KL

DK

NAALAGAAFFEQATIGIINNEQ

Múte: – Naammagittarnera tassunga killeqarpoq

Naalakkersuisut siulittaasuat, Múte Bourup Egede (IA) DR-ip deadline-iani erseqqissaateqarpoq, nammineq isummani naapertorlugu inatsit tunngaviusoq 1953-nisaq innersuussutigalugu danskit naalakkersuisuisa, Danmarkip naggataatigut aalajangiisuusussaaneranik oqarfigineqartarneq naammalersoq. - Naligiittoqanngilaq, taanna oqarpoq.

Naalakkersuisut siulittaasua apersorneqarnermini suliat aalajangersimasut pillugit, tassa meeqqat kalaallit pinngitsaaliissummik arsaarinnissutigineqartarnerat aamma spiralilersuisimanermi suliat akissutissarsiniarfigineqarpoq, aammali naalagaaffeqatigiinnermut tunngatillugu DR-ip Deadline-ani apersorneqarpoq.
Jensine Berthelsen
tusagassiortoq
Saqqummersinneqarpoq

Naalakkersuisut sulissuteqarpat naalagaaffeqatigiinnerup innuttaasunit aalajangiiffigineqarnissaa namminersorluni oqartussaanerup inatsisaa malillugu, aammalu Kalaallit Nunaat namminersulernissaanut taasisitsisoqalerpa?

Naalakkersuisut siulittaasuat, isummani malillugu, ersarissuliorpoq Kalaallit Nunaata Danmarkillu akornanni (pitsaanngitsumik) ataqatigiinnerat pillugu.

- Qaquguluunniit naligiittoqalerniavianngiaq, tunngaviusumik inatsiseqartillugu Kalaallit Nunaanni innuttaasut akuerinikuunngisaannik atuuttoqartillugu. Tassa taanna (tunngaviusumik inatsit, aaqq.), danskit naalakkersuisuisa atortuartagaat, suliassat naligiinnermik aallaaveqarluni qaffasissuseqartut qaqinneqaraangata.

- Taamaalilluni danskit naalakkersuisui danskillu naalagaaffiat inatsisitigut aningaasaqarnikkullu piginnaaneqarput, inuiaqatigiit namminneq nunaminni pisinnaatitaaffeqarfigisassarigaluagaannik namminnerlu aalajangiiffigisinnaasaraluagaannik, Múte Bourup Egede ilaatigut naalagaaffeqatigiinneq pillugu oqarpoq. Taassumalu erseqqissaatigaa taakku marluk pigineqanngippata, naalagaaffeqatigiinnertut taaneqartartoq naligiinnginnermik aallaaveqartuassaaq.

Tunngaviusumik inatsit naligiinnissaraluamut akornutaavoq

Ukiuni kingulliunerusuni naligiittoqaleriartorsimannginnersoq aperineqarami, Naalakkersuisut siulittaasuat uppernarsaavoq taamaattoqartoq, kisianni:

- Qaquguluunniit naligiinneq anguneqarnavianngilaq, inatsit tunngaviusoq 1953-nisaq atuukkallartillugit, tassami taanna danskit naalakkersuisuisa atortarpaat, suliniutaasunik angorusutanillu unitsitsiniaasarnerminni, tamannalu maanna nassuerutigisariaqarparput, Múte Bourup Egede akivoq.

Apersuinermi aamma sammineqarpoq Kalaallit Nunaata siunissami USA-mut attaveqarnerata iluserilersinnaasai, aammalu USA-p Kalaallit Nunaannut soqutiginninnerujussua Kalaallit Nunaata namminersulernissaanut iluaqutaasinnaanersoq.

Tassunga atatillugu Naalakkersuisut siulittaasuata oqaatigaa suleqatigiinnerup annertusarneqarnera tassaasoq "pissusissamisoortumik ineriartornerusoq"nunat sanileriit suleqatigiinnerisa ineriartortinneqartarnera.

Múte aperineqarami naalagaaffeqatigiinneq killissaminut pisimamersoq, Bourup Egede akivoq:

- Isumaqarpunga aamma arlaleriarlunga oqaatigereerlugu, inissisimanerput attanneqarsinnaanngitsoq, isumaqarpungalu tunngaviusumik inatsit Kalaallit Nunaata siunissaanut pissusissamisoortumik ineriartornissamut tamatigut killilersuisuusoq, ammanerorusunnerpummi aamma nunarsuarmioqatigiinni periarfissarissaarnerulernissarput anguniagarput tassannga killilerneqartuarpoq.

Spiralilersuisimanermut aamma pinngitsaaliilluni arsaarinnittarnermut tunngatillugu aammalu taakku sioqqullugit kingornalu oqaluttuarisaaneqaqatigiinnermi pisarsimasut ilungersunartut innersuussutigalugit, Naalakkersuisut siulittaasuat naggasiivoq oqarluni utaqqisinnaassutsini tassunga killeqartoq.

Naalakkersuisut siulittaasuanit itisiliisitsinissaq Sermitsiamit sulissutigaarput.

inuiaqatigiit formand for naalakkersuisut deadline rigsfællesskabet samfund múte bourup egede

ATORFIIT Se alle jobs

Powered by Labrador CMS