Mikisuluk Karlsen aamma Inalliaq Ludvigsen saarlerpaallutik naasunik tunniussisut

Kunngikkormiut ataasinngormat Nunatsinnut tikeraarnerminnut atatillugu Attumut tikeraarmata tikilluaqqusaalluarput. Nunaqarfimmiut 200-t missaanniittut ilarpassui kunngi Frederik dronning Marylu tikilluaqquniarlugit umiarsualivimmi katersuupput.

Siullermik Mikisuluk Karlsen aamma Inalliaq Ludvigsen arfineq-pingasunik ukiullit, ullormut tamatumunnga atatillugu kalaallisoortut, kunngikkormiunut naasunik tunniussisuupput.

Kunngikkormiut Attumi tikeraarneranni ataatsimut isigalugu meeqqat sammineqarput. Atuarfimmut meeqqerivimmullu pulaarput, tassanilu Attumi innuttaasunit nukarlerpaanit ilassineqarput. Ullaap tungaani aamma oqaluffimmukarput, tassanilu biskopip Paneeraq Siegstadip kunngikkormiut angalaaruppai.

Aamma Attup ukiunik 200-nngortorsiorluni nalliuttorsiorneranut atatillugu eqqaassutissaq kunngi Frederiup atoqqaarfissiortippaa, eqqaassutissarlu nunaqarfimmi aqutsisumit Per Ole Frederiksenimit saqqummiunneqarpoq.

Inuit qilanaarsimaqaat

Ukiut 50-it matuma siorna Attu kingullermik kunngikkormiunit tikeraarneqarsimavoq, nunaqarfimmilu innuttaasut kunngikkormiunik tikeraartoqarnissartik qilanaarisimavaat, Ole L. Frederiksen, Siumut sinnerlugu Qeqertalimmi kommunalbestyrelsimut ilaasortaq, 2003-mili Attumi najugaqartoq, oqaluttuarpoq.

- Tikeraaraangata pisoq annertusarpoq. Inuit qilanaarnikuupput, tamanna malugineqarsinnaasimavoq. Pissanganikuupput.

- Maani allannguineq misigalugu pissanganarlunilu nuanneqaaq. Ullummi tamaasa taamaattunik tikeraartoqarneq ajorpoq. Attumi pisoqartarpoq, kisianni taama annertutiginngitsumik, Ole L. Frederiksen oqarpoq.

Kunngikkormiut tikeraarnerat Attup pingaaruteqassusianik ersersitsivoq.

- Silarsuarmut ilaasutut misigineq. Silarsuarmut ilaavugut, tamannalu ullumikkut misigissallugu qilanaarisimavarput.

Oqaluttuaq uteqqittoq

Katersortarfimmi kaffillertoqarnerani kunngikkormiut tunissutinik tunineqarput: Kunngi Frederik aarrup niaquanik, Attumeersumit Jens Abrahamsenimit pisarineqarsimasumit qiperukkamillu tunineqarpoq, dronning Marylu umimmaap qiviuanit qungaseqummik tunineqarpoq.

- Dronning Magrethe kingullermik tikeraarmat Jens Abrahamsenip angajoqqaavisa tunivaat, taamaammat oqarsinnaavugut oqaluttuaq uteqqittoq, kunngi tunissummik tunineqarmat Ole L. Frederiksen oqarpoq.

Qeqertalimmi borgmesteri Ane Hansen aamma Attumiippoq, soorluttaaq Aasianniillunilu Qeqertarsuarmiissimasoq.

- Kunngikkormiutut tikeraarnerat siulleq immikkuullarilluinnartuuvoq, inuillu pissangasimaqaat nuannaarlutillu. Ornittagaanni inunnik katersuutsitsisarnerat ersarippoq, Ane Hansen oqarpoq.

Aqagu kunngikkormiut umiarsuaat Dannebrog atorlugu kunngikkormiut Sisimiunut tikissapput.