KL

DK

Mette Frederiksenip Kalaallit Nunaat pillugu Trump oqaloqatigivaa

Oqarasuaatikkut 45 minutsinik sivisussusilimmik Mette Frederiksenip Donald Trump oqaloqatiginerani erseqqissaaffigaa Kalaallit Nunaat nammineq aalajangersaasartoq.

Ritzaus Bureau
Saqqummersinneqarpoq

Piffissami kingullermi USA-p Kalaallit Nunaannut soqutiginninneranut tunngasumik nunarsuarmi pissutsit allanngoriartornerat pillugu ministeriuneq Mette Frederiksen (S) maanna Amerikami præsidentinngortussaq, Donald Trump, oqaloqatigeeqqammerput.

Tamanna pivoq pingasunngornermi januaarip 15-iani 45 minutsinik sivisussusilimmik oqarasuaatikkut oqaloqatigiinnermi.

Statsministeriaqarfiup tusagassiorfinnut nalunaarutaani tamanna oqaatigineqarpoq.

Oqaloqatigiinnermi ilaatigut Issittumi isumannaallisaaneq pillugu sammineqarpoq.

- Ministeriunerup oqaloqatigiinnermi Issittumi isumannaallisaanerup nukittorsarneqarnissaa pingaartillugu saqqummiuppaa, aammalu Kunngeqarfik Danmarkip suliassaq taanna annertusassallugu akisussaaffiginnittutut piareersimasoq, Statsministeriaqarfimmit tusagassiorfinnut nalunaarummi tamanna erseqqissaatigineqarpoq.

Naalakkersuisut innersuussutigai

Aamma Kalaallit Nunaat pillugu apeqqut eqqartorneqarpoq, tassanilu Mette Frederiksenip, Statsministeriaqarfiup nalunaarutaa naapertorlugu, kalaallit namminneq sunniuteqarnerat erseqqissaatigisimagaa.

- Ministeriunerup oqaloqatigiinnermi innersuussutigaa Naalakkersuisut siulittaasuata, Múte B. Egedep, oqaasii, tassa Kalaallit Nunaat tuniniarneqarsinnaanngitsoq, ministeriunerullu oqaatigaa Kalaallit Nunaata nammineq aalajangissagaa namminersulernissaminut, nalunaarummi oqaatigineqarpoq.

Oqaloqatigiinneq pivoq Donald Trumpip Kalaallit Nunaat amerikamiunit pigineqalernissaa kissaatigalugu oqaaseqareersorlu.

Trumpip oqaasinnaarivaa USA "nunarujussuanngorteqqinneqassasoq nukittooq" -  oqaaseqatigiit taakku atorlugit Amerikap nukittoorsuanngorteqqinnissaanik oqaasinnaarivaa suliniaqatigiiffinngortinnikuullugulu.

Aammattaaq Donald Trumpip tusagassiortunik katersortitsinermi erseqqissaatiginikuuaa nammineq neriorsuutigisinnaanagu sakkulersorneq aningaasaqarnikkullu pinngitsaaliineq atussanagu.

Oqaloqatigiinneq nanginniarlugu isumaqatigiittut

Suliap Danmarkimi naalakkersuisut partiit siulittaasuinik aggersaanermik malitseqarpoq sapaatip akunnerata siuliani, tassanilu danskit naalakkersuisuisa diplomatiskimik iliuusaat matoqqasumik saqqummiunneqarput.

Tassunga tunngatillugu Mette Frederiksenip oqaatiginikuuaa Trumpimut attaveqartoqarsimasoq oqaloqatiginninnissamik siunertaqarluni.

Ministeriunerup naatsorsuutigisimanngikkaluarpaa Donald Trumpimit akineqarnissani, januaarip 20-ani præsidentinngoreernera sioqqullugu.

Oqarasuaatikkut sianerneq taamaattumik naatsorsuutigineqartumit sukkanerusumik pivoq.

Oqarasuaatikkut oqaloqatigiinnermi Mette Frederiksenip aamma Donald Trump oqaloqatigisimavaa "danskit suliffeqarfiutaasa USA-mi ineriartortitsinermut suliffissanillu pilersitsinermut tapertaasartut, kiisalu EU-p USA-llu niueqatigiinnerup nukittorsarnissaanut soqutigisaqaqatigiittut."

Aammattaaq Ukrainemi sorsunneq, Kangiani Qiterlermi pissutsit Kinamullu tunngatillugu oqaluuserineqarsimasut oqaatigineqarpoq.

Ministeriuneqarfik naqissusiivoq ministeriunerup præsidentinngortussallu oqaloqatigiinnermik nanginnissaa isumaqatigiissutigisimagaat.

/ritzau/

inuiaqatigiit samfund

ATORFIIT Se alle jobs

Powered by Labrador CMS