Meeqqanut atuakkanik atorniartarfik skærmerfiujunnaassaaq

Nunarsuarmi digitaliseriileruttorfimmi ulluinnatsinni oqarasuaatit angallattakkat assigisaallu initoorujussuupput, aamma meeqqani. Tamanna Nunatta Atuagaateqarfiata meeqqanut atuagaateqarfiani oqarasuaatit angallattakkat assigisaallu initoorujussuunerat arajutsisimanngilaat.

Atuagaateqarfik naapertorlugu ullut tamaasa meeqqanut atuagaateqarfiup inissaqartitsinera sinnerlugu meerarpassuit aggertarput. Amerlanerpaat wi-fi akeqanngitsoq oqarasuaatinik angallakkanik spillernissamut YouTubernissamullu kisiat atorniarlugu.

Oqarasuaatit angallattakkat assigisaallu eqqissiviilliortitsilertarput

Nunatta Atuagaateqarfiani oqarasuaatit angallattakkat assigisaallu eqqissiviilliortitsilerlutillu nipiliortitsilertartut naammattoorneqartarput. Meeqqat atuakkamik atuarusullutik aggertut toqqissisimanissaannik ajornakusoortitsisartut tusagassiutinut nalunaarummi allapput.

- Ilaatigut ilaqutariit mikisunik meerallit aggeraluarlutik eqqissisimaarfiunngitsoq malugigaangamikku aneqqiinnartartut takusarpagut. Atuarniarnerup ajornakusoornera pissutigalugu atuagaatilerisut arlaleriarlutik qoqernaveeqqutinik peqarnersoq aperineqartarput. Atuagaateqarfimmi atuarsinnaanngikkaanni taava ajortoqarpoq, atuarusulersitsinissamik siuarsaanissamut atuarnermillu kultureqalersitsinissamut iliuuseqartariaqarpugut, atuagaateqarfimmi pisortaq Elisa Petersen oqarpoq.

Mobilerpallaarujussuarneq ersarissumik sinaakkuteqanngitsoq

Meeqqanut atuagaateqarfimmi atuagaatilerisut meeqqat arlallit inersimasuniit malinnaavigineqanngitsut erseqqissumillu sinaakkusersorneqanngitsumik ullut tamaasa tiimerpaalunni oqarasuaatit angallattakkat assigisaasalu saavanni issiasartut misigisaqarfigisarpaat.

- Atuagaateqarfimmi meeqqat sunik isiginnaartarnersut, sunik ingerlatitseqqiisarnersut, aamma nakuusertunut kinguaassiuutitigulluunniit kannguttaatsuliortunut tunngasunik ingerlatitseqqiisarnersut nakkutigisinnaanngila gut. Angajoqqaat meeqqatik internetimik atuinissamut sinaakkusersuilluarnissaannik ikiussagaat Paarisap PiSiullu innersuussutigivaat, aamma meeqqat maani kisimiillutik taamaaliunnginnissaat taperserparput, Elisa Petersen oqarpoq.

Malittarisassaq inersimasunut meeqqanut atuagaateqarfimmiittunut aamma atuuppoq

Meeqqanut atuagaateqarfimmi oqarasuaatinik angallattakkanik assigisaannillu atuinnginnissamik malittarisassat nutaat inersimasunut meeqqanik peqateqartunut aamma atuupput. Nunatta Atuagaateqarfiat meeqqat inersimasullu akunnerminni attaveqatigiilluarnissaannik, inersimasut oqarasuaammik angallattakkamik atuillutik issianissaanninngaanniit meeqqamik atuffassinissaannik tapersersuerusuppoq.

Septembarip aappaanni atuagaateqarfiup ukiuunerani ammasarfinnik atuutsitsilernera

nalerorlugu oqarasuaatinut angallattakkanut assigisaannullu politikki nutaaq atuutilersinneqassaaq. Ullormi tassani saniatigut allanik suliniutinik aamma atuutilersitsisoqassaaq:

1. Meeqqat 4. klasse ataallugit klassillit inersimasumik ilagisaqarlutik meeqqanut atuagaateqarfimmiissinnaalissapput.

2. Atuagaateqarfimmi kikkut tamarmik inissaqartinnissaat qulakkeerniarlugu meeqqariviit atuagaateqarfiliannginnerminni piffissaq sioqqullugu inniminneeqqaartalissapput.