KL

DK

Meeqqamut angerlarsimaffimmut $100-mik nassarluni angerlartumut ataataq: Killissamik qaangiineruvoq

Jacob Nordstrøm pingasunik meeraqarpoq. Qitornaasa ilaat aqqanilinnik ukiulik 100 dollarimik Amerikamiunit tunissutisisimalluni ullumi angerlarpoq. Pissusilersuutigineqartoq killissanik qaangiinerujussuuvoq, oqarpoq.

Jakob Nordstrøms ernera 11-nik ukiulik atuarfiup kingorna angerlarpoq 100 dollarseddelimik poortugaqarluni. Tamanna killissarititaasoq qaangerlugu, oqarpoq Jakob Nordstrøm.
KASSAALUK KRISTENSEN
Digitalredaktør
Saqqummersinneqarpoq

Inersimasut meeqqanut ilisarisimanngisaminnut qulit tikillugit ukiulinnut atuarfimmit soraaqqammersunut aningaasanik agguaanerat qanoq isumaqarfigaajuk?

Jacob Nordstrømip ernera aqqanilinik ukiulik 100 dollarinik aningaasaateqarluni marlunngornerup ualinerani angerlarmat tamanna eqqarsaatigineqartariaqalerpoq.

- Ernerma aqqanilinnik ukiullip inersimasumit ilisarisimanngisaminit aningaasanik tunineqarsimanera paasillugu killissanik qaangiisoqarujussuarneranik misinnarpoq.

- Aamma aningaasanik tunineqarnera immiunneqarsimasoq, immiussallu angajoqqaatut akuersiteqqaarata inuit attaveqaqatigiittarfiini siammarterneqartut paasillugu killissanik qaangiineruvoq annertooq, Jacob Nordstrøm Sermitsiamut oqarpoq.

Pakasarneqartutut misigisoq

Canadamiut Amerikamiullu sunniiniartartut Nelk Boys-inik imminnut taasut Nuummi innuttaasunut, inersimasunut, inuusuttunut meeqqanullu Nuup qeqqani aningaasanik nasanillu teqqialinnik agguaasut nittartakkatigut naapittarfinni siammarterneqarput.

Jakob Nordstrømimut, pingasunik qitornalimmut, taama pisoqarnera terlinganiit iliuuseqarfigineqartutut misinnarpoq.

- Pakasarneqartutut misinnarpoq. Inersimasut meeqqanut inuusuttunullu aningaasanik agguaanerat ingasattajaarneruvoq. Killissanik qaangiinerujussuuvoq, oqarpoq.

Paasisat kingulliit naapertorlugit Canadamiut Amerikamiullu sunniiniartartut innuttaasut atsiornernik katersiniarsaraat. Kalaallit Nunaata USA-mut ilanngunnissaa siunertarineqarpoq.

- Atsiornernik katersisunut atsioqataassagaluarpit?

- Naamik, taama ittunut atsioqataanissara kissaatiginngilara. Akerlianilli anguniagalinnut atsiortitsisaqattaartoqaraluarpat atsioqataassagaluarpunga.

Jakob Nordstrømip Kalaallit Nunaata nunanik sanilerisaminik suleqateqarusunnera ajoriffissaqartinngilaa, meeqqamili Amerikamiut inuiaqatigiivini peroriartornissaat pillugu ersarissumik isumaqarpoq:

- Meeqqama Amerikamiut inuiaqatigiivisa akornanni peroriartornissaat kissaatiginngilara. Amerikami meeqqat atuarfiini aallaasersortoqartarmat, piitsoqarfiummat inuiaqatigiinnilu annertuumik naligiinngitsoqarmat meeqqama tamakkua akornanni peroriartornissaat kissaatiginngilara, Sermitsiamut oqarpoq.

Jakob Nordstrømip oqaluttuarisaatut Kalaallit Nunaanni Politiit pisimasoq pillugu nalunaarfigineqarsimapput.

donald trump dollars inuiaqatigiit nuuk samfund

ATORFIIT Se alle jobs

Powered by Labrador CMS