Misissuineq: Islandimiut amerlanersaasa EU-mut ilaasortaanissaq kissaatigaat
Islandimiut 54,3 procentiisa EU-mut ilaasortanngornissaq kissaatigaat, tamanna misissuisarfimmit Maskínamit juunip 12-aniit 20-anut isumasiuinerup takutippaa.
Islandimi Altingimut aappaagu qinersisoqassaaq, immaqalu aamma EU-mut ilaasortanngornissaminnut taasititsisoqassaaq.
Leiff Josefsen
Islandimi isumasiuinermi apersorneqartut amerlanerpaartaasa, tassa 74,2 procentiisa, tullianik Altingimut qinersisoqarpat EU-mut ilaasortanngorniarluni isumaqatigiinniarnerit ingerlateqqinneqarnissaat pillugu innuttaasunik taasisitsinissaq pingaaruteqartoq islandimi tusagassiorfik Visir allappoq.
Isumasiuinerup inernera ministeriunerusimasup Þorsteinn Pálssonip tupaallaatiginngilaa, taannalu isumaqarpoq EU-mut ilaasortanngorneq politikkikkut oqaluuserineqartariaqarpoq.
- Soorunami kialuunniit siumut ilisimanngilaa qanoq pisoqassanersoq, pingaaruteqarporli naalakkersuisut tullii annertuumik suliassaqartut Islandimullu nutaamik siunertaqalerlutik. Qinersisartut apeqqummut pingaaruteqartumut qanoq isumaqartut paasineraniit, Þorsteinn Vísirimut oqarpoq.
EU-mi atugarissaarnerussasut
Isumasiuinermi apersorneqartut 66,8 procentii isumaqartut ulluinnarni pisariaqartitat pitsaanerussasut EU-p ataaniikkaanni. Pingaartumik islandimiut aningaasaat, nunarsuarmi aningaasat nalikinnerpaat ilaat, pissutaavoq. Island EU-mut tamakkiisumik ilannguppat, tamanna aamma euromik atuilernermik kinguneqarsinnaavoq. Euromik atuilernerup ilaatigut kingunerisinnaavaa islandimiut inissiaatillit akiligassaminnik pitsaanerusumik taarsigassarsisinnaalernissaat, Visirimi allaaserisami tamanna eqqaaneqarpoq.
Islandimi aappaagu qinersisoqassaaq.
