Meeqqat ulluat qalipaatigissaartunik 'qaartartunik' nalliuttorsiutigineqarpoq
Meeqqat ulluat malunnartinniarlugu meeqqat ColorRun-imik taaguuserlugu arpatsinneqarput.
Sisimiuni Nalunnguarfiup Atuarfiani meeqqat ulluat tallimanngornermi qalipaatigissaartumik nalliussineqarpoq.
Assiliisoq: DORTHEIVALO JENSEN
Juunip aallaqqaataa meeqqat ulluaraat, taamaakkaluartoq atuarfiit arlallit malunnartereerpaat.
PAASISSUTISSAT: Color Run pillugu
NAKUUSA-mit 2022-imiilli Meeqqat ulluat meeqqat atuarfiini atuartunik arpatitsinermik (ColorRun) nalluissineqartarpoq.
Atuarfiit qajuusaasianik qalipaatilinnik, balloninik atortussanillu allanik nassinneqartarput. Taakku atorlugit ulloq namminneq nalliussisarpaat.
Ukioq manna colorrun Meeqqallu Ulluat Royal Arctic Linemit Isumaginninnermullu Aqutsisoqarfimmi Inuunerittamut aningaasaliissutinit aningaasaliiffigineqarpoq.
Paasissutissat: UNICEF
Nalunnguarfiup atuarfiani Sisimiuniittumi juunip aallaqqaataa sioqqullugu meeqqat ulluat aamma malunnartinneqarpoq. Atuartut assigiinngitsunik sammisaqartinneqarput, ilaatigut nakuusaaqqat namminneq aaqqissugaannik Asanninnerup aqqutaatigut ingerlaaqatigiipput, atuarfimmi assigiinngitsunik sammisaqarput, pandekagetorput, ullup qeqqanullu pølsituullutik.
Anitsartarfimmi qajuusaasanik qalipaatigissunik milloorisoqartoq atuarfik Sermitsiamut paasissutissiivoq.
Akunnerup qeqqataani qalipaasersortoqarpoq pulverimik, atuarfik Sermitsiamut nalunaarpoq.
UNICEF aamma NAKUUSA taakkuupput nunami tamarmi atuarfinnut qajuusaasanik qalipaatigissunik agguaassisut.
Nalunnguarfiup Atuarfiani qalipaatinik qaartartumeerisut.
Assiliisoq: DORTHEIVALO JENSEN
Nuna tamakkerlugu meeqqat 4.461-it ColorRunimut nalliuttorsiorpalaarlunilu qalipaatigissaaqisumut peqataasut kattuffiup tusagassiutinut nalunaarutigaa.
NAKUUSA-p UNICEF-illu ukioq manna pinnguarnermik sunngiffimmilu pitsaasunik sammisaqarnermik ukkassinissaanni nuna tamakkerlugu meeqqat peqataassapput, aamma klassini atuartunik ”Silarsuarmi pinnguaatit nuannernersaat” qulequtsiullugu filmiliaminnik assilisaminnilluunniit NAKUUSA-mut nassiussinerisigut unammisitsipput.
- Pinnguarneq, meeqqat eqqarsartaatsikkut ineriartornerannik, unammilligassanut aaqqiissuteqarsinnaanerannik isumassarsiullaqqissusaannillu inerisaasarpoq. Pinnguarneq aqqutigalugu, misigissutsinik oqaatiginnissinnaaneq, misigittassuseqarneq inoqatinullu attaveqarneq, meeqqat ilinniartarpaat, UNICEF-ip Kalaallit Nunaanni allaffeqarfiani suliniutinut pisortaq Tina Dam oqarpoq.
Peqataasut akornanni makitsisoqassaaq, aningaasallu klassefesternissamut atugassanik 2.500 koruunit eqqorneqassallutik. Eqquisut juunip aqqarnanni ”International Day of Play”eqqorlugu, nuna tamakkerlugu meeqqanut tamanut silarsuarmi pinnguaatit nuannernersaattut isumassarsiassat tamakkerlugit NAKUUSA-mit tamanut saqqummiunneqarfiat ilutigalugu - saqqummiunneqassaaq.
Naalakkersuisoq: Meeqqat tamaasa inissaqartissavagut
Naalakkersuisup Aqqaluaq B. Egedep (IA) meeqqat ulluannut atatillugu meeqqat tamarmik inissaqartinneqassasut oqariartuutigaa:
- Meeqqat toqqissisimanartumik avatangiiseqarlutik peroriartorsimagaluarpata imaluunniit artornarnerpaamik atugaqaraluarpata meeqqanik tamanik inissaqartitsinissarput tamatsinnut atuuppoq.
- Sapinngisamik siusinnerpaamik peqataatitsinerpaamillu pitsaasumik toqqissisimanartumillu perorsaanissamik qulakkeerinnissinnaasunik sinaakkutinik toqqissisimanartunik pilersitsinissamut ilaqutariinnik isumassuisunillu ikiuillutalu tapersersuissaagut, Aqqaluaq B. Egede tusagassiuutinut nalunaarummi allappoq.
Tamanna suliassatut pingaarnertut sulianik suliarinnittarnermik siunnerfeqarnikkut anguneqassasoq, aamma inissiisarnernik pinaveersaartitsisumik toqqissisimasumillu peroriartortitsinissamik aamma ilaqutariit inuuneqarnissaannik tapersersuisunik piffissaagallartillugu ikiuinissamut isumalluutinik amerlanngitsunik pingaartitsinikkut pissasoq ilanngullugu oqaatigaa.
- Eqqaamallugu siunissami meeqqat pingaarnertut sakkussarigatsigit, naalakkersuisoq meeqqanik tamanik pilluaqqusisoq oqarpoq.
