Motzfeldtip EU piffissami ajornakusoornartumi tapersersuineranut qutsavigaa
Piffissami Kalaallit Nunaata ajornakusoorfigisaani suleqatitsinnik tutsuiginartunik, uatsitulli pingaartitaqartunik qaninnerulernissarput pingaaruteqarpoq, Vivian Motzfeldt EU-mi ataatsimeereernermi kingorna oqarpoq.
Vivian Motzfeldip ilaatigut EU-p Nunanut Allanut Sillimaniarnermullu Politikimut Sinnissaa nuimasoq Kaja Kallas ataatsimeeqatigaa. Motzfeldtip EU-p pingaarutilittut tutsuiginartutullu suleqataalluni aalajangersimasumik tapersiisarnera qujassutigaa.
Foto: Naalakkersuisut
Nunanut allanut ilisimatusarnermut Naalakkersuisoq Vivian Motzfeldt, sapaatip akunnerani uani Bruxellesimiippoq, tassanilu EU-mut nunanut allanut sillimaniarnermullu politikimut pisortaa Kaja Kallas ataatsimeeqatigaa.
Vivian Motzfeldip Kaja Kallas EU-p pingaarutilimmik tutsuiginartumillu Kalaallit Nunaannut tapersiisarneranik qutsavigaa, ataatsimiinnermilu aatsitassanut tunngasut Kalaallit Nunaannut EU-mullu illuatungeriilluni iluaqutsissatut suleqatigiinnermik ineriartortitsinermi immikkoortutut pingaarutilittut erseqqissarneqarput:
- EU Kalaallit Nunaata pingaarutilimmik suleqatigiuarpaa. Piffissamilu Kalaallit Nunaata ajornakusoorfiani tatiginartunik suleqatitsinnut, uatsitulli naleqartitaqartunut qanillinissarput pingaaruteqarpoq, Vivian Motzfeldt tusagassiutinut nalunaaruteqarnermini allappoq.
Missingersuutit pillugit isumaqatiginninniarnerit oqaluuserineqartut
Amerikamiut præsidentiata Donald Trumpip Kalaallit Nunaannik tigusinissamik kissaateqarneranut, Naalakkersuisut nutaat annertunerusumik EU-mik samminninnerunissaanik qisuariarneranut tunngatillugu isineqassaaq.
Vivian Motzfeldip ilanngullugu Kaja Kallasimik kiisalu EU-kommissærinik Jozef Síkelamik Dan Jørgensenimillu ataatsimeeqateqarneq nuannaarutigalugu oqaatigaa.
Motzfeldip EU-p ukiuni arfineq marlunni tullerni missingersuussiorfiani isumaqatiginninniarnissat kommissærinik marlunnik oqaloqatigissutigai. Missingersuutinut Kalaallit Nunaata EU-mik suleqateqarnerani piffissami pineqartumi aningaasaliissutit 1,7 mia. kr-t ilaapput:
- Ataatsimoorluta Kalaallit Nunaata EU-llu akornanni pissutsit nukittorsaqqinnissaat isumaqatigiissutigaarput. Kalaallit Nunaannut EU-mullu iluaqutaasumik suleqatigiinnerup annertusarnissaanik oqaloqatigiinnerit nanginnissaat qilanaaraara, Motzfeldt oqarpoq.
