Meeqqat oqaaseqartartuata ‘oqallinnerup annikinnera’ ernummatigaa
Inatsisartut upernaakkut ataatsimiinneranni oqaluuserisassani meeqqanut attuumassusillit marluk
peerneqarsimanerat Meeqqat Oqaaseqartartuata ernummatigaa. Politikkerit meeqqat pillugit ukkatarinninngippallaartut taanna isumaqarpoq.
- Inuiaqatigiittut meeqqat pisinnaatitaaffiisa malinneqarnissaat pisussaaffigaarput, Inatsisartullu sinaakkutit pilersinneqarnissaat akisussaaffigaat, Meeqqat oqaaseartartuat Aviâja Egede Lynge oqarpoq.
Toqqorsivimmit assiliisoq: Assiliisoq: Leiff Josefsen
Meeqqat oqaaseqartartuat Aviâja Egede Lynge Meeqqat Ulluannut atatillugu politikerinut isornartorsiuivoq.
Inatsisartut upernaakkut ataatsimiinneranni naammasseqqammersumi meeqqat pillugit oqaluuserisassat marluk peerneqarsimanerat taassumma ernumanartoqartippaa.
Tamanna isornartorsiortariaqarnerarpaa:
- Politikkitigut sulinermut atatillugu inatsisiliornermi meeqqat inuusuttullu salliunneqannginneri akuerineqarsinnaanngilaq.
- Inuiaqatigiittut meeqqat pisinnaatitaaffiisa malinneqarnissaat pisussaaffigaarput, Inatsisartullu sinaakkutit pilersinneqarnissaat akisussaaffigaat, Aviâja Egede Lynge tusagassiuutinut nalunaarummi allappoq.
- Ernumanartoq
Taanna isumaqarpoq meeqqanut tunngasut ataatsimiinnermi suli annikitsuararsuusoq:
- Meeqqat pillugit oqaluuserisassat annikereertigisut, suli piianerat ernumanartitsivoq, suunukua salliunneqartut?, Aviâja Egede Lynge aperaaq.
Oqaluuserisassani peerneqartuni siulleq siusissukkut iliuuseqarnermut attuumassuteqarpoq, tassani tunngaviusumik ujartuinikkut periuseqarnissaq kiisalu pinaveersaartitsinissaq aallaavigalugu oqallittoqartussaagaluarluni. Aappaannilu ulloq unnuarlu angerlarsimaffiit perorsaanermilu periutsit sorliit Kalaallit Nunaannut naleqquttuunersut oqaluuserineqartussaagaluartut Meeqqat Oqaaseqartartuata paasissutissiissutigaa.
Taassuma saniatigut apeqquteqaat aallaavigalugu oqallisissiaq 'Inatsisartut suliniutit suut suliniutigisinnaaneraat angajoqqaajunerup akisussaaffiullu pitsaanerulersinnissaanut aqqutissiuussisinnaaneq angajoqqaat amerlanerit namminneq meeqqaminnut isumaginnissinnaanerisa qaffassarnissaannut taamaaliornikkullu angerlarsimaffiup avataanut inissiinerit ikilisarlugit' ukiarumut kinguartinneqarpoq.
Naalakkersuisoq: Suli angusassarpassuaqarpugut
Naalakkersuisoq Aqqaluaq B. Egede (IA) Meeqqat ulluannut atatillugu tusagassiuutinut nalunaaruteqarpoq.
Taassuma Meeqqat Oqaaseqartartut toqqaannartumik akinngilaa, inuiaqatigiilli meeqqat pillugit iliuuseqarnerat tulluusimaarutigineqartariaqartoq, aammali ajornartorsiutit aaqqinneqarnissaat eqqarsaatigalugus uli angusassarpassuaqartoq nassuerutigaa:
- Iliuusissatut pilersaarutit suliniutillu aallartinneqareersut tamarmik, aamma siusissukkut suliniuteqarneq aamma ujartuilluni sulineq massakkut annertuumik ukkatarineqarluartoq eqqarsaatigissagutsigit uagut inuiaqatigiittut eqqaamassavarput angusagut tulluusimaarutigissallugit, puigornagulu suli angusassarpassuaqarnerput.
- Meeqqatta toqqissisimanartumiinnissaat aamma pisariaqartitaattut isumassorneqarnissaat, tapersersorneqarnissaat asanninnermillu tuniorarneqarnissaat ataatsimoorluta qulakkiissavarput, naalakkersuisoq oqarpoq, taassuma meeqqat sumiginnarneqartarnerat, qinngasaarneqartarnerat, perlilerlutik innartitaasarnerat, kinguaassiuutitigut atornerlunneqartarnerat nakuuserfigineqartarnerallu suli ajornartorsiutaasut ilanngullugit aamma eeqqaavai.
