Meeqqat inuusuttullu angerlarsimaffimmut inissinneqarsimasut ikilisarnissaannut kommuni Naalakkersuisullu ikiorneqassasut
Kommune Kujallermi pinaveersaartitsinermik suliaqarnerup nukittorsarneqarnera meeqqanut inuusuttunullu angerlarsimaffiup avataanut inissinneqarsimasunut ikilisaataassaaq.
- Meeqqat inuusuttullu angerlarsimaffiup avataanut inissinneqarsimasut kommunitta angissusianut naleqqiullugit amerlavallaarput, borgmester Malene Vahl Rasmussen (D) oqarpoq, matumani naalakkersuisoq Mads Pedersen (IA) peqatigaa.
Assi: Naalakkersuisut
Naalakkersuisut Kommune Kujallerlu isumaginninnermut tunngasut pillugit ukiuni marlunni atuuttussamik isumaqatigiissuteqarput.
Isumaqatigiissut maajip 13-ani atsiorneqarsimasoq, tassanilu meeqqat inuusuttullu angerlarsimaffiup avataanut inissinneqarsimasut ikilisarniarlugit ilaqutariinni siusissukkut iliuuseqartarnerup pinaveersaartitsinerullu nukittorsarneqarnissaa pineqartoq Naalakkersuisut tusagassiutitigut nalunaarummi ilisimatitsipput.
Kommune Kujallermi suleqatigiinneq nukittorsarniarlugu isumaqatigiissut Meeqqanut, inuusuttunut ilaqutariinnullu naalakkersuisup Mads Pedersenip (IA) nuannaarutigaa:
- Siusissukkut sulissuteqarnissaq, pinaveersaartitsineqt aammalu meeqqat, inuusuttut ilaqutariillu atugarliortut atugarissaarnerunissaat pingaarnertut pineqarput.
- Meeqqat, inuusuttut ilaqutariillu inuunerminni atugarliortut pillugit suliatigut ilisimasat tunngavigalugit immikkut ilisimasalimmik suliniuteqarnerup siornatigornit annertunerusumik tapersersornissaa qilanaaraara, Mads Pedersen oqarpoq, taannalu suleqatigiinneq pingaarutilimmik eqqortumut alloriarnerusoq isumaqarpoq.
Borgmesteri: Amerlavallaartut inissinneqarsimapput
Suliniummut peqataanissamut toqqarneqarneq kommunimit nuannaarutigineqartoq Kommune Kujallermi borgmesteri Malene Vahl Rasmussen (D) oqarpoq:
- Meeqqat inuusuttullu angerlarsimaffiup avataanut inissinneqarsimasut kommunitta angissusianut naleqqiullugu amerlavallaarput.
- Tamanna inuiaqatigiinni ajornartorsiuterpassuarnik, meeqqanik sumiginnaanermik kinguneqartartunik, unamminiagaqarnitsinnut ersiutaavoq. Tamanna ataatsimoorluta aaqqiivigisariaqarparput, borgmesteri oqarpoq.
Isumaqatigiissut 2025-miit 2026-mut atuuppoq.
