Kangerlussuarmut 2025-mi atlantikoq qulaallugu timmisartuussisoqaannartarnissaa ernummatigineqarpoq:
Mittarfiliortiternissamut tunngavigineqartut atorunnaarput
Air Greenland apereqqaarsimanngilaq: – Akuleruttussaatitaannginneq atuuppoq
Air Greenlandip 2025-mi
Kangerlussuarmut atlantikoq qulaallugu
timmisartuussisarnerup attatiinnassammagu
2018-imi mittarfiliortiternissamut
tunngaviusut allanngussammata
Aningaasaqarnermut Siunnersuisoqatigiit
tamanna ernummatigaat.
Assiliisoq: Leiff Josefsen
Nuummi mittarfissuaq nutaaq sisamanngornermi novembarip 28-ani atoqqaarfissiorneqassaaq, timmisartortitseqatigiiffilli Air Greenlandip takornarialerisullu Albatros Arctic Circlep 2025-mi Kangerlussuarmut Atlantikoq qulaallugu timmisartuussisarneq ingerlatiinnarniarpaat.
Mittarfiliortiternissamut aalajangiunneqartup 2018-imeersup aningaasaqarnerannut tamanna isumakulunnermik nassataqarpoq. Tassa Nuummi Ilulissanilu mittarfissuit marluk Qaqortumilu nunap immikkoortuani mittarfik ataaseq.
– Nuummi Ilulissanilu mittarfissuassat pillugit aalajangiinermi misissueqqissaarnermi ersarissumik tunngavigineqarpoq Kangerlussuup atlantikoq qulaallugu timmisartuussinernut atorunnaarnissaa, Aningaasaqarnermut Siunnersuisoqatigiit siulittaasuat Torben M. Andersen Sermitsiamut oqarpoq.
– Mittarfissuarni marlunni nutaani atlantikoq qulaallugu angallassinerup ataatsimoortinneqarnissaa tunngavigineqarpoq, taamaalilluni mittarfiit amerlavallaartut atorlugit angallassisoqassanani. 2025-mi atlantikoq qulaallugu angallassineq Kangerlussuarmi ingerlaannassappat isumaqatigiissut annertuumik allanngortariaqarpoq, ilaatigut Naalakkersuisut Greenland Airportsimut – Mittarfeqarfinnut kiffartuussinissamik isumaqatigiissutaata allanngortinneqarnissaa pisariaqassalluni.
– Kangerlussuarmiit atlantikoq qulaallugu timmisartuussisarneq ingerlaannassappat qanoq kinguneqarsinnaava?
– Apeqqut pingaarutilik tassaavoq Kangerlussuup atlantikoq qulaallugu angallannermut ammatiinnarneqarnissaanut aningaasartuutit matussuserniarlugit naammattumik ilassutitut angallassisoqarsinnaanersoq. Kangerlussuarmiit atlantikoq qulaallugu angallassisoqarnissaa immini naammanngilaq; Nuummi Ilulissanilu mittarfiit allat marluk aqqutigalugit matussuserneqarsinnaanngitsunik ilassutitut angallassisoqartariaqarpoq. Ilassutitut angallassisarnermik tunngaviliisoqassanngippat aningaasalersuinissamut tunngavissaq pilersinneqartariaqarpoq.
- Taamatullu pingaarnersiuineq soorunami politikkikkut suliassaavoq, Torben M. Andersen oqarpoq.
NUANNERSUMIK TUPAALLAATIGINEQARTOQ
Timmisartortitseqatigiiffiup Air Greenlandip takornariartitsinikkullu ingerlatsiviup Albatros Arctic Circlep juulip 15-ianni tusagassiuutinut nalunaarummi Kangerlussuarmut atlantikoq qulaallugu timmisartuussisarnissaq nutaaq pillugu Namminersorlutik Oqartussat tusagassiuutillu ilisimatippaat.
Ineqarnermut attaveqaasersuutinullu naalakkersuisup Hans Peter Poulsenip tamanna uppernarsarpaa.
– Qaammatit tamaasa Air Greenland ataatsimeeqatigisarpara, aamma juunip 17-ani ataatsimeeqatigaanga, tassanilu naatsumik isertuussatullu paasitinneqarpunga Air Greenland Kangerlussuarmi timmisartuussisarnerup annertusarnissaanut sunniuteqartussamik timmisartuutileqatigiiffimmik isumaqatiginninniartoq.
- Air Greenland qaammatit tamaasa ataatsimeeqatigisarpara, juunillu 17-ianni Air Greenlandip Kangerlussuarmut timmisartuussissarnissaq pillugu suliffeqarfimmik isumaqatiginninniartoq, isumaqatigiissullu Kangerlussuarmi suliaqartoqarneranut annertusititsisussamik kinguneqartussaq pillugu naatsumik isertortumik paasitinneqarpunga.
– Tassa atlantikoq qulaallugu aqqut nutaaq pillugu tusagassiuutitigut nalunaarut atuarakku Sermitsiatulli tupaallappit?
– Aap, nuannersumik tupaallaatigaara, Air Greenlandimi ulluinnarni ingerlatsinermut akuliuttussaatitaanngilanga, Hans Peter Poulsen Sermitsiamut oqarpoq.
Qaammatit arfineq-pingasut tulliuttut ingerlaneranni Inatsisartunut qinersisoqassaaq, Hans Peter Poulsenillu nalunngilaa partiit timmisartuussineq attaveqaasersuutillu pillugit assigiinngitsunik isumaqartut.
– Paasisinnaanngilara Kangerlussuarmi Qeqqatalu Kommunianilu niuernikkut soqutigisat pilersinneqarnissaat pinngitsoortinniartariaqaripput, takussavarpulli siunissamut ernumasut tulliani qinersinermi ajugaassanersut, Hans Peter Poulsen oqarpoq.
kurt@sermitsiaq.gl
Akiligassaq nunap karsianut tussaaq
Namminersorlutik Oqartussat 2009-mi atuutilersinneqarmata angallannermut tunngasut, siunissaq ungasinnerusoq eqqarsaatigalugu aningaasarsiornerup imminut napatissinnaalernissaanik anguniagaqarnerup tapersersornissaanut iluaqutaasut, pingaartinneqarput. Naalakkersuisut Assartuussineq Pillugu Isumalioqatigiissitaq pilersippaat, taakkulu attaveqaasersuutit eqqarsaatigalugit periarfissat arlallit 2009-miit 2011-mut misissuiffigaat.
Assartuussineq Pillugu Isumalioqatigiissitaq 2011-mi ima inerniliivoq:
– Mittarfissuup pingaarnerup Nuummut nuunneqarnissaata imminut akilersinnaanissaanut tunngaviusoq ataaseq pingaaruteqarluinnarpoq, tassa Kangerlussuup matuneqarnissaa. Uani mittarfiit taakku marluullutik ingerlaannarnissaat periarfissaanngilaq.
Nuummut Kangerlussuarmullu atlantikoq qulaallugu 2025-mi timmisartuussisoqartarnissaa pillugu oqaaseqartikkusullugu Assartuussineq Pillugu Isumalioqatigiissitap siulittaasua Christen Sørensen Sermitsiap attaveqarfigaa.
– Kalaallit Nunaata aningaasaqarnera tassungalu ilanngullugu angallannermut politikki naammattumik malinnaavigiunnaarnikuugakku pissutsit nutaat oqaaseqarfigerusunngilakka, Christen Sørensen Sermitsiamut oqarpoq.
Aningaasaqarnermili professoriusimasup Namminersorlutik Oqartussat Air Greenlandimik tamakkiisumik piginnittunngornikuunerat tikkuarpaa.
– Ilisimasakka naapertorlugu Namminersorlutik Oqartussat Air Greenlandimik aqutsisuupput, taamaattumik Kangerlussuarmut ilaasunik timmisartuussisarneq Nuummi mittarfissamut nutaamut ajornartorsiortitsissappat Namminersorlutik Oqartussat ajornartorsiummut akisussaasuussapput, Christen Sørensen oqarpoq.
Naleqqap siulittaasua Pele Broberg sapaatip-akunnerani kingullermi aviisimi ima oqarpoq.
– Naalakkersuisut Air Greenlandip Kangerlussuarmut atlantikoq qulaallugu 2025-mi timmisartuussisarnissaanut inerteqquteqartariaqarput, tamanna 2018-imi politikkikkut isumaqatigiissummik unioqqutitsinerummat, Inatsisartuni partiit illuatungiliuttut annersaata siulittaasua Sermitsiamut oqarpoq.
Aningaasatigut nalilersuineq, politikkimut tunngassuteqanngitsoq
Air Greenlandili allatut nalunaaruteqarpoq.
– Albatros Arctic Circlemik isumaqatigiissuteqannginnermi, aqqut 2025-mi aasaanerani Mittarfeqarfiit Kangerlussuarmi ingerlatsinerannut sunniuteqarnissaa pillugu Air Greenlandip Mittarfeqarfiit attaveqarfigisimavai?
– Isumaqatiginninniartoq Albatros Arctic Circlep isumaqatigiissuteqannginnermini Mittarfeqarfiit timmisartuussinissamut aqqut pillugu oqaloqatigisimagai Air Greenlandip paasivaa, ingerlatseqatigiiffimmi piujuartitsinermut attaveqaqatigiinnermullu pisortaq Inga Dóra G. Markussen Sermitsiamut oqarpoq.
– Air Greenlandip aamma ineriartorneq malinnaaffigaa, timmisartuussinermi ajornartorsiortoqartillugu silallu ajornerani allamut ingerlaqqissinnaanissaq eqqarsaatigalugu Kangerlussuarmi mittarfik miffigineqarsinnaassammat. Kangerlussuaq 2025-mi januaarip aallaqqaataaniit isumannaallisaanermi Security 2-mik ingerlatsilernissaa eqqummaariffigaarput, mittarfillu nunarsuarmit sumiikkaluartunit miffigineqarsinnaassalluni.
– 2018-imi mittarfinnut tunngatillugu aalajangernermut tunngaviusumik allannguisoqarnissaa eqqarsaatigalugu Kangerlussuarmut atlantikoq qulaallugu timmisartuussinerup ingerlaannarnissaa pillugu isumaqatigiissuteqarnissaq sioqqullugu Air Greenlandip Naalakkersuisut attaveqarfigisimanngilai?
– Air Greenlandip timmisartuussinissamut aqqut pillugu Naalakkersuisut toqqaannartumik attaveqarfigisimanngilai. Timmisartuussisarnissap pilersaarusiorneqarneranni aningaasaqarneq, unammillersinnaanerup illersornissaa attaveqaatillu pitsaanerulernissaat naliliinermi ilanngunneqarput, Inga Dóra G. Markussen oqarpoq.
– Air Greenlandip ineqarnermut attaveqaasersuutinullu naalakkersuisoq ataavartumik ataatsimeeqatigisarpaa, juunimilu ataatsimeeqatiginninnitsinni ilisimatitsissutigaarput Air Greenland aamma Albatros Arctic Circle oqaloqatigiittut, kisianni suli inaarutaasumik isumaqatigiissuteqartoqanngitsoq.
– Air Greenlandip Naalakkersuisut ulluinnarni ingerlatsinermi aalajangiinernut peqataatittanngilaa, tassami akuleruttussaatitaannginneq atuuppoq, Inga Dóra G. Markussen erseqqissaavoq.
