Matusigallarnerit Ernisussiortut Kattuffiata isumakuluutigingaatsiarai
Peqqinnissaqarfik ernisarfinnik marlunnik matuseqqippoq, tamannalu ilungersunartunik kinguneqarsinnaavoq, Ernisussiortut Kattuffiat mianersoqqusivoq.
Qaqortup napparsimmavia ernisarfiit marluk maanna matugallarneqartut ilagaat.
Assi: Poul Hard
Ernisarfiit marluk matoqqagallartut Peqqissutsimut Inunnullu Innarluutilinnut Naalakkersuisoqarfik ullumi nalunaarpoq. Sisimiuni Qaqortumilu ernisarfiit pineqarput.
Ajornartorsiut tamanna aatsaat pilinngilaq, tamannalu pissutigalugu Ernisussiortut Kattuffiat tusagassiutitigut nalunaarummi ernumassuteqarnerarpoq.
- Aalajangiineq piffissap sivikitsup ingerlanerani saqqummiunneqartoq erninermut atatillugu neqeroorutinut pitsaassutsimut tunngatillugu ernisussiortunut ilaqutariinnullu naartusunut sunniuteqangaassaaq, taakku allapput.
Ernisussiortut Kattuffiat naapertorlugu Kalaallit Nunaanni ernisarfiit 2002-mi 17-iusimagaluartut maanna pingasuinnaat suli ammapput.
Aasianimi ernisarfik 2019-imi matugallarneqarpoq. Suli ammaqqinneqanngilaq. Qaqortumi ernisarfik aamma ukiuni kingullerni arlaleriarluni matugallarneqartarpoq.
- Peqqinnissaqarfimmi aqutsisut piffissami sivikitsumi ernisarfiit pingasuinnanngortissimanerat EK-miit ernumagilluinnarparput, tamatumalu kingunerisaanik Nuummi ernisarfiit amerlanerusulernatillu ernisussiortortut amerlanerulinngimmata ernisarfik pisariaqanngitsumik qitiusunngortinneqarpoq, tusagassiutitigut nalunaarummi allassimavoq.
Nakorsat amigaatigineqarnerat matusinermut pissutaavoq, Peqqissutsimut Inunnullu Innarluutilinnut Naalakkersuisoqarfik allappoq.
Sullinneqartut 250-inik amerlanerusut
Naartusut Kujataaniittut Sisimiuniittullu Nuummut erniartortinneqartalissapput. Naartunerli sulisunut naartusunik ikiuisussanut ernititsinerinnaanngilaq. Ernisussiortut Kattuffiat taama allappoq.
- Qaqortumi Sisimiunilu ernisarfiit matuneqarnerat Nuummi ernisut 53-inik amerlanerulernerannik kinguneqaannarani Nuummi ernisussiortunut sullitanik 250-inik amerlanerusunik attaveqarnermik kinguneqarunarpoq, naartusummi tamarmik Nuummut tikinnerminniit erninissaata tungaanut tallimariarlutik attaveqarfigineqartarput.
Tamanna Nuummi ernisussiortunut, misissuisarfinni ulikkaaqqareersuni sulisunut, suli tatitsinerulerpoq.
Ernisussiortunimmi atorfinitsitsiniarneq unallernartuuvoq. Inuttassarsiuussinermi unammillernartoqartuarpoq, akissarsiallu annertussusaat pissutigalugit unammillernarnerulertarami nunani avannarlerni allani atugassarititaasunit appasinneruvoq, Ernisussiortut Kattuffiat allappoq.
Meeqqanut aappariinnermullu sunniuteqartuartoq
Ernisussiortut peqatigiiffiat naapertorlugu erniffissaq nuutinneqaraangat ilaqutariit aningaasaqarnikkut inuttullu atugarisatigut annertuumik eqqugaasarput.
Ilaqutariit meeraqareerunik meeqqamik angalaqatiginissaannut akiliissanerlutik imaluunniit sivisuumik anaanaminnit avissaaqqassanerlutik aalajangertariaqarput, tamannalu meeqqanut aappariinnermullu ataavartumik sunniuteqarsinnaavoq.
- Peqqinnissaqarfimmi aqutsisut Naalakkersuisullu matoqqatitsigallarnerit nalilersorluarnissaat ingerlaannaq aallarteqqullugu siunissamilu aalajangiinerni sulisut aamma naartusunut ilaqutariinnullu inuttut kingunerlutsitsisinnaasut eqqarsaatigalugit aalajangiisoqartarnissaa qulakkeeqqullugu EK-mit kajumissaarutigineqarpoq, Ernisussiortut Kattuffiat naggasiilluni allappoq.
Matumigallarnerit marluk pissutigalugit maanna Nuummi Dronning Ingridip Napparsimmavissuani, Ilulissani Tasiilamilu napparsimmavinni ernisarfeqassaaq.
