Múte naalakkersuisooqatigiilerneq pillugu: Nunarput pillugu ataatsimuussaagut

Demokraatit, Inuit Ataqatigiit, Siumut aamma Atassut siammasissumik Naalakkersuisoqatigiilernerat ullumi saqqummiunneqarpoq.

Naalakkersuisunut ilaasortanngortut ilagaat naalakkersuisuni siulittaasuusimasoq Múte B. Egede, maanna aningaasaqarnermut akileraartarnermullu naalakkersuisunngortoq.

Naalakkersuisoqatigiit siammasinnerat taassuma naammagisimaarpai:

- Piffissami matumani nunap iluani avissaartuunnata ataatsimoortariaqarpugut. Nunarput nunanit allanit maanna tatiniarneqartillugulu soqutigineqarujussuarnerani aqutseqataaffiginissaa pisussaaffigaarput.

- Isumaqatigiinngissutit illikartillugit isumaqatigiiffigisavut ataatsimoorfigalugit, taamaattumik naammagisimaarpara maannakkut siammasissumik naalakkersuisoqatigiilernerput. Qinigaaffimmilu tulliuttumi suliatsinnut pitsaasunut tunngavissaqalerluta, Múte B. Egede oqarpoq.

Ataqqeqatigiilluni suleqatigiinneq

AAMMA ATUARUK

Naalakkersuisoqatigiinnissamut isumaqatigiissut: Naalakkersuisunngortut suut isumaqatigiissutigaat?

USA-mit annertuumik tatisiniartoqarnerani naalakkersuisoqatigiit isumaqatigiissuteqarput. Tassa præsidentip Donald Trumpip Kalaallit Nunaat aqukkusullugu arlarleriarluni oqariartuutigisaqattaarpaa.

Tamatuma saniatigut USA-mit aallartitat sapaatip-akunnerani matumani Nuummut Sisimiunullu tikeraartussaagaluarput, pilersaarutilli allanngortippaat maannalu Pituffil Space Basemut præsidentip tullia nulianilu, nunap sillimaniarnermut siunnersortaa nukissiornermullu ministeri tikeraartussanngorlutik. Taakku ullumi nalunaaqutaq 13.30 tikissapput.

Taamatut tatineqarnermi Kalaallit Nunaata nammineq aalajangiisinnaanerata illersornissaa pingaaruteqartoq Múte B. Egede isumaqarpoq:

- Nunatta ataatsimut illersornissaa, nunamilu maani nammineq aalajangiisinnaassuseqarnitta illersortuarnissaa tamannami kinguaariinnut ingerlateqqinneqassammat Naalakkersuisoqatigiinnissamut isumaqatigiissummi aamma atuarneqarsinnaavoq. Suleqatigiinneq pissaaq, kisianni ataqqeqatigiittoqassaaq, oqarpoq.

Amerikamiunik suleqateqarneq piviuk? 

- Nunat allat suleqatigisariaqarpavut. Amerikamiulli pissusilersuutaat eqqarsaatigalugu nunatsinni qanoq inissisimanerput takutereerparput. Ataatsimoornerlu piusoq naalakkersuisoqatigiinni tunngavigissavarput, Múte B. Egede oqarpoq.

Aatsitassat pillugit inatsit taamaaginnassasoq

Naalakkersuisoqatigiit nutaat partiinit talerperlerneersunik saamerlerneersunillu ilaasortaqarput. Taamaattumik partiit isumaqatigiinniarnerminni aamma pilliuteqartariaqartut Múte B. Egede oqarpoq.

- Soorunami naalakkersuisoqatigiit siammasissumik tunngaveqarput, taamaattumillu partiit akimorlugit isumaqatigiissuteqassappata pilliuteqartoqartariaqarpoq. Naammagisimaarparali qinigaaffimmi qaangiuttumi suliarisimasavut taamaaginnassammata, Kalaallit Nunaatalu siunissaanut tunngaviliisuussallutik.

Múte B. Egedep IA-mit sorpiaat akuerisariaqarsimanerlugit itisilerusunngilai.

Qinigaaffimmi kingullermi IA Inatsisartuni partiini anginersaavoq. Inatsisartuni ilaasortani 31-usuni aqqanilinnik ilaasortaqarluni. Maanna arfineq-marlunngorput.

2021-mi aatsitassarsiorneq saffiugassallu qineqqusaarutigaat. Naaja H. Nathanielsenip (IA) aatsitassanut inuussutissarsiornermullu naalakkersuisutut aamma maanna ingerlaqqippoq.

Aatsitassanut inatsit qinigaaffimmi kingullermi atuutilersoq taamaaginnassanersoq Múte B. Egedep aperineqarami ima akivoq:

- Inatsit apeqqutigisat atuutiinnarumaartut ilimagisinnaavara. Allatut isumaqatigiissuteqannginnatta.

Aatsitassarsiorneq Kalaallit Nunaata siunissami aningaasaqarneranut pingaaruteqassasoq Naalakkersuisoqatigiit isumaqatigiissutaanni allassimavoq.

"Aatsitassat nunamiittut atorluarneqanngikkunik naleqanngillat, avataaniillu annertuunik aningaasaliinissat pisariaqartinneqarput. Nunanit allanit aningaasaliisartunik pilerilersitsiniarluni suliaqarneq annertusarneqassaaq, soorluttaaq nunanik aatsitassanik eqqussuisunik suleqateqarneq annertusarneqassasoq."