KL

DK

NUUK INTERNATIONAL AIRPORT

Mittarfittaap nalliuttorsiutigineqarnissaa

Sisamanngorneq 28. november 2024 ullorsiorfiussaaq - ulloq tamakkerlugu - Nuup mittarfiata nutaap atulerneranut atatillugu. Pisortatigoortumik ammaanersiorneq pissaaq Air Greenlandip timmisartorsuata Tuukkap Nuummut tikilernerani Nuup Katersortarfiani sarsuatitakkut toqqaannartumik isiginnaaqatigiinnikkut, nal 12:00-miit. Pilersaarutit malillugit timmisartorsuaq 12:35 oqaluttuarisaanermi siullermeerluni Tuukkaq Nuup mittarfianut mittussaanera eqqorlugu. Tamannali sioqqullugu aqqut København-Nuuk/Nuuk-København Air Greenlandimit aamma malunnartinneqassaaq.

Timmisartorsuaq Norsaq Kalaallit Nunaanni naggataarmat marsip qulingani 2023-mi. Maanna ukioq ilivitsoq qaammatillu arfineq pingasut qaangiunnerani Tuukkaq nutaaliaanerusoq, anginerusoq, piffissamullu naleqqussagaasoq Nuummut siullermeerluni tikissaaq, tamannalu ullup ingerlanerani malunnartinniarneqassaaq Nuuk International Airport pisortatigoortumik ammarneqarpat.
Jensine Berthelsen
Tusagassiortoq
Saqqummersinneqarpoq

Pisortatigoortumik ammaanersiorneq Greenland Airportsip aaqqissugaa aallartinneqassaaq Nuup katersortarfiani ullup qeqqanut, taamaalinerani sarsuatitakkut isiginnaarneqarsinnaassaaq Tuukkap Nuummut tikikkiartornera minneralu. Pilersaarutit malillugit Tuukkaq mittussaavoq nalunaaqutaq 12:35

Greenland Airportsip pisortatigoortumik ammaanersiornerata saniatigut aamma Air Greenland aqqummik ammaanersiorluni malunnartitsisussaavoq. Tamanna pissaaq danskit nalunaaqutaat malillugu 09:00 aallartittumik, nunatsinnukariartortarfimmi ilisimaneqarluartumi B10-mi.

Pisussat tulleriaarnerat paasiuminartunngorlugu matumani saqqummiunneqassaaq:

København-Nuuk

Københavnip mittarfiani utaqqisarfimmi ilisarnartumi gate B10-mi pisussaq. Tassani pilersaarutit naapertorlugit pisoqangaatsiassaaq oqalugiartoqarlunilu aqqutip ammarneqarneranut tunngatillugu aaqqissuussisoqassaaq.

09:00: Ullormut timmisartumi inuttat ataatsimoorlutik assilisaanerat

09:15: Gate ammarpoq - Juice aamma kaagi ilaasunut tamanut

09:45: København-Nuuk aqqutaa ammarneqassaaq -

Oqalugiartut:

  • Hr. Jacob Nitter Sørensen - Air Greenland Group-imi pisortaaneq
  • Hr. Kim Kielsen - Aalisarnermut Piniarnermullu Naalakkersuisoq
  • Hr. Lars Løkke Rasmussen - Nunanut allanut Ministeri, Danmark
  • Hr. Nicolai Wammen - Aningaasaqarnermut Ministeri, Danmark

10:05: ‘Qalersaq qiorneqassaaq’ aammalu assiliseqatigiittoqassaaq

10:15: Ilaasut timmisartumut ikinissaat ammarneqassaaq

10:45: Tuukkaq Nuummut aallassaaq

12:35: Tuukkaq Nuummut tikissaaq

Nuuk-København

11:45: GL 782-mut Københavniliartussamut check-in ammassaaq

Gate 1-mi aaqqissuussineq

12:00: Café SUMUT-mi kaffeqarlunilu kaageqassaaq ilaasunut tamanut 

13:45: Nuuk-København-mut aqqut ammarneqassaaq -

Oqalugiartut:

  • Hr. Malik Hegelund Olsen, Siulersuisuni siulittaasoq - Air Greenland Group
  • Hr. Kjeld Zacho Jørgensen, Siulersuisuni siulittaasoq - Greenland Airports

Katerisimaarnermi erinarsuut

13:55: Malunnartitsilluni ‘qalersap kipineqarnera’ assilisinnerlu

14:00: Ilaasut timmisartumut ikiartornerat aallartissaaq utaqqisarfiullu silataani aaqqissuussisoqassaaq

14:15: Air Greenlandip Kalaallit Airportsimut tunissutaa tunniunneqassaaq

  • Hr. Jacob Nitter Sørensen, CEO - Air Greenland Group
  • Hr. Jens Lauridsen, CEO - Greenland Airports

14:30/14.45: Tuukkaq aallassaaq

Nuup mittarfiani nalliuttorsiornerit

Tuukkaq Nuummut tikeraarnerani atatillugu Greenland Airports aamma tikilluaqqusilluni nalliuttorsiorneq piareersarpaa.

Nalunaaqutaq 12:35 Københavnimiit Nuummut timmisartup toqqaannartup siulliup tikinnerani pisortatigoortumik nalliuttorsiorneq aallartissaaq. 

Mittarfiup qatserisartuisa biilii nutaat qullitik ikittaartillugit, imermik tissaluttaajutigalutik, inissitsitersimallutik timmisartoq tikilluaqqussavaat. Terminalip eqqaani illoqarfimmi meeqqat atuarfiini atuartut erfalasulerlutik nalliuttorsiorpalaartumillu takutitsillutik ilaasut siulliit tikilluaqqussavaat, tamatumalu kingorna timmisartoqarfiup iluani qaaqqusanut aaqqissuussineq ingerlanneqassaaq, tassani ilaatigut Naalakkersuisut Siulittaasuat Múte B. Egede oqalugiassalluni.

Tuukkap mittarfimmi minnera takusarneqarsinnaavoq, kisianni timmisartoqarfik pisoqarfiuallaanngimmat eqqumaffigineqartariaqarpoq, taamaattumik inissaqarpallaannngilaq aammalu security aqqutigineqarsinnaanani, Greenland Airports ilisimatitsivoq.

Ammasumik kaffillerneq aammalu aliikkusersuineq katersortarfimmi nal. 12:00-miit 17:00-mut

Nuup katersortarfia nalliuttorsiornermi qitiusumik katersuuffiussaaq.

Tassani innuttaasut tamarmik kaffisoriaqquneqarput, tassanilu Tuukkap mittarfimmi minnera pisullu skærmersuami toqqaannartumik aallakaatinneqartut, toqqaannartumik malinnaavigineqarsinnaapput. 

Ilaatigut Hinnarik, Naja P ammalu Paaliit ilaqutariinnut tamaginnut aliikkusersuissapput nipilersussallutillu aammalu soorunami kaffeqarpoq kaageqarlunilu.

Qummoroortarnersuaq NC-p qulaaniit 

Unnukkut qaaqqusanut nereqatigiinnermik aammalu illoqarfiup qeqqani nal. 21.30 - 21.40 alutornarluinnartumik nipilersortoqarluni qummoroortartoqarlunilu, nalliuttorsiornerit naggaserneqassapput.

Nuuk tamakkerlugu nalliuttorsiornermi tassani, qilaap taartup tungaani qaamasussami Nuummi innuttaasut katersuunnissamut misigisaqarnissamullu periarfissaqassapput aammalu Nuuk International Airport-ip ammarneqarnerata malunnartinnerani illoqarfiup qeqqani, Greenland Airports ilisimatitsivoq.

samfund inuiaqatigiit nuuk international airport greenland airports air greenland

ATORFIIT Se alle jobs

Powered by Labrador CMS