Meeqqat maanna kinaassutsiminnik isertuussillutik chatikkut siunnersorneqarsinnaalerput
Oqarasuaatikkut ikiuisarfik Tusaannga tallimanngornermi meeqqanut inuusuttunullu siunnerfilimmik qarasaasiakkut periarfissamik ammaavoq.
Assiliisoq: Leiff Josefsen
Ullumi oqarasuaatikkut ikiuisarfik Tusaannga qarasaasiakkut meeqqanut inuusuttunullu siunnersuisarnermi periarfissamik nutaamik ammaavoq.
Oqarasuaatikkut, chatikkut, sms-ikkuulluunniit meeqqanik allanik oqaloqateqarusukkunik, kiserliorneq imminullu toqunnissamut eqqarsaatit pillugit atuagaqarusukkunik, maanna taakku nittartakkakkut quppernermi ikiuiffimmi Tusaannga.gl-mi pisinnaanngorput.
Nittartakkakkut qupperneq Børns Vilkår suleqatigalugu piviusunngortinneqartoq, Naalakkersuisut tallimanngornermi ullaakkut tusagassiuutinut nalunaarumminni allapput.
Neqeroorut Kalaallit Nunaata avataani atorneqarsinnaavoq
Manna tikillugu meeqqat sianerlutilluunniit sms-imik nassiussisinnaasarsimapput, maannali chati atorlugu periarfissaqalerpoq. Taassuma oqarasuaatip normua atornagu saaffiginnissinnaaneq iluaqutigaa, taamatullu aamma meeqqanut inuusuttunullu Kalaallit Nunaata avataaniittunut siunnersuineq pisinnaanngorpoq.
Naalakkersuisup Aqqaluaq B. Egedep (IA) nittartakkakkut qupperneq nutaaq taanna meeqqanik inuussuttunillu taakku ulluinnarni ilungersunartunik nalaataannik ikiorsiineruniarluni sulinermi angusaq pingaaruteqartoq oqaatigaa.
- Tusaanngap nammineq misissuinerini Qamanilu nalunaarummi meeqqat inuussuttullu amerlanertigut ukioqatitik ajornartorsiutitik pillugit oqaloqatigerusunnerusaraat takuarput, tamannalu maanna Tusaannga.gl-ikkut periarfissanngorpoq, Meeqqanut, Inuusuttunut, Ilinniartitaanermut, Kulturimut, Timersornermut Ilageeqarnermullu Naalakkersuisoq Aqqaluaq B. Egede oqarpoq, imalu nangilluni:
Suleqatigisaq pingaarutilik
- Tusaannga ulluinnarni ilungersuutinik sunilluunniit ikiorsiiffiusoq meeqqanut inuusuttunullu takutikkusupparput – assersuutigalugu asannilersoorneq timilluunniit ineriartornera pillugu apeqqutinut.
Naalakkersuisut naapertorlugit Børns Vilkår nittartakkakkut quppernerup ingeriartortinneqarnerani pingaarutilittut suleqataavoq, tamatumanilu ikiuiniaqatigiiffiup Danmarkimi BørneTelefonenimik ingerlatsinermik ukiuni 40-ni misilittagaqarnera patsisaavoq.
Børns Vilkårittaaq Tusaannga suliniutip piviusunngortinnissaanut aningaasaateqarfiit assigiinngitsut aqqutigalugit suliniummut aningaasassarsiornermut ikiuivoq.
Nittartakkakkut qupperneq nutaaq uani takusinnaavat.
