Meeqqat ulluat sapaatiuppat Nuummi Illorsuaq Timersortarfimmi nalliussineqassaaq
Meeqqat ulluat Nuummi meeqqanut malunnartinniarlugu sapaatiuppat eqaarsaartoqarluni, arsartoqarlunilu qitittoqassaaq. Sineriammi atuarfiit ataasinngornermi sammisaqartitsissapput.
Meeqqat Ulluat arpannermik Color Runimik taaneqartartumik ukiut tamaasa nalliussineqartarpoq.
Assi: DORTHEIVALO JENSEN
UNICEF/NAKUUSA Meeqqat Ulluanni Nuummi Illorsuaq Timersortarfimmi sapaammi juunip aallaqqaataani nuannersunik pissanganartunillu sammisassaqartitsissaaq.
Tamanna nalunaaqutaq 10-14-imi pissaaq, ilaatigullu pinnatassartalimmik arpatsitsisoqassaaq, meeqqallu Pinngortitap Paarsui assiliseqatigisinnaassavaat.
Aamma Nuuk Gymnastik eqaarsaartitsillunilu TAAK – Kalaallit Nunaanni Assammik Arsartartut Kattuffiat - arsartitsissaaq.
UNICEF tusagassiutitigut nalunaarummi allappoq.
- Suleqativut pikkorssut peqatigalugit meeqqat pisinnaatitaaffiinik aamma peqqinnartunik sunngiffimmi sammisaqartitsinermik ukkatarinninnissamut qilanaarpugut, Kalaallit Nunaanni UNICEF-imi sammisaqartitsinermut pisortaq Tina Dam oqarpoq.
UNICEF/NAKUUSA-p Meeqqat Ulluat malunnartinniarlugu NuQi Dance, TAAK, Nuuk Gymnastik, Nuuk Karate, pillorissaasut aamma timimik sungiusaasut suleqatigiit, Paarisa, Kalaallit Nunaanni Politiit Tamattaasalu peqatigalugit aaqqissuussivoq.
Meeqqat Nuummi atuarfinni arlalini sineriattalu sinnerani atuartut arpannermut nuannersumut qalipaatigissaartumullu Color Runimut peqataasarput.
MEEQQAT ULLUAANNUT ANINGAASALIISUT
Nuummi Illorsuarmi Timersortarfimmi Meeqqat Ulluannik aaqqissuussinermut Nuummi Najukkami Ataatsimiititaliaq, Sermeq Puljen, Modulo, Illit Forsikring, Inu:It, Royal Arctic Line, Kylling & Co, Iggu, Greenland Airports, Brugseni aamma Pinngortitamut Avatangiisinullu Naalakkersuisoqarfik aningaasaleeqataapput.
NAKUUSA-p Meeqqat Ulluanni nunarput tamakkerlugu aaqqissuussinini tapersersorneqarluartoq maluginiarpaa. Taakkua Inuunerrittap aningaasaateqarfianit, Nuummi Najukkami Ataatsimiititaliamit, Tasiilami Najukkami Ataatsimiititaliamit, Kulusummi Najukkami Ataatsimiititaliamit, Kuummiini Najukkami Ataatsimiititaliamit kiisalu Royal Arctic Linemit atortunik akeqanngitsumik assartuinikkut aningaasanik ukioq manna aamma tapiiffigineqaqqipput.
Nuna tamakkerlugu nalliuttorsiorneq
Meeqqat Ulluat Nuummiinnaanngitsoq nalliussineqassaaq. Meeqqat 3.800-t nun3a tamakkerlugu atuarfinni 35-ni atuartut Meeqqat Ulluat qalipaatigissaartunik nuannallutik, ataatsimoorlutik meeqqallu pisinnaatitaaffii sammillugit ataasinngornermi juunip aappaanni nalliussissavaat.
Arpannerup Color Runip saniatigut Meeqqat Pisinnaatitaaffii pillugit Isumaqatigiissummi meeqqat pisinnaatitaaffiini nuannarinerpaasartik ujaqqanut qalipaassinnaassavaat.
- Meeqqat - imminut akunnerminnilu illersorsinnaajumallutik - pisinnaatitaaffimminnik ilisimasaqarnissaat pingaaruteqarpoq. Meeqqat qanorluunniit ukiullit pisinnaatitaaffiinik ujaqqanut qalipaanikkut ersarissumik paasitikkumavagut. Ilinniartitsineq kisimi pineqanngilaq - aammali meeqqat ullorsioqatiginissaat pingaaruteqarpoq, Tina Dam oqarpoq.
NAKUUSA, UNICEF-ip Kalaallit Nunaanni suliniutaa, suliniuteqarnermi aaqqissuisuusoq peqataasunut atortussanik nassiussisimavoq: meeqqat namminneq najukkami nalliuttorsiornermut sunniuteqarsinnaaniassammata qalipaatit, ballonit, nipitittakkat tushillu. Atuarfiit ingerlaarfissat sammisassallu namminneq aalajangissavaat.
