Naalagaaffinngornissamut taasititsisoqarnissaa Naalakkersuisut taperserpaat
Kalaallit Nunaata namminiilivinnissaa pillugu Namminersorlutik Oqartussat inatsisaanni paragraf 21-p qanoq atuutilersinneqarnissaa inatsisitigut nassuiaammi erseqqissarneqassaaq. Naalakkersuisut siunnersuutigaat nalunaarusiami aamma nalilerneqassasoq Kalaallit Nunaata namminiilivinnissaa naalagaaffinngortinneqarnissaalu pillugu tunngaviusumik innuttaasunik taasititsinissaq qanoq ingerlanneqarsinnaanersoq.
Leiff Josefsen
Inatsisartut
namminersulivinnissaq pillugu inatsisissatut siunnersuutit marluk
pingasunngornermi oqaluuserilerpaat.Immikkoortumi tamatumani
Kalaallit Nunaata namminiilivinnissaanut aqqut sammineqarpoq.
Siunnersuutit
aappaat Aqqalu C. Jerimiassenimit (A) siunnersuutigineqarpoq,
taannalu naapertorlugu naalagaaffinngortitsineq pillugu innuttaasut
tunngaviusumik taasitinneqartariaqarput.
Naalakkersuisut
siunnersuutinut marlunnut akissutiminnik Inatsisartunut
saqqummiussisimapput, Naalakkersuisut siunnersuutit marluk
inatsisitigut nassuiaammut ataatsimut kattunneqarnissaat
siunnersuutigaat.
Inatsisitigut
ilisimasallit piareersimasut
Nassuiaammi
pingaarnerpaamik Namminersorlutik Oqartussat pillugit inatsimmi §
21-p atuutilersinneqarnissaa inatsisitigut misissorneqassaaq,
aalajangersaaffiullu tamatuma, tassa Kalaallit Nunaata
namminiilivinnissamut aqqutaani alloriarnerit tamavimmik
qulaajarneqarnissaat siunertaralugu.
Inatsisartullu
isumassarsiaq tapersissappassuk, Naalakkersuisut suliaqartussanik
qulakkeerinnereerput:
-
Namminersorneq pillugu kalaallit qallunaallu isumalioqatigiissitaasa,
kalaallit tungaannit inatsisitigut ilisimasallit atorneqarnissaat
periarfissaasoq, taakkulu inatsisitigut misissuinissaq
suliarerusukkaat Naalakkersuisunit ilisimatitsissutigissavara,
naalagaaffinngornissamut naalakkersuisoq Vivian Motzfeldt (S),
Inatsisartunut allappoq.
Innuttaasunik
taasititsinissaq taperseraat
Nassuiaammi
paragraf 21-p sammineqarnerata saniatigut aamma nalilerneqarpoq
‘Kalaallit Nunaata namminiilivinnissaa naalagaaffinngortinnissaalu
pillugit tunngaviusumik innuttaasut taasitinneqarnissaannut
piumasaqaatit suut atuunnersut’, tamanna Aqqalu C. Jerimiassenip
siunnersuutigaa.
Innuttaasut
taasitinneqartariaqartut Naalakkersuisut tunngaviusumik
isumaqataapput, aalajangerneq tamanna tunngaviusoq tapersersorneraat
tapersersunnginneraalluunniit paasiniarlugu.
-
Isumaqataanitsinni naalagaaffinngornissamut suliaqarnermi
innuttaasunit politikikkut pisinnaatitaaffeqarnissaq pisariaqarmat.
Tamanna naalagaaffinngornissamut ingerlanermi kalaallit tungaanit
politikikkut sulinermi suliaqarnermilu innersuukkusunnaqaaq,
naalakkersuisoq Vivian Motzfeldt allappoq
Taasititsinernit
marlunnit siulleq
Namminiilivinnissamut
piumasaqaatit aatsaat erseqqissippata taasisoqaqqissinnaasoq,
naalakkersuisup oqaatigaa:
-
Naalagaaffinngornissamut tunngaviusumik aalajangerneq Nunatta
naalagaaffinngorneranut paarlaanneqassanngilaq, tamanna
aalajangernissaq innuttaasunik taasititsinikkut allakkut
ingerlanneqartussaammat, Vivian Motzfeldt allappoq.
Aqqalu
C. Jerimiassenip Inatsisartunut qinersinermut atatillugu
taasisoqarsinnaaneranik siunnersuutaa Naalakkersuisut
eqqarsarnartoqartippaat. Qineqqusaarnermi sammisat allat apeqqummit
pingaaruteqannginnerulersinnaanerat kiisalu Inatsisartunut
qinersisoqarnissaanut sapaatip-akunnialuinnaat sioqqutitsiarlugit
nalunaaruteqartoqartarmat paasissutissiineq oqallinnerlu naammattumik
piffissaqarfigineqarsinnaassanersut Naalakkersuisut ernummatigaat.
Kikkut
taasissappat
Nunap
namminiilivinnissaanut tunngatillugu innuttaasut
taasitinneqarnissaannut tunngatillugu naalakkersuisup oqaatigaa,
kikkut taasisinnaatitaanerat eqqarsaatigeqqissaarneqartariaqartoq
immaqalu sukateriffigineqartariaqartoq:
-
Nunatta namminiilivinnissaanut naalagaaffinngornissamullu
innuttaasunik tunngaviusumik taasititsineq Inatsisartunut
nalinginnaasumik qinersinermut sanilliulluni mianernarnerujussuuvoq.
-
Uani taasisinnaasut nalunaarsorneri annertussusaat, sumi
najugaqarnermi piumasaqaatit sakkortunerusut, nunamut
innuttaasuinullu pingaaruteqarneranik tunngaveqartumik.
Qinersisinnaasunik piumasaqaatillu nunarsuarmioqatigiinni
naalagaaffiup innuttaasunut pisussaaffiinut nalinginnaasumik
periuserisartagaat akuerisat atorneqassapput, Vivian Motzfeldt
allappoq.