Meeqqat angerlarsimaffiup avataanut inissinneqarsimasut ikileriaratillu amerlerianngitsut
Meeqqat ilaqutariinnut paarsisartunut inissinneqarsimasut amerlassusaat allanngorarujussuanngillat, illoqarfiillu pingaarnersaanni amerlanerpaapput.
2024-p ingerlanerani meeqqat katillugit 539-t ilaqutariinnut paarsisartunut inissinneqarsimapput.
Assi: Leif Josefsen
Meeqqat angerlarsimaffiup avataanut inissinneqarsimasut amerlassusaat ajornartorsiutaasoq ilisimaneqarpoq.
Meeqqat 2022-mi 0-17-it akornanni ukiullit 4,5 procentii angerlarsimaffiup avataanut inissinneqarsimapput, taakkualu affaat sinnerlugit ilaqutariinnut paarsisartunit paarineqarput.
Kommuni aningaasaqarneranut tamanna unammillernarpoq. Kommune Kujallermi borgmesteriusimasup Stine Egedep (IA) kommunip aningaasaqarniarnerliorneranut meeqqat angerlarsimaffimmut inissinneqarsimasut pissutaasut KNR-imut 2024-mi oqaatigaa.
Meeqqalli ilaqutariinni paarsisartuniittut amerlassusaat qanoq isikkoqarpat?
2022-mi meeqqat 398-it ukioq naallugu paaqqutarineqarsimapput. 2024-mi 413-iupput. 2022-mi meeqqat 546-t ilaqutariinnut paarsisartunut inissinneqarsimapput, 2024-mi 539-usut. Tamanna Naatsorsueqqissaartarfiup kisitsisaataani takuneqarsinnaavoq.
Tassa kisitsisit allanngorarpiaratik.
Meeqqat 2022-miit 2024-mut ilaqutariinnut paarsisartunut inissinneqarsimasut ukioq kaajallallugu paarsarineqartut aamma inissiisimanerit amerlassusaat uani takuneqarsinnaapput.
Illoqarfiit pingaarnersaanni amerlanerusut
Meeqqat ilaqutariinnut paarsisartunut inissinneqarsimasut Kommuneqarfik Sermersuumi tupaallannarpallaanngitsumik amerlanerpaapput. 2022-miit 2024-mut meeqqat 18-iinnarnik amerlisimapput, taamaalilluni illoqarfiit pingaarnersaata kommuniani meeqqat 2024-mi angerlarsimaffiup avataanut inissinneqarsimasut kommuninit allanit marloriaammik amerlanerupput.
Kommuneqarfik Sermersuumi innuttaasut 24.229-upput, kommunillu annersaata tulliani Avannaata Kommuniani 10.989-iullutik.
Avannaata Kommuniani 2024-mi meeqqat 55-it angerlarsimaffiup avataanut inissinneqarsimapput Kommuneqarfik Sermersuumilu meeqqat 164-iullutik.
2022-miit 2024-mut kommunini tallimani meeqqanik ilaqutariinnut paarsisartunut inissiisoqarsimaneranit kisitsitsit uani takuneqarsinnaapput.
