Meeqqat Ulluanni imigassat matoqqassapput
Meeqqat Ulluanni Nanortalimmi nunaqarfiinilu innuttaasut imigassarsisinnaassanngillat. Taama Nanortalimmi Najukkami ataatsimiititaliaq, Pilersuisoq Brugsenilu suleqatigiillutik aalajangerput. Kommune Kujallermi Nanortalimmi Najukkami ataatsimiitaliaq kujataani pisiniarfinnut Meeqqat Ulluani imigassanik tuniniaasoqannginnissaanik piumasaqarpoq, tamannalu Kujataani pisiniarfiit illoqarfinni nunaqarfinnilu tamarmik ilalerpaat.
Leiff Josefsen
Pilersuisoqarfiit Aappilattoq, Narsarmijit, Tasiusaq, Nanortalik, Qassimiut, Ammassivik, Alluitsup Paa, Saarloq, Eqalugaarsuit, Igaliku, Narsarsuaq, Qassiarsuk, Narsaq aamma Qaqortoq juunip aallaqqaataani, Meeqqat Ulluanni imigassanik tuniniaaffiussanngillat.
Nanortalimmi Najukkami ataatsimiititaliaq Meeqqat Ulluanni imigassanik tuniniaasoqannginnissaanik noqqaassuteqareersorlu Pilersuisoq Brugsenilu suleqataaniarlutik ilaliipput.
- Apriili naalersoq saaffigineqarpugut peqataasinnaannginnersugut, Pilersuisumit akuerinikuuarput suliniut pitsaasutut isigigatsigu, meeqqanullu tamanut tunngasuummat tapersersorlugu, Pilersuisumi sumiiffimmi pisortaq, Henriette Josefsen Sermitsiamut oqarpoq.
- Meeqqat Ulluat nuna tamakkerlugu juunip aallaqqaataani ukiut tamaasa malunnartinneqartarpoq. Nanortalimmi Najukkami ataatsimiititaliap meeqqat meeqqallu pisinnaatitaaffii ukkatarerusullugit ulloq taanna imigassat matoqqanissaanik noqqaassuteqarpoq.
Nanortalimmi Brugseni aamma imigassat matoqqassapput.
