Mittarfik isornartorsiorneqaqisoq pillugu pisortaq nassuiaavoq

Nunatsinni suliffeqarfiit oqallisigineqarnersaanni pisortaq naapittussanngoratsigu silamut ilimasaarut qiviaraanni seqinnerlunilu kialaassasoq ilimasaarutigineqarpoq, naapiffissaali ulloq nallermat ullaaq taanna pujorlunilu sila qiianakujoqaaq. 

Taama pisoqarnera eqqartugassatsinnut assersuunneqarluarsinnaagunarpoq.

Eqqartugassarput tassaavoq Nuummi mittarfik. Mittarfik pilersinneqartussanngormat sorpassuartigut neriulluarfigineqarsimaqisoq maanna isornartorsiorneqaqaaq.

– Greenland Airports uangalu inoqatinut attaveqaatini eqqartorneqaleraangatta soorunami nuannerneq ajorpoq. Kialuunniimmi taama pineqarneq nuannarineq ajorpaa, Jens Lauridsen taama oqarpoq.

Jens Lauridsenip oqaloqatigineqarnera tamakkiisoq ataani Podcastimi tusarnaarsinnaavat. Suliffeqarfiup Ilulissani mittarfiliornermut 1,5 mia. koruuninik atorfissaqartitsilernera ilaatigut eqqartorneqarpoq. Taassuma saniatigut Nuummi mittarfittaami ajornartorsiutit allat eqqartorneqarlutik. Podcasti qallunaatuujuvoq. 

Taanna biilit unittarfianni oqallisaaqisumi naapipparput. Biilit unittarfiat qaqqajunnami, mittarfimmit qutsinnerusumi inissisimavoq. Tamaani biilinik uninngatitsisut akiliisarnissaat pilersaarutaasoq aallaqqaammulli tusarliunneqarpoq. Akiliiffissarli maannamut takussaanngilaq.

- Akiliisarfeqalerumaarpoq. Akiliisarfiummi ikkussuunnissaanit suliassarpassuarnik allanik pingaarnersiunikuuvugut.

 – Ukiortinnagu piareerniartussaavoq. Ulluliisinnaanngikkallarpunga. Oqaatigeqqissavarali pingaarnersiueqqissaaratta. Piaarnerusunillu maannakkorpiaq suliarisariaqartunik mittarfiup illorsuartaani suliassaqarmat, taakkua siulliuppagut, Jens Lauridsen oqarpoq.

Tummeqqat oqallisaaqisut

Mittarfiup illorsuartaata tikinnginnerani aqqutissatsinniipput tummeqqat oqallisaaqisut. Taakkua biilit unittarfianniit mittarfiup tungaanukarniaraanni aqqutissaapput. Suli biilit unittarfianniittugut ataataq pingasunik meeqqisartoq, pisatarpaalunnik arliarluni saneqquppoq.

– Qutsinnerusumi inissisimanera nalunngilara pitsaanerpaajunngitsoq. Biilinimmi unittarfik mittarfiullu illorsuartaa portoqatigiillutik inissisimasimasuuppata pitsaanerpaassagaluarpoq. Taamaattoqassappalli qaqqarujussuaq qaartiteqqaartariaqarsimassagaluarparput.

Angalasut tummeqqat sungiunniaannartariaqarpaat. Biilinimmi unittarfik unittarfinnut atorneqanngitsunut, mittarfiup illorsuartaata saavaniittunut nuunneqarnavianngilaq. Biilinut unittarfiit timmisartut unittarfiinut qanippallaaqqusaannginnerat tamatumunnga tunngaviuvoq. 

Nunanut tamalaanut mittarfeqarniaraanni inatsisit tassa taamaapput. Tummeqqat ukiumi apisimatillugu aqqutigiuminaassisarput, aqqutigiuminarsitinniarlugilli qulineqassasut pisortap oqaatigaa.

– Siorna pingaarnersiuinitsinni kingullinngortitatsinnut ilaapput. Mittarfiummi ammarnissaa pingaarnersiuinitsinni siulliunnikuuarput.

Politikerit akuliupput

Isornartorsiuisut piffissap ingerlanerani nippakkiartuinnartutut ipput. Biilit unittarfianiit isumannaallisaanikkut misissuisarfik isornartorsiorneqartunut ilaallutik. Maanna politikerit kiisa akuliupput. Greenland Airportsimi immikkut ittumik ataatsimeersuartinneqassasoq Siumup Naalakkersuisunut piumasaraa.

– Siumut aaqqiissutissanik ujartuilluni suleqataanissamut piareersimavoq. Kisiannili tamanna aatsaat pisinnaassaaq akisussaaffimmik tigusisoqassappat – massakkut, Siumup Inatsisartunut gruppiani siulittaasoq Erik Jensen tusagassiorfinnut taama nalunaaruteqarpoq.

Pisortarmita qanoq qisuariaatissaqarpa?

– Politikerit isummersinnaatitaapput. Akisussaaffimmillu tigusisoqassasoq piumasarigunikku uannut saaffiginninnissamut tikilluaqqusaapput, Jens Lauridsen taama oqarpoq.

Suliassartilli imaaliallaannagassaanngitsoq erseqqissaatigaa.

– Malittarisassat sukannersut malillugit sulivugut.

Kisianni taava killissaa sumiippa?

– Naluara killilerneqarsinnaanersoq. Taamaattoqassappat arlaat oqartariaqarpoq: “Naammaleqaaq!” Uanga aalajangiisussaagunanngilanga.

Security One Stop Securitylu

Mittarfiup illorsuartaa tikikkatsigu Jens Lauridsen suli nassuiagassaqarpoq. Illorsuaq aallariartortarfiullunilu tikittarfiusoq siorna atorneqaliinnartoq kusilermat siparninik kuserfissiortoqarpoq. 

Illorsuulli ussiinnera suliarineqareersimalermat ajornartorsiutit allattorsimaffiannit peerneqarsimalereerpoq.

– Upernaaq aput aattulermat kusertoqanngilaq. Taamaammat ajornartorsiutaajunnaareerpoq, pisortaq oqarpoq.

Ajornartorsiutinilli allanik suli aaqqitassaqarpoq, taakkua ilagaat One Stop Security. One Stop Securityp suli atuutilersinneqannginnera arlalitsigut kinguneqarnerluppoq. Assersuutigalugu angalasut Københavniliartillutik, siornatigut mittarfiup utaqqisarfiatigoorlutik niusarnikuugaluartut, maanna tikinnerminni bussinit aaneqartarput, ingerlaannarlu nassatanik tigusisarfimmukaanneqartarlutik.

– Akuersissut suli pinngikkaluarlugu pigilereersimasutulli sungiusarpugut. Naak suli EU-mit akuersissut pinngikkaluarlutigu akuersissuteqareersutulli sulivugut. Akuerisaassagutta sungiusarnissamut piffissaqartariaqarpugut, sulisullu sungiussisimalluarnissaat pisariaqarpoq, Jens Lauridsen oqarpoq.

Akuersissut ukiup naannginnerani pineqassasoq neriuutigalugu ilanngullugu oqaatigaa.

Mittarfik siorna ammarmalli angalasut tamarmik – aamma nunap iluani angalasut – isumannaallisaanikkut misissuisarfik, security, aqqusaartalerpaat. Sungiunniagassarpassuarnut ilaaginnarpoq. Securityli amigarnerup kingunerisaanik ullaakkut kingusissumi ammartillugu timmisartut kinguaattoortarput.

– Taama pisoqartillugu kanngunartaqaaq, pisortaq oqarpoq.

Aqqanillit nutaat takkutilerput

Securitymi sulisunik atorfinitsitsisoqartillugu ulluinnarni sulinermut peqataalernissaannut piffissaq sivisusinnnaasarpoq.

– Atorfinitsitsigaangatta securitymi sulilernissaannut ilaanni qaammatip aappaa avillugu qaammatilluunniit marluk utaqqisariartarpugut, taanna oqarpoq.

Nuannersumilli nutaarsiassaqarpoq.

– Maanna immiussileruttornitsinni inuit aqqanillit pikkorissarput, qanittukkullu sulilersinnaallutik.

Taakkua aqqanillit misilitsissapput, angusissappatalu ajornartorsiut aaqqinneqassaaq.

– Ajornartorsiut aaqqinneqassaaq, taamaattoqassappalli angusisariaqassapput, Jens Lauridsen qungujulluni oqarpoq securityllu tungaanut pisulluni aallarluni.

Suleqatigiilluartoqartariaqarpoq

Security qaangereeratsigu aallarniartilluni utaqqisarfik nallerparput. Tamaani takussaapput inuit aallarnissaminnut pilererpaseqisut. Sila unerisimanngeqattaarnikuummat kinguaattoortut ilaginnguatsiarpaat. 

Angalaniartut isigineranni Ilulissani Qaqortumilu mittarfissat saappagut. Kukkunerit Nuummi mittarfimmi nalaanneqartut taakkunani pinngitsoortinneqarsinnaassanerpat?

– Suut tamarmik manissuinnarmik pinissaat neriorsuutigisinnaanngilara, Nuummili unammillernartissimasatta Ilulissani pinaveersaartinnissaannut misilittagarilikkagut ilinniarfigiumaarigut qularutiginagu oqaatigissavara, taanna oqarpoq.

Suut tamarmik iluatsilluassappata Air Greenlandimik suleqateqarnerup iluatsinnissaa aalajangiisorujussuarnut ilaavoq. Assersuutigiinnarlugu nassatat tunniunneqarsimasut qanoq isumagineqartarneri qiviaannarsinnaavarput. Greenland Airportsip nassatanut tunniunneqarsimasunut maskiina aqqutigineqartartoq pigaa, Air Greenlandilli sulisuisa nassatat assartortarlugit.

– Immitsinnut qanoq pinngitsoorsinnaanngitsiginerput ilinniutitsinnut ilaavoq, tamannalu ulluinnarni eqqarsaatigerpiarneq ajorparput.

Nuummilu mittarfiup atulernerani ilinniutigingaatsiarsimasani ataaseq, Ilulissani mittarfiup aappaagu ukiakkut ammarnissaanut iluaqutigisinnaasani suusoq pisortap qularutiginngilaa.

– Sulisussanik nassaarniarnerup qanoq ajornartiginera assut uisitsivoq. Sulisussanik nassaarniarneq sivisusinnaavoq – piffissarlu sivisunerusarpoq suliassanik tamakkiisumik kivitsisinnaalernissaannut. Tassunga killitsinnatik pikkorissarlutillu ilinniaqqaartariaqartaramik, pisortaq taama oqarpoq.