Meeqqat inuusuttullu pillugit ilisimatusarnermut annertuumik aningaasaliisoqartoq
Kalaallit meerartaasa inuusuttaasalu peqqissusaat, atugarissaarnerat inuunermilu atugaat pillugit nutaanik ilisimatusartoqarnissaa millionikkaanik aningaasaliisoqarneratigut qulakkeerneqarpoq
Meeqqat inuusuttullu piffissap ingerlanerani ineriartornerat ilisimatusarnermi misissuiffigineqassaaq.
Assiliisoq: Leiff Josefsen
Meeqqat inuusuttullu atugarissaarnerat pillugu misissuinissamut Danmarks Frie Forskningsfond 6 millionit koruunit sinnerlugit aningaasaliissuteqarpoq.
Kalaallit Nunaanni meeqqat inuusuttullu atugaqaat inuunerannut qanoq sunniuteqarnersut misissuinermi paasiniarneqassaaq ilisimasanullu ilanngutissalluni.
Paasissutissat peqqinnissaqarfimmit, kommuninit, politiinit meeqqallu angajoqqaavinit pissarsiarineqartut tunngavigalugit misissuisoqassaaq. Tassa nalunaarsuinerit aallaavigineqassallutik.
Inuiaat kalaallit peqqissusaannik misissuiviup Syddansk Universitetip ataaniittoq taama ilisimatitsivoq.
Siornatigut suliarineqarsimanngitsoq
- Kalaallit meerarpassuit atugarliuuteqarlutik peroriartorsimapput, maannakkulli meeqqat inuusuttullu 0-18-it akornanni ukiullit qanoq atugaqarnersut nuna tamakkerlugu misissuisoqarsimanngilaq, misissuisarfik tusagassiuutinut nalunaarummi allappoq.
Ilisimatusarfimmi tassani ilisimatusarnermut pilersaarusiornermullu pisortap, professor Christina Viskum Lytken Larsenip, aningaasarpassuit iluaqutigalugit misissuinerup ingerlanneqarsinnaanera nuannaarutigaa:
- Aningaasaliissuteqarneq nuannaarutigeqaarput. Neriuutigalugulu paasissutissat tutsuiginartut atorlugit Kalaallit Nunaanni meeqqat atugaasa pitsanngorsarneqarnissaat pillugu suliniutigineqareersut tapersersorsinnaallugit, Christina Viskum Lytken Larsen oqarpoq. Taanna aamma Ilisimatusarfimmi ilisimatusartuuneruvoq.
Meeqqat inuusuttullu piffissap ingerlanerani ineriartornerat misissorneqassaaq. Meeqqat peroriartorneranni suut peqqutaallutik peqqinnartumik inuuneqalernerannik sunniuteqarnersut ilisimatusartut paasissallugu neriuutigaat.
