Meeraq angerlarsimaffimmut akuerisaanngitsumut inissinneqarsimasoq

Meeraq maannakkorpiaq Sisimiuni ulloq unnuarlu angerlarsimaffittut akuerisaanngitsumi Qinngornermi Sisimiuni inissisimatinneqarpoq. 

MAPIp pappiaraataani atuarneqarsinnaavoq Nakkutilliinermik Ingerlatsiviup paasissutissiissutigigaa Isumaginninnermut Aqutsisoqarfiup Qinngornerup meeqqanut inuusuttuaqqanullu angerlarsimaffittut atuutilernissamut qinnuteqaataa itigartitsissutigisimagaa.

Tamanna tunngavigalugu Isumaginninnermut Aqutsisoqarfik kommuninut tamanut nalunaaruteqarpoq Qinngorneq meeqqanik tigusisinnaanissaminut akuersissuteqanngitsoq.

Kommuni aaqqiissutissaminik suliaqarpoq

Naak akuersisimannginneq pillugu nalunaaruteqartoqareeraluartoq Avannaata Kommunia meeqqamik ataatsimik Qinngornermi inisimasuuteqarpoq.

Avannaata Kommuniani Ilaqutareeqarnermut Ingerlatsivimmi pisortap nassuiaatigaa inatsit tunngavigalugu angajoqqaatut oqartussaassuseqartoq kommunimut allamut nuussimammat, kommunimi nuuffiusumi suliaq tiguneqartartoq, taamaattumillu meeraq ataaseq Qinngornermi inissisimasuutigigallarlugu. Meeraq kommunimit allamit inissitaavoq.

- Taanna aaqqiiviginiarlugu suliaq aallartinnikuuarput, pisortaq paasissutissiivoq.

Kalaallit Nunaanni Isumaginninnermi Aqutsisoqarfik kiisalu Qinngornermi pisortaasut marluk suliamut tunngatillugu oqaaseqartinniarlugit Sermitsiap sulissutigaa. Tassani paasiniarparput ulloq unnuarlu angerlarsimaffittut akuerisaanngitsoq sooq atorneqarnersoq.

Qinngornermik piginnittut: - Ukiut sisamassaa ingerlavoq utaqqilluta

Qinngornermik piginnittut Sermitsiamit saaffigineqaramik utaqqineq sivisoqisoq oqaatigaat:

-  Tassa nunatsinni namminersortunngorniarneq taama ajornartigaaq. Ukiut sisamassaa ingerlavoq utaqqilluta, ilungersuutigisimaqaarput akuerisanngorniarluta, tupinnaannartumik aporfissaaleqisimanngeqaagut piumasaqaaterpassuit namminersortunngorniarluni amerlangaarmata, Emilie Olsen Qinngornermi pisortaasoq oqarpoq.

Taassuma ilanngullugu oqaatigaa suliniummik aallartitsisinnaatitaallutik. Neriuutigalugulu piffissami qaninnerpaami akuerisaanissamut piumasaqaatit tamaasa naammassisinnaassallugit.

Isumaginnittoqarfik: - Kommunit meeqqanik angerlarsimaffimmut inissiinissaq pillugu aalajangiisarput

Isumaginninnermut Aqutsisoqarfiup uppernarsarpaa Qinngorneq ulloq unnuarlu paaqqinnittarfittut akuerisaanngitsutut maannakkut inissisimasoq, kommunillu tamarmik meeqqat inuusuttullu ulloq unnuarlu angrlarsimaffinnut akuerisaanngitsunut inissinneqaqqunagit ilisimatinneqarsimasut.

Isumaginninnermut Aqutsisoqarfik oqaaseqaammi erseqqissaavoq inissiisarnerit kommunalbestyrelsinit kisimi aalajangiiffigineqarsinnaasut, aamma Isumaginninnermut Aqutsisoqarfik Kalaallit Nunaanni inissiisarfinnut tamanut nakkutilliisuunngitsoq:

- Pingaaruteqarluinnarpoq erseqqissassallugu inissiisarnerit pillugit aalajangiinerit kommunalbestyrelsinit kisimi aalajangiiffigineqarsinnaammata. Isumaginninnermut Aqutsisoqarfik nakkutilliisuunngilaq taamaattumillu Kalaallit Nunaanni inissiisarfiit tamaasa nakkutigisinnaanagit.

- Tamatuma saniatigut erseqqissarusupparput pisariaqartillugu pilersaarusiorlunilu inissiisarnerit immikkoortinnissaat qanoq pingaaruteqartigisoq.