Múte B. Egedep DR-ip aalajangiinera sakkortuumik isornartorsiorpaa

DR-ip piviusulersaarut ’Grønlands Hvide Guld’ nittartakkaminit pingasunngormat peerpaa aaqqissuisuunerlu piviusulersaarummik suliaqarnermut akisussaasoq soraarsillugu.

IA-p siulittaasuata Naalakkersuisullu siulittaasuata Múte B. Egedep tamanna naammaginngilaa sakkortuumillu isornartorsiorlugu:

- Orsugiak DR-miit maanna peerneqarpoq - Qanoq aamma piviusumik saqqummiineq toqqorterniarneqassava.

- Piviusulersaarummimi saqqummiunneqartut tunngavippiaat toqqorterniarneqalerput, Múte B. Egede Facebookimi allappoq.

Naligiinngitsumik naapertuilluanngitsumillu inuiattut pineqarsimanermi nassuerutigineqarnissaa maqaasivaa, kalaallimmi aningaasartuutaannaasut taaneqartarmata:

- Nunasiaatilittullu iliuuserisimasat pitsaanngitsut toqqortorniarneqarsinnaanngillat, piviusoq oqaluttuarinaveersaarlugu. Piviusulersaarusiorsimasut aammaarlunga qutsavigeqqikkusuppakka, periarfissiimmata ammasumik piviusup saqqummiunneratigut oqallinnissamut, Múte B. Egede allappoq.

DR-ip nutaarsiassaqartitsiviani pisortap Sandy Frenchip pingasunngornermi piviusulersaarusiaq pillugu nutaanik paasissutissinneqarpoq, tamannalu tunngavigalugu piviusulersaarut DR-ip nittartagaanit peerniarlugu aalajangerpoq aaqqissuisuunerlu Thomas Falbe soraarsillugu.

Piviusulersaarummi Ivittuuni orsugiassiorfik sammineqarpoq, piiaaffiullu aningaasaqarnikkut danskit naalagaaffiannut qallunaallu suliffeqarfiinut qanoq pingaaruteqartigisimanera.

Piviusulersaarut Danmarkimi aningaasaqarnermut tunngasunik ilisimasalinnik arlalinnit isornartorsiorneqarpoq, tassani aatsitassarsiorfiup aningaasaqarneranik illuinnasiortumik saqqummiunneqartutut isigineqarluni.

Piviusulersaarut Kalaallit Nunaannili sakkortuumik qisuariarfigineqarpoq, ilaatigut Kalaallit Nunaanni najugaqartut peqataatinnagit pisuussutit nalillit Kalaallit Nunaannit Danmarkimut assartorneqarsimanerat pillugu.