KL

DK

Múte B. Egede naqissusiivoq: Kalaallit Nunaat nunat assigiinngitsut akornanni politikkikkut soqutigineqarluarpoq

Kalaallit Nunaat qallunaanut amerikamiunulluunniit pigisassaanngitsoq Naalakkersuisut siulittaasuata uteqqiilluni oqaatigaa. Kalaallit Nunaatali siunissaa kalaallit innuttaasuinit ilusilersorneqassaaq. Tusagassiortut ataasinngornermi katersortinneqarmata tamanna oqaatigaa.

Naalakkersuisut siulittaasuat, Múte B. Egede.
KASSAALUK KRISTENSEN
Digitalredaktøri
Saqqummersinneqarpoq

Donald Trumpip USA-p Kalaallit Nunaannik aqutsilernissaanik nalunaaruteqarneranit Kalaallit Nunaat nunarsuarmi tamarmi sammineqarpoq.

Naalakkersuisut siulittaasuata Múte B. Egedep (IA) Kalaallit Nunaata siunissaa Kalaallit Nunaanni innuttaasunit aqunneqartariaqartoq ataasinngornermi tusagassiortunik katersortitsinermi erseqqissarpaa.

- Qallunaajujumanatalu amerikamiuujumanngitsugut uteqattaarsinnaavara. Kalaallit Nunaata siunissaa Kalaallit Nunaanni innuttaasunillu kalaallinit aalajangiiffigineqassaaq, Múte B. Egede (IA) oqarpoq.

Sanilit kasuttortut

Donald Trump juniori Nuummut tikeraareersorlu, pingaartumillu Donald Trumpip præsidentitut ivertinneqarnera sioqqullugu USA soqutiginningaatsiarnera pissutigalugu, Naalakkersuisut siulittaasuat ataasinngornermi ualikkut tusagassiortunik katersortitsivoq.

- Uivissanngilagut. USA soqutiginninnerminik takutitsereersoq nunarsuarmi tamarmi maanna uivertoqarpoq. Piffissamili matumani uivertitsinata eqqarsaatigilluakkanik toqqaassaagut.

- Siunissarput ilusilersorniarlugu ataatsimoorluta eqqarsaatigilluakkanik toqqaasariaqartugut sapaatip akunnerani kingullermi pisut ersersippaat, oqarpoq.

Kalaallit Nunaata namminiilivinnissaanut tunngatillugu aamma taamaappoq, New York Timesimi tusagassiortumut naqissusiivoq.

- Nunarsuarmi pissutsit ilungersunartut Kalaallit Nunaannut sunniuteqartarput. Maannakkorpiarlu Kalaallit Nunaat issittumi naalagaaffissuaqarfiit marluk akornanniippoq. Tamanna aarlerinartutut isigisinnaavarput, aammali suleqatigiinnerulernissamut periarfissatut isigisinnaavarput. Nuna ineriartornissamik soqutigisaqartoq aamma nunanik allanik suleqateqarnissaminut soqutigisaqarpoq, Múte B. Egede oqarpoq.

Suleqateqarnissarput tunuarsimaarfiginngilarput

USA-p Kalaallit Nunaat aqussinnaalerusukkaa Donald Trump siusinnerusukkut oqarnikuuvoq. USA-millu suleqateqarneq aqqutissaasoq naalakkersuisut siulittaasuata tamanna pillugu nangilluni oqaatigaa:

- Pissaanilissuit kasuttorput. Taamaammat nunatsinni suleqatigiinneq qanoq ittoq akuerissanerlugu eqqarsaatigisariaqarparput.

- Aamma isumannaallisaanermut politikkimut tunngasut eqqarsaatigalugit, Amerikamiunik suleqatigineqarnerulernissamut tunngatillugu sakkutooqarfimmi Pituffimmiittumi sakkutooqarnerulernissaq pineqarnersoq Sermitsiap aperimmani oqarpoq.

samfund múte b. egede usa inuiaqatigiit

ATORFIIT Se alle jobs

Powered by Labrador CMS