Misissuineq: Tatiginninneq aarlerinartumik appasippoq

Kommunit aaqqissussaanerat naammagineqanngimmat Inatsisartut Naalakkersuisut innuttaasunik misissuititsinissamik 2022-mi peqquaat.

Innuttaasut kommunip sullissinera qanimullu oqartussaaneq qanoq isumaqarfigineraat misissuinermi paasiniarneqarpoq.

Iluarisimaarinninneq pillugu misissuineq Naalakkersuisunit maanna tamanut saqqummiuppaat, tassanilu kommunit sullissinerisa iluarisimaarneqarnerat assigiinngitsorujussuusoq ilaatigut inerniliunneqarpoq:

"Illoqarfinni pingaarnerni, illoqarfinni nunaqarfinnilu iluarisimaarinninnerup assigiinngissusaa malunnaateqarpoq. Illoqarfinni pingaarnerni iluarisimaarinninneq ataatsimut isigalugu annertuneruvoq, innuttaasut kommunerisamik sullissinerani annertunerusumik unammilligassaqarnerat pillugu iluarisimaarinninnginnerat illoqarfinni nunaqarfinnilu akulikinnerusumik misigisarlugu."

"Innuttaasut ilaat, matumani ilanngullugit utoqqaat aamma arnat sullissinerit aalajangersimasut iluini iluarinninngitsut misissuinermi aamma takuneqarsinnaavoq, pisariaqartitanik naammattumik naammassinnittoqarneq ajorneranik takutitsisinnaasoq.," misissuinerup allassimavoq.

Innuttaasut 4274-it apeqqutinut immersugassamik tunineqarput, taakkunannga 762-it tamakkiisumik akissuteqarput, 353-illu ilaannakoortumik akissuteqarlutik.

Kommunalbestyrelsit tatigineqannginnerat aarlerinartoq

Innuttaasut qanimut oqartussaaneq pillugu apeqqutini innuttaasut nunami tamarmi najukkami pissutsinut tunngasut najukkaminnut qanittumi aalajangiiffigineqartarnerat pingaartikkaat akissutaanni paasinarsivoq.

"Aalajangisassat najukkani aalangerneqartalissappata, annertunerusumik aningaasartuuteqaalersinnaaneq ilaatigullu appasinnerusumik sullissineq akuersaarsinnaavaat," misissuinermi allassimavoq. Illoqarfinni minnerni nunaqarfinnilu innuttaasut tamanna pingaartikkaat, taakku sumiiffinnut aalajangiiffiusartunut ungasissutut misigisimanerat pissutaalluni.

Tamatumunnga atatillugu kommunalbestyrelsit qanoq iluarisimaarneqartiginersut aamma apeqqutigineqarpoq, tassanilu aamma illoqarfiit pingaarit avataanni naammaginninnginneruneq malunnarneruvoq:

"Pingaartumik illoqarfinni nunaqarfinnilu iluarisimaarinninnginneq malunnarluni. Kommunalbestyrelsit inoqarfinni soqutigisanik ajornartorsiutinillu aaqqiissuteqarfeqarnissaannut tunngatillugu tatigineqarnerat aarlerinartumik appasissumiippoq," misissuinermi allassimavoq.

Misissuineq aaqqissuussaanerup sanngeequtaanik ersersitsisoq inerniuliunneqarpoq.

"Aalajangiiniarnerni attaveqartarnerup pitsanngorsarneqarnissaa innutaaasullu pisariinnerusumik akuutinneqartarnisssaat pisariaqarluinnarpoq," misissuinermi naammagittaalliuutini innersuussutigineqarpoq.

Svane: Aaqqissuusseqqinnerit siunertarineqartutut piviusunngorsimanngillat

Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik naammagisimaarinninneq pillugu misissuisuuvoq.

Iluarisimaarinninnginnerup annertuneranik misissuinermi ersersinneqartoq naalakkersuisup Jess Svanep (S) maluginiarpaa:

- Misissuineq nunatsinni naapertuuttumik siaruarsimasumik peqataaffigineqarpoq, aamma angusat ersarissumik takutippaat, ukiuni kingullerni iluarisimaarinninnginneq annertusiartuinnartoq takusarput ilumoortuusoq, Jess Svane misissuinermut atatillugu siulequtsiussami allappoq.

Kommunit kattussuunneqarneranni anguniagaq piusunngorsimanngitsoq tassuma maluginiarpaa:

- Pingaaruteqarpoq erseqqissassallugu, misissuinerup massuma kommunit kattunneqarnerisa siornatigut innuttaasunik sullissineq qanimullu oqartussaaneq pillugu iluarisimaarinninneq qanoq isikkoqarneranik takutitsisinnaanngimmat, piffissami tassani paasissutissanik assingusunik soqannginnera pissutigalugu. Taamaattoq misissuinerup ersarissumik takutippaa, 2005-imi anguniakkatut saqqummiunneqartut, ullumikkut innuttaasut misigisaannik ersersitsinngitsut, Jess Svane oqarpoq.

Kommunitt 18-iniyt sisamanut kattussuunneqarnerat 2009-mi pivoq. Kingorna Qaasuitsup Kommunia 2018-imi marlunnut avinneqarpoq. Avannaata Kommunia marlunnut avinneqarnissaq kissaatigalugu qanittukkut nalunaarutigaa. Kommunit killeqarfiinik aalajangersaasartut taakkuupput Inatsisartut.