Modi Putinimut neriorsuivoq Ukrainemi sorsunnerup unitsinnissaanut ikiuutissalluni
Indiami naalakkersuisut siulittaasuata Ruslandimut tikeraartup, Ruslandip aqutsisui assigalugit, eqqissisimanissamik qulakkeerinninnissaq pingaartippaa, Putinip oqaaseqartartua taamak oqarpoq.
Indiamiut præsidentiat, Narendra Modi, Moskvami tikeraarnermini Vladimir Putin-imik eqitaarinnittoq takuneqarpoq.
Gavriil Grigorov/Ritzau Scanpix
Aaqqiagiinngissutit sorsunnikkut naammassineqartassanngillat. Oqaloqatigiinnikkulli aaqqinneqartassapput.
Taamak oqarpoq Narendra Modi, Indiap ministeriunera, marlunngornermi Ruslandip præsidentiata, Vladimir Putinip tikeraarnerani, taanna ukiunik pingajuat qiteqqullugu maanna ingerlasumik nunamut sanilerisaminut Ukrainemut sorsunenrmi siuttuuvoq.
- Nunarsuaq ukiuni kingullerni tallimani arlalippassuartigut ajornartorsiuteqarpoq, siullermik covid-19 tamatumalu kingornatigut akerleriinnerit assigiinngitsut aqqusaarneqarlutik.
- Raketit qaartartullu igeriuttakkat ajornartorsiutinik aaqqiinissamut ikiuutaanngillat. Oqaloqatigiinnerup eqqissisimasup aqqutaa pisariaqartinneqarpoq, russit naalagaaffiata nutaarsiassaqartitsiviata Tass naapertorlugu Modi taamak oqarpoq.
Putinip oqaaseqartartua, Dmitrij Peskov, issuarneqarpoq, præsidentip Ruslandimeersup aamma Modip naapinnerat Ukrainemut tunngatillugu oqaloqatigiinnerit pitsaasumik ingerlanneqarsimasut.
India sorsunnermi eqqissisaasuusussatut inissinnianngilaq, taanna oqarpoq. Kisianni Modi aamma Ruslandip aqutsisui assigalugit eqqissineq tapersersorpaat, taanna oqarpoq.
Modi ataasinngornermi Moskvamut, Ruslandip illoqarfiisa pingaarnersaannut, tikippoq. Tassani ullunik marlunnik sivisutigisumik pisortatigoortumik tikeraarpoq.
- Sorsunnerup aaqqiivigineqarnissaanut ikiuunnissamut piareersimavugut, Ukrainemi sorsunneq innersuussutigalugu Modi oqarpoq.
Indiami ministeriunerup Putinimut attaveqarnini ikinngutigiinnertut taavaa.
Kisianni tamanna uniffiginagu aamma oqaaseqarpoq, Kyivimi, Ukrainep illoqarfiisa pingaarnersaanni, meeqqanut napparsimmavimmut saassussisoqarsimanera innersuussutigalugu.
Rusland saassussisuusimasutut Ukrainemit pasineqarpoq.
- Ikinngutitut oqaatigaara, siunissami kinguaatsinnut qaamanerusumik siunissaqarnissaat anguniarneqartariaqartoq, tamannalu pissappat eqqisseqatigiinneq pisariaqarluinnarpoq.
- Meeqqat sussuseqanngitsut toqutaagaangata, uummatikkut tamanna annernartuuvoq, anniaallu nammanneqarsinnaanngitsutut misinnartarpoq, nutaarsiassaqartitsivik AFP malillugu Modi nangilluni oqarpoq. Taassuma Ukrainemi imaluunniit Kyivimi pisutsit taamak oqarnermini toqqaannartumik taanngilai.
Ruslandip ilumuunnginnerarpaa saassussinerup taassuma tungiminneersimaneragaanera. Ruslandip aqutsisoqarfianiit oqaatigineqarpoq ukrainimiut qaartartunut igeriussanut nakkartitseriassutaasa napparsimavik eqqorsimagaa.
Suli nalunarpoq inuit qassit pisumi tassani ajunaarsimanersut.
Kyiv tassaaginnarpoq illoqarfinnik anginerusunik saassussinermi eqqugaasut ilaat, Ruslandip qaartartumeerilluni marlunngornermi saassussinerani eqqugaasoq.. Nunap immikkoortuini tamani inuit minnerpaamik 38-it ajunaarput.
Nunat allat - pingaartumik nunat killiit - Ruslandimut attaveqarneq minnerpaaffimmiitilerpaat Ruslandip Ukrainep nunaminertaanik tiguaniarnermini saassussilluni aallartinnerata kingorna, Indialli attaveqaqatigiinnermik aamma niueqatigiinnermik attaveqarnerit ingerlatiinnarpai.
/ritzau/
