Motzfeldtip kilitsissiaqartoqarsinnaanera assuaraa
Kilitsisiaqarnikkut ingerlatsineq tatiginninnermik ataqqeqatigiinnermillu takutitsinngitsoq nunanut allanut tunngasunut naalakkersuisoq oqarpoq.
- Ikinngutigiit iligiillu akornanni ataqqeqatigiinnissaq tatigeqatigiinnissarlu pisariaqarput, kilitsisiaqarnikkullu ingerlatsineq, taamaattoqarsimappat, tatiginninnermik ataqqeqatigiinnermillu takutitsisuunngilaq, Vivian Motzfeldt oqarpoq.
Assi: Leiff Josefsen
Naalagaaffeqatigiinnermut iligiinnullu tunngatillugu ataqqeqatigiittumik tatigeqatigiittumillu attaveqarnissaq pingaaruteqartoq nunanut allanut tunngasunut naalakkersuisoq Vivian Motzfeldt (S) isumaqarpoq.
Taassuma Wall Street Journal-imi allaaserisaq sapaatit akunnerisa siulianni saqqummertoq qisuariarfigaa. USA-mi atorfilittat amerikamiut isertortumik paasiniaasartuinut Kalaallit Nunaanni kilitsissiaqarnerulernissamik piusaqarput, Kalaallit Nunaannilu namminiilivinnissamik suliniuteqartoqarnera amerikamiullu pisuussutinik piiaassagaluarpata kalaallit qanoq isumaqarfigineraat paasiniarneqarusuppaat.
Naalakkersuisup amerikamiut Kalaallit Nunatsinni kilitsissiaqarniarnialersaarlutillu sunniiniarniarnerat Wall Street Journalimi allaaserineqarnera maluginiarpai, isumannartillugillu:
- Ikinngutigiit iligiillu akornanni ataqqeqatigiinnissaq tatigeqatigiinnissarlu pisariaqarput, kilitsisiaqarnikkullu ingerlatsineq, taamaattoqarsimappat, tatiginninnermik ataqqeqatigiinnermillu takutitsisuunngilaq, Vivian Motzfeldt oqarpoq.
Tassungalu atatillugu Kalaallit Nunaata nammineerluni nunanut allanut politikimik ingerlatsisinnaaneranut periarfissanik pilersitsinissap pingaaruteqarnera Naalakkersuisup aamma oqaatigaa, taamaaliornermi naalagaaffeqatigiinni tatigeqatigiinneq ataqqeqatigiinnerlu tunngavigineqassallutik.
Maannakkut Danmarkip naalagaaffiup nunanut allanut sillimaniarnermullu politikkia aalajangertarpaa. Kisianni tamanna allanngortinneqartariaqarpoq siunissami - aamma inatsisit allanngortinneqartariaqaraluarpata, isumaqarpoq:
- Tatigeqatigiinnerput ataqqeqatigiinnerpullu ineriartortinneqassappat, naalagaaffeqatigiinnermi sinaakkutit nutarterneqartariaqarput, aamma tamanna pisariaqartumik tunngaviusumik inatsimmik allannguinissamik pisariaqartitsinermik kinguneqaraluarpalluunniit, Vivian Motzfeldt oqarpoq.
Issittumi siunnersuisoqatigiinni siulittaasuuffiup akisussaaffigilernissaa pillugu angalasoq
Nunanut allanut naalakkersuisup Vivian Motzfeldtip nunanut allanut ministerilu Lars Løkke Rasmussen nunanut allanut ministereqarfiup allaffeqarfiani, Det Asiatiske Pladsimi, Københavnimi talimanngornermi kaffisoqatigiipput.
Taakku Kalaallit Nunaata Issittumi Siunnersuisooqatigiinni siulittaasuutitaqalernissaa oqaloqatigiissutigaat. Vivian Motzfeldtip siulittaasoqarfiup pisortatigoortumik Tromsømi ataasinngorpat tunniuneqarnissaanut peqataaffigiartorlugu angalavoq.
Nunap inooqqaavi inuillu Issittumi najugaqartut siulittaasuutitaqarnissami immikkut inissisimaffeqarnissaat Lars Løkke Rasmussenimik kaffisoqateqarnermi nunanut allanut ilisimatusarnermullu naalakkersuisumit erseqqissarneqarpoq.
