KL

DK

Múte B. Egede Fox News-imi: Amerikamioorusunngilagut

Kalaallit siunissartik namminneq aalajangiiffigissagaat Naalakkersuisut siulittaasuata Amerikami tv-kkut apersorneqarnermini erseqqissarpaa.

- Qallunaajorusunngilagut, aammali erseqqissarusuppara: Amerikamioorusunngilagut, Múte B. Egede Fox News-imi sisamanngornermi unnukkut oqarpoq.
Ritzaus Bureau
Saqqummersinneqarpoq

- Amerikamioorusunngilagut aamma qallunaajorusunngilagut. Kalaaliorusuppugut.

Naalakkersuisut siulittaasuata Múte B. Egedep (IA) Amerikami tv-qarfimmut Fox Newsimut republikaneriusumut sisamanngornermi unnukkut arlaleriarluni taama oqarpoq.

Kalaallit Nunaat pillugu sapaatip-akunnerani kingullermi oqallittoqangaatsiarnera USA-milu præsidentinngortussap Donald Trumpip Kalaallit Nunaat USA Canadalu peqatigalugit Amerikap avannaani nutaatut naalagaaffinngussasut tamanut oqariartuuteqarnera pillugu apersorneqarpoq.

Trumpip Kalaallit Nunaat "ingerlallualerseqqikkuguppaa" — "USA ingerlalluaqqilersikkusullugu" oqaatigisartakkani Kalaallit Nunaannut atorlugu.

Aamma Danmarkip Kalaallit Nunaat USA-mut tunniutinngippagu qallunaat nioqqutissaannut pillaalluni akitsuusiiumaarluni oqariartuutiginikuuaa.

Sillimaniarnerup pitsaanerulernissaa pillugu oqaloqatigiinnissamut ammasoq

Ministeriunerup Mette Frederiksenip Donald Trump minutsit 45-t missaanni pingasunngormat oqaloqatigaa. Pillaalluni akitsuusiiniarluni sioorasaarinini attatiinnarpaa.

Kalaallit Nunaat tuniniagaanngitsoq Múte B. Egedep arlaleriarluni oqaatiaa.

Akerlianilli Kalaallit Nunaat USA-mik suleqateqarnerunissamut piareersimasoq, ilaatigut aatsitassarsiornermut tunngatillugu oqaatigaa. Kalaallit Nunaat suli taamaappoq – pingaartumik "nunarsuarmi maannakkorpiaq pisut eqqarsaatigalugit“, Fox News-imi tallimanngornerup unnuaanioqarpoq.

- Nunani tamani sillimaniarneq uagutsinnut aamma atuuppoq. Issittup illersornissaanut tunngatillugu erseqqinnerusumik oqariartuuteqartassaagut. Nunatta qanoq illersornerusinnaanera pillugu oqaloqatigiinnissaq ammaffigaarput.

- Tunniussassaqarluarpugut, suleqatigiikkusussuseqarlutalu. Taamaattumik USA-p nunatsinnukaluni aningaasaliinissaanut piareersimavugut, Fox Newsimut oqarpoq.

Innuttaasut taasitinneqassappat?

Danmarkimit namminiilivinnissaq pillugu taasititsisoqassanersoq Múte B. Egede Fox News-imi tusagassiortumit aperineqarpoq.

- Kalaallit Danmarkimit avissaassanerlutik namminneq aalajangertussaavaat.

- Kalaallit Nunaat taama iliuuseqarusuppat NATO-mut suli ilaasortaassaagut. Nunat killiit suleqatigerusupparput, nunattalu akornanni suleqatigiilluarnissaq kissaatigaarput, oqarpoq.

Donald Trumpip, Fox News-imi tusagassiortoq naapertorlugu "isumaqatiginninniallaqqissinnaanera“ Kalaallit Nunaata tunineqarnissaanut isummanik allannguisinnaanera pillugu apeqqummut ima akivoq:

- Qallunaajorusunngilagut, aammali erseqqissarusuppara: Amerikamioorusunngilagut, Múte B. Egede oqarpoq.

Tv-eqarfik Fox News republikanerinik tapersersuisuuviq talerperliullunilu. Donald Trump 2016-imi præsidentinngortinneqarmat talerperlernut qaninnerulerput.

/ritzau/

inuiaqatigiit fox news donald trump samfund múte b. egede naalakkersuisut

ATORFIIT Se alle jobs

Powered by Labrador CMS