IA-P ATAATSIMEERSUARNERA 2024
Meeqqat atuarfianni allannguisoqartariaqarneranik isumaqatigiinneq annertooq
Meeqqat atuarfiannit anisut amerlasuut karakterinik appasissunik ingerlaqqinnissaminnullu atorsinnaanngisaminnik allagartaqarlutik anisarput. Tamanna allanngortinneqartariaqarpoq, taama isumaqarput Inuit Ataqatigiit ataatsimeersuarneranni peqataasut.
Meeqqat atuarfianni naammassisartut ilinniartitaanermut suliffeqarnermullu piareersarnerunissaannut immikkut iliuuseqartoqartariaqartoq ataatsimeersuartut isumaqarput.
Assiliisoq: Leiff Josefsen
Inuit Ataqatigiit ataatsimeersuarneranni ilaasortanit siunnersuuterpassuit suliarineqarneranni piffissakilliorneq malunnarsivoq.
Immikkut annertuumik soqutigineqartoq tassaavoq meeqqat atuarfiat. Apeqqut tassaavoq qanoq iliorluni meeqqat atuarfianni angajulliit atuagarsornikkut inuttullu piginnaasaat pillugit ajornartorsiorneq qanoq aaqqiivigineqarsinnaanersoq.
Ilulissani Inuit Ataqatigiit siunnersuuteqarput meeqqat atuarfiini naammassisussanut ikaarsaariarfittut ukiuni ataatsimi marlunniluunniit angusaminnik pitsanngorsaanissaminnut inuttullu
nakimaannerulernissamut periarfissinneqassasut.
Pineqartoq pillugu annertuumik oqallikkumasoqaraluartoq oqallinneq matuneqajaarpoq
Kisianni partiip politikkikkut siulittaasuata tullia, aamma Naalakkersuisuni ilaasortaasoq atuarfeqarnermut ilinniartitaanermullu naalakkersuisuusoq, Aqqaluaq Biilmann Egede ataatsimeersuartunut nassuiaavoq kommunit suleqatigalugit Naalakkersuisut atuarfinnik suliniutinik annertuunik aallartitsisimasut suliniutillu taakku atuarfimmi ilinniartut pitsaanerusunik karakterisioqqullugit kinguneqassasut, aamma ilinniagaqarnissamut amerlanerusut ingerlaqqissasut.
Taama paasissutissiineq tunngavigalugu ataatsimiinnermi aqutsisup oqallinneq iluamik aallartinngitsoq unitsinneqassasoq siunnersuutigaa, tassa ataatsimeersuaqataasut 20-it missaat oqallisissiaq pillugu oqaaseqarusukkaluartut taamaalilluni oqallinneq aallartiinnaraluarluni matuneqarpoq.
Kisianni oqallinnerup tassunga tunngasup matuneqannginnerani, Inatsisartut siulittaasuat, Mimi Karlsen, aamma meeqqat atuarfianni ilinniartitsisutut sulisimasoq, erseqqissumik tigussaasumillu siunnersuuteqarpoq, tassa meeqqat atuarfianni naammassisut inuttut atuagarsornikkullu angusinngitsoortut tamarmik 10. klasse uteqqissallugu pisussaaffilerneqassasut.
