Ministerip sulianik suliarinnittarfiit ilai Kalaallit Nunaannut nuunnialerai

Inuussutissalerinermut Aqutsisoqarfik Nuummi allaffeqalertoq januaarip qiteqqunnerani nalunaarutigineqarpoq.

Nunanit tamalaanit sulisussarsiornermut akuunerulersitsinissamullu aqutsisoqarfiup suliassat arlallit Kalaallit Nunaannut, Nuuk qaninnerullugu, nuunneqarnissaat sulissutigalugu nalunaarutigaa.

Kalaallit Nunaanni sulilernissaq ilinniarnissarluunniit siunertaralugu Kalaallit Nunnaanniikkallarsinnaanermut qinnuteqaatit suliarineqartarnerat Nunanit tamalaanit sulisussarsiornermut akuunerulersitsinissamullu aqutsisoqarfiup tassa nuunniarpaa. Sulianik suliarinnittarneq siunissami Kalaallit Nunaanni isumagineqartartussanngorlugu.

Ministeriaqarfik tusagassiutinut taama nalunaarutigaa.

Suliassat amerlanerusut suliassanngortinneqarsinnaasut

Danmarkip nunani allamiunut akuunerulersitsinissamullu tunngasuni ministeria Kaare Dybvad suliassat amerlanerusut suliassanngortinneqarsinnaasut oqarpoq:

- Isumaqarpunga suleqatigiilluta Kalaallit Nunnaanniikkallarsinnaanermut qinnuteqaatit suliarineqartarnerat Kalaallit Nunaannut nuukkutsigu isumaqarluartoq.

- Sulilernissamik ilinniarnissamillu siunnerfeqartut aallarniutigissavagut, maannalu ministeriaqarfimmi suliassat allat Kalaallit Nunaannut attuumassuteqartut aamma Kalaallit Nunaannut nuunneqarsinnaanersut sukumiinerusumik misissorparput, ministeri oqarpoq.

Ministereqarfiup naapertorlugu tassani sulisut qanittukkut Nuummiipput qanoq iliornissat arlaqartut isumannaarniarlugit. Taamaalilluni nuussinikkut suliassat Kalaallit Nunaanni innuttaasut, suliffeqarfiit oqartussallu suliamik iluaqutiginnittussaasut qaninnerullugit suliarineqartalissapput.

Folketingimi ilaasortaq: Kalaallit ilisimasaannik ineriartortitsissutaassaaq

Kalaallit Nunnaanniikkallarsinnaanermut qinnuteqaatit Kalaallit Nunaanni suliarineqartalernissaat oktobarimi 2025-mi aallartissangatinneqartoq ministereqarfiup naatsorsuutigaa.

Folketingimut ilaasortap Aki-Matilda Høegh-Damip (S) ministeriaqarfiup suliniutaa nuannaarutigaa:

- Suliat Kalaallit Nunaannut attuumassuteqartut Kalaallit Nunaanni suliarineqartarnissaat sukataarutiginikuuarput. Ministerimik suleqateqarluarsimanerput qujanaq – tamanna eqqortumut alloriarneruvoq, kisianni suli suliassarpassuaqarpoq, Aki-Matilda Høegh-Dam oqarpoq, taassumalu naalagaaffiup suliassaasa ilaat Kalaallit Nunaanni suliarineqartalernissaat iluaqutissarpassuaqartoq takusinnaavaa:

- Tamanna aqutsinermik qanimut suleqatiginninnerulernermik kinguneqaannarani aammali nunaqavissut sulisorineqarnerulernissaannik kalaallillu ilisimasaannik ineriartortitsinissamut periarfissiivoq. Nunatsinnut tunngasuni annertunerusumik akisussaassuseqalernissamut aqutsinerunissamullu alloriarneruvoq, Sermitsiamut taama allagaqarluni qisuariarpoq.