Naalagaaffiit Peqatigiit sipaarniuteqarnerat ICC-mi mamiatsaataavoq
Naalagaaffiit Peqatigiit aningaasaliissutitigut ikilisaanerat, ilaatigut nutserisoqarsinnaanermik, inuillu pisinnaatitaaffiinik nakkutilliiartorlutik nunanut allanut tikeraartarnerit ikilinerinik eqquissasoq, ICC nalunaarpoq.
- Aningaasaliissutitigut ikilisaaneq pisariaqartumik suliniutinut angusanullu kinguneqarnerpaanut sunniuteqarsinnaavoq, ICC-mi siulittaasoq Sara Olsvig oqarpoq.
Assiliisoq: ICC
Nunat Inoqqaavisa Atugaat Pillugit Naalagaaffiit Peqatigiinni Isummersoqatigiiffimmi ingerlanneqaqqammersumi, Naalagaaffiit Peqatigiit aningaasaliissutinik ikilisaanerat pillugu Inuit kattuffiat ICC ernumalluinnarpoq.
Taamaattumik Naalagaaffiit Peqatigiinnut aningaasaliissutinik ikilisaassannginnissaannik, akerlianilli amerlisaanissaannik, ICC-p siulittaasuata Sara Olsvigip nunat kajumissaarpai.
Kinguneqassasoq
Aningaasaliissutinik ikilisaaneq nunap inoqqaavisa pisinnaatitaaffiinik suliniummut sunniuteqarsinnaasoq, oqallinnermi Sara Olsvig oqarpoq:
- Naalagaaffiit Peqatigiit aningaasaliissutinik ikilisaanerat tamakkiisumik, ingammik Nunat Inoqqaavisa pisinnaatitaaffiinut tunngasuni sulianut pingaarutilinnut kinguneqarnera pillugu, Inuit Issittormiut Siunnersuisoqatigiiffiat ernumassuteqarpoq. Aningaasaliissutitigut ikilisaaneq pisariaqartumik suliniutinut angusanullu kinguneqarnerpaanut sunniuteqarsinnaavoq, ICC-mit nalunaarut naapertorlugu Sara Olsvig oqarpoq.
100 mio. kr.-it sinnerlugit sipaarniuteqartut
Sara Olsvig naapertorlugu ikilisaaneq nalunaarusianik misissuinernillu ikinnerusunik, kiisalu Naalagaaffiit Peqatigiinni aallartitat inuit pisinnaatitaaffii pillugit paasisaqarniarlutik nalunaarusiorniarlutillu nunap inoqqaavisa nunaannut toqqaannartumik angalasarnerisa ikilinerannik kinguneqarpoq.
2023-mi aningaasatigut ajornartorsiungaarsimallutik, ilaasortaasullu aningaasanik tunniussisarnerat ukiuni tallimani aatsaat taama appasitsigisoq, Naalagaaffiit Peqatigiit nalunaaruteqarput.
Tamanna pissutigalugu Naalagaaffiit Peqatigiit Genèvemi allaffeqarfianni 2024-mi 100 millionit koruunit sinnerlugit sipaarniuteqartariaqarsimapput.
Nammineq aalajangiisinnaassutsimik nukittorsaaneq
'Nunat inoqqaavisa pisinnaatitaaffii pillugit Naalagaaffiit Peqatigiit nalunaarutaanni Nunat Inoqqaavisa nammineq aalajangiisinnaassusaannik nukittorsaaneq: Inuusuttut oqariartuutaat immikkut erseqqissarlugit' ataatsimeersuarnermi sammineqarpoq.
ICC naapertorlugu suliniutit angusallu pingaarutillit nalliuttorsiutigineqarlutillu takutinneqaraluartut, 'nunarsuaq tamakkerlugu Nunat Inoqqaavisa assigiinngisinneqarnerat erseqqissoq oqariartuuterpassuit takutikkaat', ICC allappoq.
