Mittarfeqarfimmi nassaarineqartoq arfininngornermi unnukkut qaartinneqarpoq

Illersornissaqarfiup imassaajaasartuisa arfininngornermi unnukkut suuneranik oqaluttuarineqanngitsoq Billundip mittarfiani nassaarineqarsimasoq nakkutigeqqissaakkamik qaartippaat.

Sydøstjyllands Politi tusagassiutinut nalunaarummi taamak ilisimatitsivoq.

Qaartitsineq ingerlanneqarpoq sumiiffimmi Hejnsvigip illoqarfiata eqqaani, sumiiffik qaartitsiffik isumannaallisaanermut naapertuuttuusoq nalilerneqarsimavoq, ilanngullugu ilisimatitsissutigineqarpoq.

Politiit nalunaarumminni allaaserisaqanngillat, taanna qaartinneqartoq qaartartuusimanersoq sioorasaarinermut tunngassuteqarnersoq, kisianni nakkutigeqqissaakkamik qaartitsineq ingerlanneqarsimanerarpaat.

Billundimi Mittarfeqarfik arfininngornermi nalunaaquttap akunneri qulit missaani matoqqatinneqarpoq qaartartumeerinissamik sioorasaaruteqartoqarnera pissutigalugu.

Qaartartumeerussamik sioorasaaruteqarneq pissutigalugu inuit mittarfeqarfimmiittut arfininngornermi qimagussortinneqarput, aammalu timmisartuussinerit arfininngornermi ullaamiit unnuup tungaanut ingerlanneqanngillat.

Angut 30-it missaanik ukiulik suliap ingerlanerani tigusarineqarpoq. Sapaammi tigummigallagassanngortinneqarpoq 17. maajip tungaanut.

Angut taanna pasisaq arfininngornermi nal. 10.22 tigusarineqarpoq.

Taamak pisoqannginnerani, Sydøstjyllandimi Politiit tusagassiuutinut nalunaarutaat malillugu, mittarfimmi kingusinnerusukkut nassatarisaq angutip taassuma tunniussimavaa ilisimatitsiutigaluni qaartartumik imaqartoq.

Angutip tunniussimasaa sorpiaanersoq politiinit ilisimatitsissutigineqanngilaq.

Sapaammi inatsisit tunngaviusut naapertorlugit killisiuineq marloriaammik matoqqasumik ingerlanneqarpoq.

Taamaalilluni tusagassiortut angutip pineqaatissinneqartup ateqannginnerat, suna pillugu pineqaatissinneqarsimasoq, imaluunniit eqqartuussivimmi qanoq oqaluttarsimanersoq ilisimanngilaat.

Marloriaammik matoqqasumik killisiuineq pissutigalugu Sydøstjyllandimi Politiit pisoq pillugu paasissutissanik allanik saqqummiussisinnaannginnerarput, tusagassiuutinut nalunaarummi taama allassimavoq.

Politiit arfininngornermi Billundimi eqqaanilu sumiiffinni assigiinngitsuniittarsimapput.

/ritzau