USA-MI PRÆSIDENTISSAMIK QINERSINEQ
Múte: Amerikami illuatungeriit tamarmik nunatsinnik suleqateqarluarnissamik pingaartitsipput
Amerikamiut 244 millionit missaanniittut ullumikkut periarfissaqarput qinersinermikkut ukiuni tulliuttuni sisamani præsidentissaminnik aalajangeeqataanissaminnut. Nunatsinni Naalakkersuisut siulittaasuat, Múte Bourup Egede (IA), ulloq qinersivimmi malinnaavoq. - USA-mik suleqateqarnerput annikilleriarani ingerlaannassasoq naatsorsuutigaara, aamma qinersinermi ajugaasussaq kinaassanersoq apeqqutaatinnagu, taanna Sermitsiamut oqarpoq.
Naalakkersuisut siulittaasuat, Múte Bourup Egede (IA), ulapputissaqaraluaqaluni ullumi marlunngornermi novembarip 5-ani 2024-mi USA-mi qinersinermi sumut killittoqarnera qissimillattaarpaa. Mútep naatsorsuutigaa USA, præsidentinngorumaartussap qalipaataa apeqqutaanavianngitsoq, sulilu pitsaasumik nunatsinnut attaveqarluarnissaminik soqutiginnissasoq.
Assiliisoq: Leiff Josefsen
Kalaallit Nunaat Amerikap avannarliup nunatarsuaniippoq, aamma sorsunnerup aappaata kingorna kiisalu sorsunnerup nillertup ingerlanerani qaangiunneratalu kingorna (12. marts 1947 - 3. december 1989, aaqq.) USA-mit Kalaallit Nunaat soqutigineqarluartuarnikuuvoq sulilu soqutigineqarluarluni.
- Isumaqarpunga amerikamiut naalakkersuinermik soqutigisallit tamarmik paasereeraat Kalaallit Nunarput tuniniagaanngitsoq, taamaattorli USA-mik suleqateqarnerput pingaartitarigipput, aamma kinaluunniit aquummik tigumminnikkaluarpat, Naalakkersuisut siulittaasuat, Múte Bourup Egede (IA) akivoq aperineqarami Trump ajugaassappat nunatsinnullu tunngatillugu isumaliutigisimasaminik ingerlatseqqilissagaluarpat, tassalu nunatta pisiarineqarnissaanik soqutiginninnini ingerlateqqilissagaluarpagu.
Kalaallit Nunatta piffissap ingerlanerani nunanut allanut politikkikkut pisinnaatitaaffii piginnaasaalu annertusisimapput, pingaartumik 2009-mi, tassani namminersornerullutik oqartussat inatsisaat aamma pisinnaatitaaffiit pillugit inatsit taarserneqarmata namminersorneq pillugu inatsisimmik, taamaalillunilu nunatta pisinnaatitaaffii annertusinikuummata, tunngaviusumik inatsisip iluani killissarititaasut naapertorlugit.
Ataatsimoorussamik nalunaarut Joint Committee,
Joint Committee tassaavoq Kalaallit Nunaata USA-llu akornanni naalakkersuinikkut suleqatigiinnermut tunngaviliisuuvoq. Siunertaraa suleqatigiinnerup nukittorsarnissaa aammalu suleqatigiinnerup siammasissumik annertusarnissaa Kalaallit Nunaata USA-llu akornanni aammalu anguniakkat immikkut ittut naammassisassatut pilersaarut naapertorlugu, tassaniilluni “Ataatsimoorussamik pilersaarut”, Pituffimmik paasinnittaaseq tunngavigalugu, oktobarimi 2020-mi atsiorneqarsimasoq.
Paasissutissat: Ataatsimoorussamik nalunaarut Joint Committee, Qaqortoq 28. september 2023
Naalakkersuisut siulittaasuat, Múte Bourup Egede (IA) naammagisimaarinnippoq USA-mik suleqatiginninneq ingerlaavartumik ineriartortinneqarmat, aamma maanna suleqatigiinnerup nutartikkap atuutilersinneqarnera nunat suleqatigiit akornanni, pingaartumik Joint Committee aqqutigalugu.
- Amerikami parteersuit anginerusut marluullutik tamarmik uppernarsartarpaat Kalaallit Nunaannik qanimut suleqateqarnissamik kissaateqarlutik. Taamaattumik aamma anguniakkat erseqqissut ataatsimoorussavut tunngavigalugit suleqatigiippugut. Suleqatigiinnerup taassuma nukittorsarneqarnissaa naatsorsuutigaara, USA-mi præsidentiusussatut qinigaasussaq sorliussagaluarpalluunniit, Naalakkersuisut siulittaasuat, Múte Bourup Egede (IA) Sermitsiamut oqarpoq.
Naleqartitat demokraatiskiusut pingaartinneqarnissaat ingerlaannarnissaallu pingaaruteqarpoq
Aperineqarami USA-p præsidentissaanik immikkut kissaateqarnerluni, oqaatigaa amerikamiut qinersisartut tassaasut præsidentiminnik tullianik qinersisinnaatitaallutillu aalajangiisussat, aammalu Naalakkersuisut siulittaasuattut qinersinerup inerneranik ataqqinninnissani oqaatigaa.
USA-p konsulatia Nuummiittoq, ullumikkut marlunngornermi USA-mi demokratiip ulluanni nalliuttorsiornermut peqataavoq.
Assiliisoq: Leiff Josefsen
- Kisianni USA-mi innuttaasut namminneq aalajangigassarigaluaraat kina præsidentissatut qinerusussanerlugu, tamanna nunarsuarmioqatigiinnut tamanut pingaaruteqarpoq, pingaartumik nunanut demokraatiskiusunut. Taamaattumik Harris imaluunniit Trumpiluunniit arlaat qinerneqaraluarpat, suleqatigiinneq nunat tamalaat isumaqatigiissutaannut inatsisinullu naapertuuttumik, minnerunngitsumillu inuit pisinnaatitaaffiinut naapertuuttumik ingerlaannarnissaa pingaaruteqarpoq.
- Ulluni makkunani aqqusaartukkavut imaannaanngillat aamma isummersorfigisariaqarpagut, tassami amerlasuutigut eqqissiviilliornerit, akerleriinnerit aamma alianaraluaqisumik sorsunnerit ingerlanneqarput. Aamma nalunngilarput, USA-mi patajaatsumik ingerlatsisoqaraangat, tamanna aamma nunarsuarmioqatigiinnut patajaallisaataasutut sunniuteqartartoq, taamatullu nunat imminnut iligiittut isigisut akornanni suleqatigiinneq nukittorsarneqartartoq, taakkulu uagut aamma ilagivagut, Naalakkersuisut Siulittaasuat naggataatigut erseqqissaavoq.
