Misissuinerit nutaat sermersuup sukkanerusumik ingerlanera uppernarsarpaa
GEUS-ip misissuinerata nutaap takutippaa Kalaallit Nunaata ilorpasissuani sermeq ilisimatuut maannamut ilimagisaannit sukkanerujussuulluni ingerlaartoq.
Sermersuarmi misissuivik. Aallaqqaataani, marluk atisartaartut misissuivimmut qinerlutik. Qanittumi qulimiguulik aappaluttoq.
GPS-miititsisarnerit ikkunneqarput.
William Colgan, GEUS
Misissuinerit nutaat 1959-imi misissuinernut sanilliullugit takutippaat sermersuup sinaanit nunap timaanut sermeq ilimagisamit allanngorarnerusoq.
GEUS nittartakkamini taama allappoq.
- Sermeq Kujalleq sukkasuumik ingerlasartoq nalunngilarput, sikullu sinaani qanoq ingerlasartoq qanorlu sukkatigisumik ingerlasartoq ilisimalluarparput, tamanna uppernarsarsinnaavarput.
- Naatsorsuutigisimavarput sermeq nunap timaaniinnerusoq arriinnerusumik ingerlasartoq, uuttuinerilli nutaat takutippaat tassani taamaanngitsoq, Anja Løkkegaard GEUS-imi postdoc-iusoq misissuinermilu allaaserisami saqqummersumi allaatiginnittoq oqarpoq.
Sukkasuumik ingerlasoqartartoq — allaat nunap iluatungaani
Sermip sukkassusiata nunap iluani 100 kilometerisut ungasitsigisumiittunut sanilliunneranit erserpoq ukiut 65-it kingulliit ingerlaneranni sermeq sukkanerulersimasoq, 1959-imi uuttortaanermiilli 5-15 procentinik sukkanerulersimalluni.
- 15 procenti immaqa annertugisassaanngikkaluarpoq, sumiiffinnili uuttortaaffigisartakkatsinni misissuinerup inernera sermeq pillugu paasisimasatsinnik eqqarsaatiginneqqissaarnissatsinnut kajumississutigaarput. Maannamut isumaqarnikuuvugut Kalaallit Nunaanni sermersuup sinaani sermillu angisuut eqqaanni sermeq tassaasoq sukkaniuttartup biiliisa aqqutaat, naatsorsuutigisimavarpulli sermeq timerpasinnerusumiittoq allatut sukkassuseqassasoq - tamannali eqqorpallaarunanngilaq, GEUS allappoq.
