Mittarfimmut nutaamut umiatsiat annaassiniutissat nutaat

Ajutoortoqassagaluarpat Nuummi mittarfissap nutaap upalungaarsimalluinnarpoq. Ilaatigut timmisartunik ikuallattoqartillugu qatserisartut nutaat aamma immaani annaassiniutit timmisartoq mittarfiup eqqaani immamut mippat ikiuussinnaasut atortuutigineqarput.

- Angallannermut aqutsisoqarfiup malittarisassaani allassimavoq mittarfiit imaanit 1,5 kilometerit inorlugit inissisimappata immaani annaassiniarnissamut upalungaarsimasoqartariaqartoq, Ole Mark, mittarfiit nutaat pingasut atulersinneqarnissaannut atatillugu qatserisartunut annaassiniartartunullu nunamilu annaassiniartartussanut akisussaasoq, nassuiaavoq.

- Timmisartut sorliit mittarfimmi atorneqarnerunersut aallaavigalugu annaassiniarnermut atortussanik piumasaqaatit aalajangerneqartarput. Mittarfitoqqami timmisartut Dash-it 50-it tikillugit ilaasoqarsinnaasut piumasaqaataasimapput, maannali timmisartut soorlu Air Greenlandip Airbusia Tuukkaq 325-nik ilaasoqarsinnaasoq ajutuussappat taanna sullissinnaasariaqarparput.

Mittarfimmi Poca

- Taamaattumik umiatsiat marluk nutaarluinnaat Poca 770GR Patrol pisiaraagut, Qinngutsinnilu umiatsiat talittarfianni annaassiniarnissani piareersimasuutigilerlugit.

- Rafnar-inik umiatsialiorfik Islandimiittoq aamma nunani allani umiatsialiorfiit umiatsianik pisiniannginnermi pulaaqqaarpagut, ilaatigut Portugalimi.

- Poca toqqarneqarsimavoq umiatsiat taamaattut aalisartunit piniartunillu atorneqartorujussuummata. Poca-tik nuannaraat, umiatsiat taama ittut nunatsinni pissutsinut naleqqussangaammata, misilittagaqarfigilluarneqarmatalu. Poca-mik toqqaanerup iluaqutissartaanut ilaavoq umiatsiat taamaattut najukkami iluarsaanneqarsinnaanerat – najukkamilu sannaviit kingoraartissanik peqareertarnerat, Ole Mark oqaluttuarpoq.

- Imaatigut annaassiniarsinnaaneq ulloq unnuarlu, sapaatip akunnerani ullut tamaasa atorsinnaasariaqarpoq, taamaattumik kingoraartissanik amigaateqarneq pissutigalugu unittoorsinnaanngilagut. Taamaammat Poca toqqassallugu nunatsinni ajunngilluinnarpoq.

- Umiatsiat nutaat atorlugit arlaleriarluta sungiusarsimavugut, Angallannermullu Aqutsisoqarfiup, Nuummi mittarfimmi qatserisartut annaassiniartartullu tamarmiusut atortuinik akuersisussaq, Pocamik toqqaanerput naammagisimaarsimavaa.

Aquttarfik matoqqasoq

- Umiatsiat nutaat ilaatigut matoqqasumik aquttarfeqarput. Tamanna annaassiniarnermi radiokkut attaveqarluarnissaq eqqarsaatigalugu iluaqutaangaatsiassaaq. Umiatsiami ammasumi 30 knobinik sukkassuseqarluni radiokkut tusarnaarlunilu oqalunneq ajornarluinnarpoq, Ole Mark nassuiaavoq.

Umiarsuit nutaat annaassiniarnermut atortussarpassuaqarput – faktaboks takuuk. Umiatsiat taakkua pingaarnertut suliassaraat gummibådit pullattakkat ajutoorfimmut assartornissaat. Umiatsiat aamma ujaasinermi peqataasinnaapput, kissassutsimillu uuttuutitalimmik Flir-imik aamma assiliiveqarlutik.

Umiatsiat mittarfiup qatserisartui annaassiniartartuisalu inuttaannik inuttalerneqarput. Nuup mittarfiani qatserisartunit 25-usunit 16-it imaani annaassiniartartutut ilinniarsimapput. Pissutsini ilungersunartuni umiatsiat marluk annaassiniutissat katillugit ataatsimik ilitsersuisartumik imaanilu annaassiniartartunik arfinilinnik inuttaqarsinnaapput.

Greenland Airports Ilulissani mittarfissami Poca 770GR-nik marlunnik allanik pisinissamut isumaqatigiissuteqarpoq.