerinut
akulerusimanngilluinnarput kiserliortutullu misigillutik, tamannalu
akuerineqarsinnaanngilaq. Kikkulluunnit inuiaqatigiinnut
peqataanissaminnut pisinnaatitaaffeqarput.
-
Tusilartut nakorsamut saaffiginninnerminni qallunaatut pappiaqqamut
annikitsumik allassinnaanerat naammanngilaq, aammali
isummersinnaatitaapput ussersorlunilu nutserisumik
ikiorneqarsinnaatitaallutik, Marita Jessen oqarpoq.
Tusilartut
tutsarluttullu allanut
attaveqarfiginiaraangamikkit internetikkut attaveqaatit
atortariaqarpaat, Marita Jessen oqarpoq. Taassuma paragraf 37
naapertorlugu Naalakkersuisunut internetimut aningaasartuutit
tamakkerlugit ilaannakoortumilluunniit akilerneqarsinnaaneranik
periarfissaqarnersoq apeqqutigaa.
-
Tusilartoq kingullermik oqaloqatigigakku illoqarfimmi allami
najugaqartoq internetsersinnaanngilaq. Taannalu internetikkut
attaveqaqatigiissinnaaniassagatta kommunimut attaveqaqqullugu
kajumissaarniarsarivarput. Tusilartorpassuilli siusinaartumik
utoqqalinersiaqarput internettimullu akiliinissamut akissaqarnatik,
Marita Jessen oqarpoq.