Mimi Karlsen kajumissaarisoq: Ataqqinnittumik oqallisigitsi
Ukiaanerani ataatsimeereernerup kingorna ataqqinnittumik oqallittoqartaqqullugu Inatsisartut siulittaasuata Mimi Karlsenip Inatsisartuni politikerit kajumissaarpai, taassuma “Inatsisartut oqaluttarfianni oqallinnerit akuttunngitsumik qaffaanneqalaartaraluartutut” oqaatigaa.
Inatsisartut siulittaasuata Mimi Karlsenip (IA) Inatsisartuni politikerit ukiaanerani ataatsimiinnerup kingorna “oqallinnerit sakkortusinnaasarmata” ataqqinnittumik oqallittoqartaqqullugu kajumissaarpai.
Arktisk assiliisoq: Leiff Josefsen
Ukiakkut ataatsimiinnerup immikkoortua siulleq naammassivoq, maannalu siulittaasoqarfiup ataatsimiinnerup immikkoortuata aappaa piareersarpaa, taannalu februaarip pingajuanni aallartissaaq.
Siulittaasoqarfiup tusagassiutinut nalunaaruteqarluni ataatsimiinnerup aaqqissuussaanera nutaaq suliassanik oqaluuserineqartunik itisiliinissamut piffissaqartitsinerulersimasoq ataatsimiititaliallu sulinerannik eqqissisimanarnerulersitsisimasoq eqqaavaa.
Ukiaanerani ataatsimiinnerup immikkoortuani siullermi “oqallinnerit sakkortusinnaasarnerat” siulittaasup Mimi Karlsenip nalunaarumut atatillugu eqqaanngitsoorusunngilaa.
Ataatsimiinnermik aqutsisup suliassaa
- Siulittaasoqarfiup ataatsimiinnermik aqutsisartutut suliassaraa Inatsisartut ataatsimiittarfianni oqallinnerit isummat assigiinngissinnaaneri Inatsisartunullu ilaasortat ataasiakkaat, tamarmik naligiittut innuttaasut qinigaat, ataqqillugit tamatigut ingerlanneqartarnissaat ilaasortanut kaammattuutigisassallugu, Mimi Karlsen allappoq, nangillunilu:
- Siulittaasoqarfiup ataatsimiinnermik aqutsisutut Inatsisartut ataatsimiittarfianni oqallinnerit nalinginnaasumik naalakkersuinikkut oqallinnermut minnerunngitsumillu innuttaasunut oqallinnernik malinnaasunut pissarsiviusarnissaat sulissutigiuassavaa kaammattuutigalugulu, Inatsisartut ataatsimiittarfianni oqallinnivut avatitsinnit aamma paasineqarsinnaassappata. Inatsisartut ataatsimiittarfianni oqalliseriaatsimut pitsaasumut akisussaaneq taamaalilluni ilaasortani oqallinnermut peqataasuni ataasiakkaaniittuarpoq, Inatsisartut siulittaasuata naqissuserpaa.
