KL

DK

Mimi Karlsen kuultiusumik Nersornaaserneqarpoq

Inatsisartut Siulittaasoqarfiata Nuummi novembarip ulluisa 25-anni Inatsisartut Siulittaasuat Mimi Karlsen kuultiusumik Nersornaaserpaa. Inatsisartut Siulittaasuata sinniisussaata Kristian Jeremiassenip Nuummi Hans Egedep Illuani nalliuttorsiualaarnermi Inatsisartut Siulittaasuat kuultiusumik Nersornaaserpaa

Tôrtia Reimer-Johansen
Journalist
Offentliggjort

Inatsisartut Siulittaasuat Mimi Karlsen kuultiusumik Nersornaaserneqarpoq ukiorpassuarni tunniusimalluni naalakkersuinikkut suliaqarnera aammalu Inatsisartut Siulittaasuattut atuunnera pissutigalugit, taama Inatsisartut Siulittaasoqarfiat nalunaaruteqarpoq.

- Mimi Karlsen, inuuninni ukiorpassuarni tunniusimallutit naalakkersuinikkut suliaqarnerit aammalu Inatsisartut siulittaasuattut atuunnerit pissutigalugit Inatsisartut Siulittaasoqarfiata kuultiusumik Nersornaaserpaatit. Inatsisartunut ulloq 2. juni 2009-mi qinigaaqqaarputit aammalu kultureqarnermut, ilinniartitaanermut, peqqissutsimut, isumaginninnermut, suliffeqarnermut, ilageeqarnermut naligiissitaanermullu suliassaqarfiit iluini arlaleriarlutit Naalakkersuisunut ilaasortaasimallutit, Inatsisartut Siulittaasuata sinniisussaa Kristian Jeremiassen oqalugiaammini oqarpoq.

Ilanngullugu oqalugiaammini oqaatigaa Mimi Karlsen piffissap ingerlanerani ataatsimiititalianut, siunnersuisoqatigiinnut aalajangiisartunullu assigiinngitsorpassuarnut aamma ilaasortaasarsimasoq. Kommunit siusinnerusukkut agguataarneqarnerisa nalaani piffissami 2005-imit 2009-mut Maniitsumi kommunalbestyrelsimut aamma ilaasortaavoq, tassanilu viceborgmesteritut aamma atuuffeqarluni.

 Mimi Karlsen Inatsisartut Siulittaasuattut septembarip ulluisa 22-anni siorna 2023-mi qinigaaqqaarpoq, tamatumanilu peqqissutsimut Naalakkersuisutut atuuffimmi aappaanit tunuartariaqarsimalluni. Inatsisartut Siulittaasuattut septembarip ulluisa 20-anni ukioq manna qinigaaqqippoq. 

- Inatsisartunut Siulittaasutut naalakkersuinikkut sulininni isumaqatigiisitsiniarneq aammalu Inatsisartut suliaat pillugit naalakkersuinikkut soqutigisat assigiinngitsorpassuit katersuuffiunissaat anguniartuarpat. Amerlanerpaat amerlanertigut ataatsimoortinniarlugit illit nammineq naalakkersuinikkut soqutigisavit uninngatikkallarnissaa ilaatigut unammillernartarsimavoq, Kristian Jeremiassen Mimi Karlsenimut oqarpoq nangillunilu:

- Naalakkersuinikkut ingerlatsininni pisimasut iliuuserisimasatillu annertuut naalakkersuinikkut sulininni tunniusimalluinnarninnut minnerunngitsumillu piumassuseqarninnut takussutissaapput, tamannalu kuultiusumik Nersornaasernikkut siulittaasoqarfiup annertuumik qujaniarneranut ersiutaavoq.

Qujaniarneq

Inatsisartut Siulittaasuat Mimi Karlsenip qujassuteqarluni oqalugiarnermini ilaatigut erseqqissarpaa: 

- Qujanaq Inatsisartut siulittaasuinut, inatsisartunut. Ilaquttat, nunaqqatit, inuit atugaat pitsanngortinniarlugit suliassaqartuaannarpoq, suliarigaannilu iluaqutaaneri takullugit pilluaataajuaannarluni. Peroriartorpunga suliaqartuaannartut akornanni.

- Taakkuttaaq piumaffiginnittuaannarput suliaqarnissamik, taannalu uannut sunniuteqarsimaqaaq. Politikkikkut sulineq suliffittulli allatut isigaara. Inuit ikiugassat, ataqqisassat, atukkallu pitsanngortinniagassat suliarisarlugit. Nersorneqarnissaq qummulluunniit isigineqarnissaq pingaartinnagu.

Nersornaat kuultiusoq ukiumut annerpaamik ataasiarluni tunniunneqartarpoq. Nersornaat sølviusoq annerpaamik ukiumut tallimariarluni tunniunneqartarpoq. Pissutsini immikkut ittuni taamatut amerlassusiliineq Siulittaasoqarfimmit sanioqqunneqarsinnaavoq.

inuiaqatigiit samfund

ATORFIIT Se alle jobs

Powered by Labrador CMS