Missingersuutissanut kissaat: Sisimiuni qimarnguivik

Ukiuni 2026-2028-mi missiliuuteqarfilerlugu ukiumut 2025-mut missingersuutinik suliaqarnissamut piffissatut pilersaarut nutartigaasoq aningaasaqarnermut ataatsimiititaliap aalajangersarnikuummagu, Qeqqata Kommuniani ataatsimiititaliat kissaatitik nassiussimalerpaat.

Ataatsimiititaliat kissaatitik aggustusip 15-at nallertinnagu nassiutereertussaavaat,  kissaatit ingerlatsinermut aningaasartuutit qaffariaataannik malitseqaqqusaanatik.

Atugarissaarnermut Ataatsimiititaliaq 2025-mut pingasunik kissateqarpoq.

Kissaatini pingasuusuni ataaseq tassaalluni Sisimiuni innuttaasunut persuttagaanermik aqqusaagaqarsimasunut atugassarititaasunik assingusunik peqarfiunngitsuni qimarnguinnik pilersitsinissaq.

Danmarkimiit aningaasaliiffigineqarnissaq periarfissaasoq

Atugarissaarnermut Ataatsimiititaliap allagai naapertorlugit illoqarfinni qimarngueqanngitsuni imaluunniit innuttaasunut persuttagaanermik aqqusaagaqarsimasunut atugassarititaasunik assingusunik peqarfiunngitsuni qimarnguinnik pilersitsinissamut Nordatlantpuljen aqqutigalugu qallunaat naalagaaffiat 10,5 mio. koruuninik immikkoortitsinikuuvoq.

-  Suleqatigiinnissamut isumaqatigiissut malillugu persuttagaanermik eqqugaasimasunut atugassanik Sisimiuni Maniitsumilu illuni pioreersuni qimarnguinnik pilersitsoqarnissaanik sulisoqassaaq, Qeqqata Kommuniani allaffeqarfik allappoq, nangillunilu:

- Maniitsumi Ilaqutariinnut inerisaaviunikuusoq (B-620) persuttagaasimasunut sisamanut inissaqartuusoq iluarsartuunneqarsinnaanera eqqarsaatigineqarsinnaavoq. Teknikkeqarfimmiit paasissutissat malillugit iluarsaassineq 1,5 mio. koruunit missaani akeqassaaq

Qimarnguimmik ingerlatsineq 1,6 millionit koruunit missaani akeqassasoq naatsorsuutigineqarpoq. Nunatta karsia taamaallaat qimarnguinnut imminut pigisunut tapiissuteqarsinnaavoq.

Missingersuutinut kissaatit suliarineqarsinnaassagunik sumiiffikkaartuussaaq. Kissaat "Sisimiuni Maniitsumilu" oqaasertalerneqaruni kissaatitut marluttut kisinneqassammat, Sisimiuni peqalernissaa salliunneqarpoq.

Kissaatit allat

Sisimiuni qimarnguivimmik pilersitsinissamut kissaateqarnerup saniatigut Maniitsumi utoqqaat illuanni Neriusaami iluarsartuussisoqarnissaa kissaatigineqarpoq:

-  Utoqqaat illuata illutaa nungullariartulernermik takussutissaqarpoq aammalu illup innarlinnginnissaata najugaqartunullu isumannaatsuunerup paariinnarnissaanut pingaarutilimmik iluarsartuussinissamut pisariaqartitsisoqarpoq.  Aammattaaq utoqqaat illuata igaffiani igaffimmik matusinermik kinguneqarsinnaasumi natermik annertuumik suliaqarnissamut pisariaqartitsisoqarpoq.

Puigortunngortut angerlarsimaffissaanut pilersaarut aningaasaliffigineqaqqinnissaa aamma kissaatigineqarpoq.

Aningaasaqarnermut ataatsimiititaliaq aggustusip ulluisa 20-anni ataatsimiikkunik kissaatigineqartut suliarissavaat.