Motzfeldtip angalanini nangippaa: Frankrigimi ministeri qutsavigaa
Nunanut allanut tunngasunut naalakkersuisup Vivian Motzfeldtip (S) Frankrigip nunanut allanut ministeria marlunngornermi ataatsimeeqatigaa, Donald Trumpillu tatisinerani Frankrigip tapersersuineranut qutsavigalugu.
Vivian Motzfeldt Frankrigillu nunanut allanut ministeria Jean-Noël Barrot. Danmarkip Parisimi aallartitaa Hanne Fugl-Eskær aamma ataatsimiinnermi peqataavoq.
Assi: Naalakkersuisut
- Trumpip Kalaallit Nunaannik tiguserusunnerminik oqariartornerata kingorna, Frankrig nunanut siullernut ilaalluni kalaallinik innuttaasunik tapersersuinerminik erseqqilluinnartumik oqariartorpoq, Vivian Motzfeldt franskit nunanut allanut ministeriat Jean-Noël Barrot marlunngornermi ataatsimeeqatigereerlugu oqarpoq.
Naalakkersuisoq Vivian Motzfeldt angalaarpoq. Bruxellesimi EU-p nunanut allanut tunngasunut pisortaa Kaja Kallas sapaatit akunnerata siuliani ataatsimeeqatigaa, Parisimilu Frankrigip nunanut allanut tunngasunut ministerianit marlunngornermi tikilluaqquneqarluni.
Piffissami tatineqarfiusumi EU-p, ingammik Frankrigip, Kalaallit Nunaannut tapersersuinerat pissutigalugu ataatsimeeqateqarnissaq Naalakkersuisut qinnutigisimagaat tusagassiutinut nalunaarummi allappoq. Taamaattumillu Naalakkersuisut Vivian Motzfeldt Europami aalajangiisartunik, ilaatigut franskit naalakkersuisuinit aallartitanik, ataatsimeeqateqarnissaanik qinnuigaat.
- Frankrig nunat tamat akornanni naapitsinissanik siunertalinni nunatut siullertut tikeraarparput, maanilu Naalakkersuisut sinnerlugit Frankrigip piffissami ajornarkusoorfiusumi tapersersuineranut qujaniarnerput oqaatigaara, Vivian Motzfeldt marlunngornermi ataatsimiinneq pillugu oqarpoq.
Kalaallit Nunaanniit EU-mut attaveqarneq ineriartortinneqarusuttoq Frankrigimi ministeri oqaloqatigereerlugu aamma oqarpoq:
- Oqaloqatigiinnerit suleqatigiinnerillu nunat assigiinnik naleqartitaqartigisatut ilisimasavut siulliullugit aallartitsiffigissavagut. Aatsitassarsiornermik aatsitassanillu qalluinermi peqataasinnaanermut periarfissaq, ingammik nunanik inatsisinik toqqammaveqarluni periutsinik, tamat oqartussaanerannik, innuttaminnillu pisussaaffimminnik eqqortitsinermik ileqqoqartunik oqaloqatigiissutigineqassapput, aatsitassanillu qalluineq pillugu suleqatigiinnissamut ammanitsinnik oqariartuut nassarpara, Vivian Motzfeldt oqarpoq.
Nunanut allanut ministeri Barrot Kalaallit Nunaannut aamma qaaqquneqarpoq.
