KL

DK

MIO kalaallit meerartaasa inuunerat pillugu misissuinermik annertuumik aallartitsisoq

Suliniut nutaaq Kalaallit Nunaanni meeqqat inuunerannik atugarisaannillu aatsaat taama annertutigisumik misissuinerussaaq, suliniaqatigiiffik nalunaarpoq.

Meeqqat Kalaallit Nunaanniittut nammineerlutik inuuneq qanoq misigisarneraat MIO-p paasiumavaa. Assimi matumani Nuummi atuartut sinniisaannut qinersisuniippugut.
Morten Okkels Tusagassiortoq
Saqqummersinneqarpoq

MIO, Kalaallit Nunaanni meeqqat pisinnaatitaaffiinik suliniaqatigiiffik, ukiuni arlalinni atuartut kinguaariit misissorneqarnissaannut suliniummut piareersarpoq. Suliniut taaguuteqarpoq “Kalaallit Nunaanni meeqqat nipaat. Kinguaariit sammineqartut”.

– Meeqqat namminneq oqaasii isiginnittaasiallu aallaavigalugit suliniummi meeqqat ulluinnarni qanoq misigisaqartarnersut misissorneqassaaq – angerlarsimaffimminni, atuarfimmi kiisalu ornigulluni nittartakkatigulluunniit attaveqaqatigiittarfinni assigiinngitsuni peqataaffigisaminni, MIO ilisimatitsivoq.

Misissuineq meeqqat peqataatinneqarnerannik tunngaveqartinneqassaaq. Tassa misissuinerup siornatigut, ingerlanerani kingornatigullu meeqqat inuusuttullu uppernarsaatinik katersuinermut peqataatinneqassapput.

- Misissuineq meeqqat inuusuttullu pillugit ilisimasani amigaataasunik misissuiffiullunilu siunissami suliniutissanut meeqqanut tamanut iluaqutaasussanut tunngaviliisuussaaq, suliniaqatigiiffik allappoq.

Suliniut LEGO-p aningaasaateqarfianiit tapiiffigineqarlunilu Tænketanken Mandag Morgen suleqatigalugu ingerlanneqassaaq. Suliniummi pisortatut atorfik inuttassarsiuunneqaqqammerpoq, upernaarulu aallartinnissaa naatsorsuutigineqarpoq.

inuiaqatigiit samfund

ATORFIIT Se alle jobs

Powered by Labrador CMS